Read Medumba Tànkùt 29 Bible Online

Tànkùt 29 - Medumba bible

Tànkùt 29

¹Mèn z'a bwô ndù bo tshobt'é, là, a yôg ngù kekol i ta là, bo nsi be't'é tà fu se ke be bwe.

²A num mbe ndùse ben netsin yàm nga' mbu là, ngô nke ntsiaṅte; là, ndùse ngatshùagntù bèn nke ntô là, ngô nke ntsham zwe.

³Mèn z'a num nkô zenu là be ngù tàab tsiaṅte; là mèn z'a num njôg boa kattù bènnzwi là num mbagte tshu tse.

⁴Ta' mfen ke ndo' à nunetsin kà ngù ngô ntaṅ nga yi nsi, là, z'a num nkwé ntshub yàm nà ke ma' ngô à ntùm bwoṅ.

⁵Mèn z'a be mbatte mfèl i là be mbùn nkù tun nku mi.

⁶Ywi' num mbe ntùm nukebwô ngatshùagntù, là mèn netsin be njob ngu'u, nke ntsiaṅte.

⁷Mèn netsin num nkwimte netshètte njam bwoṅbwoṅ, là ghatshùagntù ke' lèn sàm nu bwe.

⁸Ghatshabte be mfette mbwôg ntùm tusô là ghazenu nke mbotte yantù à nebotte.

⁹Nzenu be nsoṅte nu bo nkagni ké? K'a ya ntù k'a zwi lo, mba fite ke nsi be.

¹⁰Ghafètte lem num mbàn mèn netsine, là ben ndaṅndaṅ nke nzi tshùalo num yôg se.

¹¹Nkagni be ngù yantù i bèt, là nzenu nke ntô yantù i, mfènt'é.

¹²A be ze ta' mfen kù' ntoṅ num ba tatte là, mba njoṅ ghafa' tse fa nsi be ben kebwô.

¹³Mbwoṅ bo ngafétte num mbumte, là Tshùaben bèn nke nto miag njoṅ yub ntu bàa fa.

¹⁴Ta' mfen z'a num nsa' kam bwoṅbwoṅ mebwô là diaṅkwa se nsi taṅ nga mebwô.

¹⁵Shua' bo netswit nkùn num mfà zenu, là mén ze bo ke' be tshagt'é là num nkag tuswe tu màab.

¹⁶Ghatshùagntù num njàm nga' mbu, nukebwô nke njàm nèn mbwe. Nda' ndù ben netsin nsi yen mba bo vù nsi là.

¹⁷Tam mbwôg ntshu nshum o, a ghù o tswe fite, a ghù ntù o ke ṅwate.

¹⁸Ngô ke nèn à ke ghom wut ndùse ba ghatshob ntshob Nsi ke' bem mèn nà. Là mènfen b'a mèn z'a ze ntshù' là!

¹⁹Bo ke ndo' à ntshob ntsiagte nkuan yi, a ju' be neju' mb'a ke nsi tshùbe.

²⁰O yen ngazwiaṅte ntùm ntshob mi mb'o nsi tù' ghù nenywint'à num nkagni.

²¹O ghù nkuan o nke mbatt'é fe mônke' mb'a be miagte nke ndo' wul i mba nshum o là.

²²Ngayantù num nshu'te ntanta ngatshùagntù nke ngù nukebwô yàme.

²³Ko'tewut mènntùn be kôge, là mèn z'a num mbétni là ghù ywèt yàme.

²⁴Mèn ze bo ntshô be nso mbu là b'a ngakeban tu wul i. A num nju' ndon z'a njam bwe là ke tshob sàm ju.

²⁵O ke mbwôg benntùn mb'o nsi vù ntùm ywi', là mèn z'a num njab njoṅ i fa bu Tshùaben nà b'a ndàlem.

²⁶Benntùn yàm num ndiag ndù ngatô lèn yube, là Tshùaben bèn nke ngù nu ndaṅndaṅ mba zit mèn no.

²⁷Nu ngaghù nukebwô num mbag ben nenùn neshu, mèn ze manz'é be ndaṅndaṅ nà num mbag ngatshùagntù neshu.