Read Medumba Tànkùt 7 Bible Online

Tànkùt 7 - Medumba bible

Tànkùt 7

¹Nshum àm, ntshùb ntshob màm, ndé' ntag màm ntùm ntù o.

²Ke nze ntag màm, o nsi yôge, ke ndem ntag màm à mb'o be ndem nyilag là.

³Kut yub num ntu mbu mu, tshébte yub ntùm ntù o.

⁴Tshob zenu ndù a b'a mfèl o ze mènnzwi tshob nesiaṅte ndù a b'a yu nshune;

⁵ndùlala ndù bo béb o num ngùn mènnzwi num ngùn mènnzwi z'a ghù botte ntshob là.

⁶Me lo tsin tôndà àm, nke ndôte ntùm mfé' ntùn mi me fate bwe là,

⁷me lo ke ndôte netèt kagni njen mo' ménnshum bwe, ndù lèn nkwate ke tu i.

⁸A lo ke ntshùa num manze, mbaṅ tôg nze dù' ze mo' ta' i netèt tshen ghùn bènnzwi là tsin nà. A nke nzin nda'nda' nke nèn nze dù' ba' i be là.

⁹A na' mb'a nkabte njù, ndù mfetnjù, netèt tèttswe' bo njame.

¹⁰Tshù, mo' mènnzwi kù' nèn mbaṅ i, ndù a ghù mat kattù, bo mfù ntùm ntù i.

¹¹A lo ke mvôgte, ke ke ngom wul i nze, nku mi ke be ghô ntùm ze ndà.

¹²O lo ke ntèl i num manze, ntèl i num ba nsém, num njoṅ ntôg nze fa, a ke nya'a.

¹³Mènnzwi là ghom ménnshum nà ntsiag i, ntshob yi se se ndù:

¹⁴Njo jule'te ze ma' mbu lo be tu àm, sènni me zwiagte yen nka'ni là.

¹⁵A ndùlala bèn ngù kà me ntum nse' mbwe o, nediag o. Tshù wù là ze me fon là.

¹⁶M'a' lo' ba belangé nabte kunndà yi, ndo' nzwe nevèn tse ndeb i fe à Egipto là mbomte kunndà yi.

¹⁷M'a' naṅ tshu nelamte num kunndà sàm, mire, aloès, kinamo.

¹⁸Ndonni se' be nèn ntamte ntùm nkôni tà nkum nkebnjù, be fà wut be ntùm ghag, ntsiaṅte.

¹⁹Nummbe ndu àm ke ndà, a nèn nkatte tà ngùanesà.

²⁰A lo' bam nkàb nèn yi; a nsi bèn njam ndà à tà ntshùa ṅwù.

²¹A tshùa njam ntshob ndo' tu ménnshum, a lo' ntshob nebotte mi a ntshu i là nsoṅt'é yi.

²²Ménnshum tam njam i be ndùse, mba ta' mbabun ze bo kul i nelab i là.

²³A be mbe ndùlala tà nkum ndùse két to bi se, mba saṅ s'a vù ntùm nkù, ke lèn ndù a nsi be miagte lo' tu i là.

²⁴Nshumnshum tshàm, ndonni a bwô bin ju' me, bin kù' ntoṅ num ntshob mi a tum ntshu àm nà.

²⁵Kà ntù tsin kaṅ njab num tse manze lèn yen mènnzwi là. Kà tam num tse manze mbi.

²⁶Nummb'a ghù benntùn yàm vù nsi. Benntùn ts'a zwi yub là yàm nga' mbu.

²⁷Ndà i b'a manze ngô fe ben. A b'a ya'nze z'a be nswe' nèn nkum dù'ntswe vùkob là.