Read Medumba Nzenu 10 Bible Online

Nzenu 10 - Medumba bible

Nzenu 10

¹Ndaṅndaṅ mba ndô nzenze z'a kwù num mbagte mfèt ngatébte tshu lamte là, a b'a mba metsit ṅu'u num ndèt ntshùa zenu mba ghamte là.

²Nkwate nzenu ke nèn à bag mebwô, là nkwate nkagni nke nèn à kwébkwéb.

³Nkagni num mbe zin be num manze, nke mfùmni, nkwate mebwô ke be yi, njoṅ benntùn fa nke ntsiaṅ i nkagni.

⁴A be ze ntù tàfa' ya num o là, mb'a ke' bwô tse ndù o faṅ yu ntshufa' nsi, nummbe newag nu num ntshètte manze nukebwô yàme.

⁵Mo' ta' nukebwô num bwe ze me yen tun bam kamànyam nà, a b'a nu ze ngatshagte benntùn fàn ntùm mbu' là.

⁶Yen nu là b'a ndù: Bo yab ba kagni num dù' ben ndùbndùb, nswe' ghankàb nsi, nte yub num dù' fenyu' benntùn.

⁷Me lo yen ba kuan num ba nyàmdiaṅe, mbèn njen ba fen bo nke nzin mba ba kuan nà.

⁸Mèn ntswe' tô, a vù ntùm bwe, mèn nsa kummba' nyu tshôg i,

⁹mèn ke nsô ndoṅ mba be ndoṅ lem i, mèn ke mbag ntshwèn mba b'a ket mfaṅ bwe.

¹⁰A be ze ntshùag ṅwi ṅu'te, bo ke bèn nkùa a tshùag là mba bo a' be lo' fa' fa' yi nso ngù' bwe yàme. Nelo' zenu mfa' fa' yi num mfà bin yàme.

¹¹A be ndù nyu be tshôg mèn mb'a mbe bo ke' tsiaṅ i, mba ngatsiaṅ nyu ke' bèn ngù bin fa'.

¹²Ntshob mi a num ntum ntshu nzenu là num mbwô, là, nkagni nke mbèn mi ze men ntshob là nemi,

¹³nu z'a ke nto' netum ntshu i là, ke mb'a tshu ṅu'u; mbe miagte a tù' à ntshob kebwô, mi mbabune.

¹⁴Nkagni num nsoṅ nsoṅ yàme. Mènntùn ke' bèn nelèn nu z'a nsi se' là: We z'a nsi soṅ i ju z'a nsi tshùa se' à?

¹⁵Mfa' nkagni num naṅ bot num i kà ke bèn ndèn mba nenèn tusô.

¹⁶Ndon be tu ngô ze mfen i ke' à metsit mônke' ba bon mfen bèn nke njù jujù mà bam nkebnjù là.

¹⁷O b'a ngafen me ngô yen nà ze mfen o tum à ntùm fe'kame, ba bon mfen nke mbèn njù jujù ngelaṅ ze bo kô là, ndù a fà neta bo ke b'a nelo' yub ngù ghanu mbum nà.

¹⁸Mèn num ndo' lô mbù' ta' tù yi, nte tù mbu mi bot, tù vù nsi, tuba' kôg, mbaṅ nke ndo ndà.

¹⁹Bo num mbe tsiaṅte, na jujù benntùn bèn nu ndu' ṅwate, nkàb bèn nke ngù mba ke lo.

²⁰Kà naṅ ndon tu mfen ntùm ntù o tà nèn nkum mba ntùm to'ndà zi o, a ke' bwô ndù o tshabte ngankàb, nummbe bon nsaṅ mfe kamànyam num njùa nze mèn, mba bon nyàm tse mbàb mub be bwe là num ngù bo lèn nu ze bo tshob là.