Read Medumba Tànkùt 28 Bible Online

Tànkùt 28 - Medumba bible

Tànkùt 28

¹Ngatshùagntù be nkù ndù mèn ke' ta' i là mèn netsin num ntswe ke ke mbwôg sàm ju mba metshab ngwayit là.

²Fenfen num njàm ntùm ngô ndùse va' vù la' là ndùse nzenu z'a ghù nkwate bèn nke ntô là, la' be tshaṅ.

³Ta' mbwoṅ z'a tshwèt ma'ni ghayennge' là b'a mba neta fetmbaṅ z'a be ngù kekua vù ntùm ngô là!

⁴Ben tse bo ghua' ntshù' là nke nyàmt'a ngatshùagntù, là ben tse bo num nze ntshù' là num nja ntù num i.

⁵Ben tse bo swèn wut tshob nukebwô là ke' be lèn nunetsine; là, ben tse bo num ndiag Tshùaben nà lèn njoṅ i fa.

⁶Mebwô b'a mbwoṅ z'a num nzin ntùm nenùn nà, ntshùa ngankàb z'a ghù mba manze nelamte là.

⁷Mèn z'a num nze ntshù' là b'a mèn z'a num nsiaṅte là, là mèn z'a be njôg shun boa ben bo ghù yôg kebwô là be nkag tuswe tu tàab.

⁸Mèn z'a num ndo' bin kà nkwi'te tshu tse yi là b'a ngajù kubte, a ke tse'te tshen tshu l'a num mèn z'a num nko ndèn bwoṅbwoṅ nà.

⁹A be ze mèn mem ntoṅ mi ndù k'a ju' ntshu'te là, mba mba ze le'te nsi b'a tshùaya'nu.

¹⁰Mèn z'a num ndo' ben ndaṅndaṅ nzin yi num manze kebwô là, num ngwù ntùm tàm se tu wul i tswe' là; là ben nenùn num njù ntsi' fu'.

¹¹Ngankàb ke ndo' wul i à mba nzenu là, là mbwoṅ z'a b'a nzenu là ghù nediag ntun num i.

¹²A num mbe ndùse ben netsin yob ngu' là, mba ghamte nsi be; là ndùse ghatshùagntù lo nsi là, mba we lo kù ndeme.

¹³Mèn z'a lem mfànnu mi là ke' be nèn mbwe, mèn z'a num mbam mfànnu mi, nkag nsi là num ngù kondèn.

¹⁴Mènfen b'a mèn z'a ke mb'a be ntùm bwôg njoṅ ndù fa là, là mèn ze sagntù be ntù i là num ngwù ntùm nge'.

¹⁵Ngatshùagntù z'a be ntô ta' ngô bwoṅ nà, b'a mba ta' ngwayit z'a tshwèt ntshu' là, mb'a mba mbù tshwèt ze nziku' ya i là.

¹⁶Ta' nkam z'a ke' ghù nesiaṅte là num ma'ni benntùn ke ghù ndù i, là mèn z'a num mbàn bin ntàn mfùm nà be nkwi'te lé'njù tse.

¹⁷Mèn ze lem mo' mèn dun tu i là nsi kù tà kum ntùm tàm. Kà mèn sô i bwe.

¹⁸Mèn z'a be nzin ntùm nenùn nà nsi yôge, mèn z'a num mbwe lamte manze bàa là nsi vù num ta' i ntshù'.

¹⁹Mèn z'a dù' ze nà là nsi ywèt jujù, là mèn z'a ke njôg z'a njam tshu banban nà nsi ywèt bwoṅ.

²⁰Mbotni be ntsho mèn nenùne, là mèn z'a be nànte neghù nkàb là ke' be tum bwe banban.

²¹A ke' bwô neke njen benntùn à num num, nummb'a be nu kam bàn ghù ta' mènntùn ghù nukebwô.

²²Mèn z'a ghù ntù ghe'te là be ntsho' ntam num nkàb, ke lèn ndù kekua nsi kab mbu num i.

²³Bo nsi bam ze nu mèn z'a be ntshobte mèn nà, ntshùa ze mèn z'a be ndo' à lém se mbatte mèn yi là.

²⁴Mèn z'a yi tàab ke màab lo nke ntshob ndù a ke' b'a kebwô là b'a nshun ngaghù nukebwô.

²⁵Ngako'tewut num nshu'te ntanta, là mèn z'a num njab ntù num Tshùaben nà ywèt tse.

²⁶Mèn z'a num njab ntù num ko' tu wul i là b'a nkagni; là mèn z'a ke ndo' à zenu nzin yi là nsi yôge.

²⁷Mèn z'a num mfà ju mbwoṅ nà ke' be vù kekua, là mèn z'a num mem miag là be nket ndon.

²⁸A num mbe ndùse ghatshùagntù lo nsi là mba we lo kù ndeme; a num mbe ndùse ghatshùagntù bite là, ben netsin yàm nga' mbu.