Read Medumba Tànkùt 8 Bible Online

Tànkùt 8 - Medumba bible

Tànkùt 8

¹Zenu ke' be fà là se tù ntsiaṅ ké? nesiaṅte ke' be tshag nz'é tù ké?

²Zenu be ntsin mfe tu mbale, num ba manze, num ba mfagte manze,

³a be ntsin mbaṅ ba nsém, num manze netsho yi tusô. A be ntsin num nsém, nke ntshag nz'é tù ntshob ndù:

⁴Benntùn, me ke ntsiaṅ a bin, nz'àm ke ntshob nu a bon mènntùn.

⁵Kagni, bin zi'te neyen nze; kagni, bin zi'te nesiaṅte.

⁶Bin ju'u, nummbe me ghù tshu ndùbndùb tse me tshob là. Nkub ntshu màm ke nga' netshob à nu ndaṅndaṅ.

⁷Nummbe ntshu àm be ntshob nenùne, nkub ntshu màm nke mbàn tatte.

⁸Njoṅ ntshob fa mi a tum ntshu àm nà b'a mi netsine. Tatte ke nelamte lo ke ntùm men ntshob là.

⁹Njoṅ i fa b'a nelàn num mèn z'a ghù zenu là, mbe ndaṅndaṅ num mèn z'a ghù nesiaṅte là.

¹⁰A bwô bin kù ntù num tshàm tshu nezi'te ntshùa silba, nkù ntù num nesiaṅte ntshùa gol tanjoṅ.

¹¹Nummbe zenu ta njoṅ ntshùa ntôgtse, zenu ghù njoṅ i ntshùa njoṅ tshu fa tse ntshu ntàn be bwe là.

¹²Yàm dù'ntswe, me zenu b'a nezi'te neyene, me ghù nesiaṅte z'a fe nkwate là.

¹³Nebwôg Tshùaben b'a ngakeban nukebwô. Ka'te bo ko'tewut b'a manze nukebwô, ntshu kebwô b'a tshu tse me num mbàn i neshu là.

¹⁴Ntag bo nezin nkum ke mfe à me. Nezete bo neta ke mfe à me.

¹⁵Fenfen ke ntshùa njam àm kà nke ntô. Kamkam nke ntshùa njam àm kà ntsiagte ju z'a tsin nà.

¹⁶Fenfen, ben ndùbndùb, njoṅ ghasa'kam fa nsitsha' ke ntshùa njam me zenu kà nke ntô.

¹⁷Me be nkô ben bo kô àm nà, ben bo num ndiag àm nà be mfon àm.

¹⁸Bag fu' mba ghamte bèn nke mbe, tshu ts'a tswe là bo nunetsine.

¹⁹Tàm se bo num nkàb num àm nà ta njoṅ tshùa gol, gol nelàne. Ju z'a be ntum num àm nà be mbwô ntshùa silba.

²⁰Me ke nzin à num manze netsine, num ba manze ndaṅndaṅ.

²¹Me num mfà tshu ben bo be nkô àm nà, mba neghù ndù tshunkàb tshob dune.

²²Tshùaben na' mbwôg nabt'a me kà njôg nabte mbwe mfa' mi, kà nabte mfa' mi, mi a ywèn neshu là.

²³Tshùaben lo te àm nsi fe tà ndùke lo, fe neto'te, kà mba nsitsha' mbe.

²⁴Bo lo be bwe àm ba dibantse ke yoṅ mbe, ndù ba tumnsi ntse mi ntse dun bwe là ke' yoṅ mbe.

²⁵Ndù ba mbat ke' yoṅ njùag nsi, nkônga lo be be ndù me lo yà be yàm,

²⁶a lo be be a ke yoṅ nabte tsha'a, ke yoṅ nabte ba tshwèt, ke nda' memfé mbab ntùm njù lo.

²⁷A lo be nabte kamànyam me be nsi, mba ndùs'a ke ndo' netshaṅ tun njù num dibantse Là.

²⁸Ndùs'a ke njab ba ndot mfe tù, ba tumnsi ntse nke mbèt neta ntum nà.

²⁹Ndùs'a ke mfà ze ndùnsi dibantse, ndù kà ntse tum num koṅ i nja' nkaṅ mi là, ndùs'a ke nte tun tsha' nsi là,

³⁰me zenu lo be mbaṅ i tshwèt fa', me lo ke ngù à tsiaṅte njoṅ lé'njù fa, nke ntam ngùa mbwe i ke tsin.

³¹Me lo ke ntam ngùa mbwe i num nsitsha'a, nke mfon sàm fu' netèt bon mènntùn.

³²Nshumnshum tshàm, ndonni bin kù' ntoṅ nju' àm, me zenu. Ghafen b'a ben tse bo be ntshùb tshàm manze là.

³³Bin ju' ju nezi'te, ndù bin tù' ghazenu a ke' bwô bin ghua' i.

³⁴Mènfen b'a mènntùn z'a be nju'ni àm nà, z'a be nzi tshùalo num tshàm nzendà mba sit lé'njù lo, nke mbéb ba ntom nà.

³⁵Nummbe mèn z'a fon àm nà fon yôg, a' kwé bwôntù yàm Tshùaben.

³⁶Là mèn z'a be ngù nukebwô me là ke nzwi à ze tu wut. Njoṅ benntùn fa tse bo num mbàn àm nà, ke nkô vùkob.