Read Medumba Tànkùt 30 Bible Online

Tànkùt 30 - Medumba bible

Tànkùt 30

¹Ntshob Agur, nshum Jaké. Ntshob yen mèn nà mi a tshùa njam i tshob Itiél bo Ukal là.

²Kua' nenùn me b'a ngazwiaṅte netèt benntùn, me ke' ghù nesiaṅte ta' mènntùn.

³Me ke' zi'te zenu me ke' lèn ze nesiaṅte ben nelàne.

⁴We z'a ko' mfe kamànyam k'a bèn nswe' mfe bwe à? We z'a kùmte fetmbaṅ ntùm mbu mi à? We z'a kùmte ba ntse ntùm nzwe i à? We z'a ghù ntôg tsha' ṅwag à? Lén ng'é b'a we? Lén nshum i b'a we? O lèn ké?

⁵Ntshob Nsi fa tôg ntùm laṅte. A b'a tshètntsho ben tshen nà tse bo num ndiag ndàlem num i là.

⁶Kà kwi'te sàm ju num ntshob mi: mbwôg ndù k'a tshobt'o, bo tù' yen o mba ngatatte là.

⁷Me tshwèt mbètte tshu nze bàa, kà gha tshen tshu là me, ke be ndù me yoṅ nkwù.

⁸Tsin fùte ngùanesà mbaṅ àm bo ntshob tatte, kà bam bwoṅ tsho àm ke nkàb lo; fà jujù z'a ywimt'àm nà me,

⁹mbwôg ndù kà me ghù yàm ntù' gha o negha, ntshob ndù Tshùaben b'a we? Ke ndù kà me be ntùm bwoṅ nj'é, nto' neke ntute lén Nsi àm.

¹⁰Kà ghù ndàm num ngafa' mbaṅ tàfa' i, mbwôg ndù k'a so ndon tu o, o tù' ngavù ntsha.

¹¹Mo' nzwit mèn num bwe nke nso ndon tu tàab, ke be tam ntse màab!

¹²Mo' nzwit mèn num bwe nke njen mba bo làn tshob là ke be ndù bo sôg yub num sagte!

¹³Mo' nzwit mèn num bwe ndù miag mub dun ka'te, nkub miag mub nke ntshù à tù!

¹⁴Mo' nzwit mèn num bwe ndù nsô mub b'a ṅwi, ngagntshu mub b'a mbi, num nemi njennge' num nsitsha'a, mi bwoṅbwoṅ netèt benntùn.

¹⁵Mànyoṅ lem ghù ngonngon bàa, bo nke ntshob ndù: fà, fà nefà. Tshu num bwe tat tse bo ke' be ywèt là, a b'a mba nze tse kuà, ndù bo ke' be tshob ndù a ku'u!

¹⁶Ngô fe ben, mènnzwi z'a ke' bwe là, tsha' ts'a ke ngwag ntse à newag là bo mbwôge, nummb'a ke' be tshob ndù a ku'u!

¹⁷Lag s'a tshab ta' tà ngwag neju' ntshu ta' mà là, ba mala tse bo be fub là nsi to sen lag là, bon sa'mbu' fèl i.

¹⁸Tshu nze tat num bwe ndù me ke' lèn tu àm bwe a b'a mba nze kuà me ke' ju' tu àm bwe:

¹⁹Ntshùa sa'mbu' mfe kamànyam, ntshùa nyu num gholoṅ, ntshùa sitima ntùm dibantse bo ntshùa mandum num metshab mènnzwi.

²⁰Tshù mba ze manze kattù mènnzwi be là: A num njù ntshwét ntshu i, ntshob ndù: Me ke' ghù tshàm nukebwô!

²¹Tshu nze tat num nyi'te tsha'a tse nze kuà num bwe ndù b'a ke fènte nze:

²²Nkuan z'a tshwèt ntô là, mb'a be nkagni z'a ywèt là,

²³mb'a be wag mènnzwi z'a nandà là mb'a be mènnzwi z'a be nkuan, là, njù ndà màfa' i là.

²⁴Tsemo' bontsit nyàm num num nsitsha' kuà là njôg mbe ndù bo ze nu ntshùate:

²⁵Ba ndétndét, nzwit ze neta bwoṅ yi là, là ndèn nenabte jujù ze bo nsi jù nkwinjù là;

²⁶ba Damas, nzwit mèn ze neta bwoṅ yi là, nke nkut yub dù'ntswe à num ngondoṅ;

²⁷ngamntàn ke' ghù mfen, mba ndùlala nke ntum à tse tse.

²⁸Be bo lo' mbu ngom nsémnsém yi là, a nke njôg ntswe ts'a ndà ba fen.

²⁹Tshu tat num bwe ndù ntshù mub bwô, tse kuà be ndù nzin mub bwô;

³⁰ngwayit z'a be nduku ba nyàm nà, a ke' be bèn tuntun mbwe mba zit mèn no;

³¹nyàmdiaṅ ze bo kwi i là ke fot mbwe lo, bo mfen ze sàm mèn ke' ghù neta mbwe i là.

³²A be ze ko'tewut tènt'o nefa' mfa' bà là, a be z'o ghù nkwate kebwô là, o yab bu ntshu o:

³³Nummb'o tsi mbùn mb'a' fùn, nkut tu' se, o nyi ntselag mb'a' kaṅ ntù' lem; o fét yantù mb'a' kaṅ ntù' ntanta.