Read Medumba Nzenu 2 Bible Online

Nzenu 2 - Medumba bible

Nzenu 2

¹Me kwate ntshob ndù: “Ndonni m'a' laṅt'o, ntùm tsiaṅte, tshù là, o nsi ghù fu', mba yen ni b'a be ju banban.”

²Me be zwi i, ntshob ndù: Tshù bà là me bèn mbe tsiaṅte, ntshob ndù: Yen nà nsi ywimt'o à ke?

³Me kô neghua' wul àm ndu', nda' ndù, ndé' ntù àm zenu; me kô nelo' wul àm ngù mbà yi, kà yen fu' benntùn nyiaṅtu bo njoṅ tshu fa tse bo tshwèt mbe yôg num nsitsha' nke ngù là.

⁴Me lo' wul àm mba ndùb là, mfa' mfa' yàme, nkut mba', njwit ba nkùa;

⁵me na' kut nka' jujù mba ze ntàmtù. Me na' ywit ntù mi a num njàm ntàm nà be nzenze.

⁶Me na' tswe' ntôntse neke ntu' ntse bwe ndo' nzwi' nà ntù yi.

⁷Me na' jun ba kuan mba ba ghafa'. Me na' bèn ngù ghafa' ndà boa nyàm ndùbndùb mba tse nke'nke' yàme ntshùa ben tse bo na' mbe mbwe àm Yérusalém nà.

⁸Me na' ntse'te nkàb yàme mba gol, tshu ntsi' ba fenfen boa ngô; me na' bèn ngù ghayobkwi tse bandum mba tse bènnzwi. Me na' ghù tshu ngùa benntùn nyiaṅtu, mbèn ngù bwoṅ bènnzwi.

⁹Me na' tù' mèn ndùb mbèn ngu'u, ngù tshu ntshùa njoṅ benntùn fa tse bo na' mbwôg be me Yérusalém nà; mba sàm ju ke bèn neséb num zenu àm.

¹⁰Me lo ke nyam miag màm sàm ju num tshu ts'a ke nge'te là. Me na' bam ntù àm tsiaṅte mb'a kô là, nummbe mfa' màm na' ke mbwô i neshu. Yen nà b'a yàm bin fa' ze me na' njù là.

¹¹Nda' ndù me kaṅ wul àm ndôte njoṅ mfa' fa mi mbu màm na' mfa' là, njen njoṅ mfa' fa me na' njen nge' bwe là, ntshob mbe njoṅ tshu fa b'a banban, mbèn mb'a neta' mfùag, bin ze be mèn jù num tshen tshu là tun bam kamànyam nà ke' be.

¹²Me bèn nkaṅ wul àm neyen mba zenu, yùm mba bà be yi là. Tshù njene! Njùndà mfen nsi se' ghù à ndùke? A' se' ngù mba ba mbwe ke ngù là.

¹³Tshù me yen ndù, bo num njù bin zenu ntshùa bin yùm, be ndaṅndaṅ mba bo num njù bin làne ntshùa njam nà.

¹⁴Nzenu ghù miag tu i nke njen nze yi, là nkagni nke nzin à ntùm njame. Nda' ndù, me lèn ndù ju z'a nsi tum ta' i là, nsi tum njoṅ yub bàa fa.

¹⁵A tshùate ndùlala, me kwate ntshob ndù: a be ze ju z'a tsho num nkagni là nsi bèn tsho mba num àm yàm nà, mba me na' njôg nzenu ndù à numke? Ndùlala, me bèn ntshob ndù mba yen nà b'a ju banban.

¹⁶Nummbe njoṅ ngelaṅ fa bo ke nsi kwimte nzenu, ke bèn nkwimte nkagni. Mbèn mbe, a nsi be ndù mànjam bo lagte njoṅ tshu fa. A be ke? Mba nzenu num nkwù, mba nkagni kwù.

¹⁷A tshùa ndùlala, me wag yôg, nummbe mba ke lo ze mèn num ngù tun bam kamànyam nà b'a kebwô njoṅ i fa b'a banban mbèn mbe nediag neghom fetmbaṅ mbu.

¹⁸Me wag njoṅ mfa' fa me fa' tun bam kamànyam mbe ndù ngelaṅ nsi ku' me nèn mfaṅ njùndà àm nà.

¹⁹Kà nsi se' b'a nzenu ke nkagni lo, we z'a lèn à? A nsi se' tô njoṅ mfa' màm fa mi me na' ndo' zenu mfa' yi là, mba ndùlala, njoṅ i fa b'a banban tun bam kamànyam.

²⁰Tshù me yà bot tshàm num mfa' mi me fa' tun bam kamànyam nà.

²¹Mbèn mbe, tshù mèn z'a tshwit ze'ni ndo' ju nezi'te bo zenu mfa' yi mebwô: Z'a nsi faṅ bin fa' ndô z'a ke' fa' sàm ju là. Mba yen nà b'a banban mbèn mbe kebwô ze ndùb.

²²Ṅ, kua' ke z'a nsi tù' yen mèn ni z'a yen nge' mfa' fa' tun bam kamànyam à?

²³Mbèn mbe, njoṅ lé'njù fa a ke njen ze à be nge', mi mfa' b'a be nge' neyene, mba tèttswe', ntù i ke ku' nefite. Njoṅ i fa b'a be banban.

²⁴Ju mebwô num mènntùn nyiaṅtu b'a mbe a jù mbèn nu, nzwi'te fu' fa' se. Me yen yàm mbe njoṅ tshen nà fa ke mfe à Nsi.

²⁵Mbèn mbe, Tshùaben tshob ndù: We ze be a jù mbèn nu ke be ndù me lèn nà?

²⁶Ṅ, a num mfà zenu, mfà ju nezi'te bo tsiaṅte mèn z'a bwô i là. Là, mbe se' num mèn kebwô, a fà fa' neke nkale, ntse'te fa kà njôg mfà mèn ze nu tse num mbwô Nsi là. Mba njoṅ tshen nà fa b'a banban mbèn mb'a nediag neghom fetmbaṅ.