Read Medumba Tànkùt 20 Bible Online

Tànkùt 20 - Medumba bible

Tànkùt 20

¹Ndu' num ntshabte mèn, neta ndu' num nkag nto' nsi. Mba we lo z'a swèn tu i bwe là ke' ghù nebe nzenu.

²Yantù mfen b'a mba ntshu' ngwayit là; mèn z'a kamte yantù i là, soṅ nu nso be num tu wul i.

³Ghamte ke mbe mènntùn à ndùs'a biagte ba ntanta là, là mba zit nkagni lo be ngua' wul i bu yantù.

⁴A num mbe ndù nedù' nà ndô ke dù', a be ndù netsho' tshu, a diag, ke ghù sàm ju.

⁵Nkwate mi a be tu mènntùn nà b'a mba ntse mi a tsho neshu là! ngasiaṅte be ndèn mb'a tu' mi bwe là.

⁶Benntùn yàm be ndo' ka'te nsoṅ bwôntù yub yi: là we z'a ghù nefon kua' mèn nenùn à?

⁷Mèn netsin ke nzin à ntùm ze nenùne, a be ntôg bon tse tù' ntswe mebwô.

⁸Mfen be ntswe num diaṅkwa nunetsine; ndo' nda' miag mi mbiag nukebwô yi.

⁹We z'a ghù netshob mb'a lànte ntù i, ntù' tse mèn nelàn num nukebwô tse à?

¹⁰Neghù mfi' bàa bàa, nkesoṅ mbàa mbàa b'a tshu ts'a ke' bwô Tshùaben nà.

¹¹Mônke' be ntshùa njam mfa' mi nda'te a be ze ngùninu mi bo nzin mi nsi be nelàne mbèn ntsin nà.

¹²Toṅ z'a be nju'u, bo lag s'a be njen nà, Tshùaben bèn ndèn njoṅ i fa.

¹³Kà ghua' wul o miaglo, mbwôg ndù k'o tù' mbwoṅ; là gha' miag mu ndù o ywèt bàn.

¹⁴Njun ju be nke ntshob ndù: A ke' bwô, a ke' bwô! Là ndùs'a jun tà nke nèn nà, a nyàmte wul i.

¹⁵Gol boa ntôgtse yàm num bwe; là nkub ntshu mi a ze nu là b'a ju tanjoṅ ntshùate.

¹⁶Lo' nzwe i, nummb'a kwé bu ngùn; mbe se' num ngùn, a bwô ndù o tshùb tshu yi num tshwèt.

¹⁷Jujù mfùm be ndùmte ntshu mènntùn neshu; là, a be mbe tum njam nkwango' tù' bèn ndun ntshu i.

¹⁸Ntag nke mbèn ngù ntàmtenu taṅ nga, ndùlala ma' ntsho à ntùm zenu.

¹⁹Mèn z'a be nsa ndàm ntùm la' là be nto ba ntsham. Kà yôg shun bin mèn nkub ntshu mi be ndote là.

²⁰Mèn z'a so ndon tu tàab ke màab lo là, mba ze nka' nsi bi tèt njame.

²¹Fu' se mèn ghù be ndende ndù neto'te là, bo ke nsi tam ntse bwe ndù nemiagte nsi miagt'a ntùm kebwô.

²²Kà tshob mb'o nsi yagte mba'a! Yab ntù num Tshùaben, a nsi yôg o.

²³Neghù mfi' tshaṅ bàa b'a ju z'a ke' bwô Tshùaben nà; ndùlala nkilô mi a ke' tsin nà ke' bwô tse.

²⁴A b'a Tshùaben bèn nke ntshagte nku mènntùn; ke ze mènntùn lèn num ze manz'à?

²⁵A ke mb'a ta' ywi' mènntùn nebam ju Nsi ntùm vôgte! A tswe à mb'o ghù nka'ni kà njôg nkwate nu bwe là.

²⁶Nzenu mfen num nké'te ghatshùagntù ngù nku masin tshùa num bo.

²⁷Ywèt mènntùn b'a ta' lambo Tshùaben a be ntsho nzin nkum tà ntùm mbi mèn.

²⁸Bwôntù bo nenùn be mbéb mfen; a be ntshùa njam bwôntù tomte diaṅkwa se.

²⁹Neta bèn nke nso ghamte num ghuan benntùn, nyiaṅtu fôgtab nke nso ghamte num ywèn benntùn.

³⁰Keko' s'a be nsô lem, nke nja là, num njate ngatshùagntù num nukebwô, mba nto' tse bo tsham a tsho tà ntùm mbi mi là.