Read Medumba Nzenu 3 Bible Online

Nzenu 3 - Medumba bible

Nzenu 3

¹Mba ke lo ghù ze ndù bo ze ngelaṅ tun bam kamànyam!

²Ngelaṅ nebwe mba ngelaṅ nekwù. Ngelaṅ neywile mba ngelaṅ netsho'o.

³Ngelaṅ nezwi mèn mba ngelaṅ neyat'é. Ngelaṅ nesa a mba ngelaṅ nekule.

⁴Ngelaṅ nekua'a mba ngelaṅ nezwi i. Ngelaṅ nelàne mba ngelaṅ nenyiaṅe.

⁵Ngelaṅ neghua' ndoṅ mba ngelaṅ netse'te ndoṅ. Ngelaṅ netsiage mba ngelaṅ negha netsiag mèn.

⁶Ngelaṅ nediage mba ngelaṅ nefaṅ a bi. Ngelaṅ nelé'é mba ngelaṅ neghua'a.

⁷Ngelaṅ nefage mba ngelaṅ netame. Ngelaṅ nevù ù mbu'u mba ngelaṅ netshobe.

⁸Ngelaṅ nekô mèn num mbe, ngelaṅ nebàn i bèn mbe. Ngelaṅ ntsho num mbe, ngelaṅ fite bèn mbe.

⁹Bin ze ngave num njù num fa' se là b'a ke?

¹⁰Me yen fa' se Nsi fà mènntùn nyiaṅtu a ke mfa' là.

¹¹A num ngù tshu mebwô fa num yub ngelaṅ, mbèn nke nso mba zenu laṅnjù ntù bo, mba mba mènntùn nyiaṅtu ke' yoṅ ndèn mfa' Nsi num i fe neto'te kà nkum sènni là.

¹²Me lèn mbe sàm ju ke' be bwô i, kà ke nda' neke ntsiaṅte mbèn nke mfà nda' nku'ni fu' num ngelaṅ z'a tshwèt njôg là.

¹³Mbèn mbe, mèn nke njù mbèn nu mbèn nzwi'te fu' fa' se, mb'a b'a Nsi bèn mfà yi.

¹⁴Me lèn mbe njoṅ tshu fa tse Nsi num ngù là, num ntswe yoṅ ntshù'; sàm ju nekwi'te bwe ke be, sàm ju nebèn nsô bwe ke be, Nsi num ngù kà mènntùn tù' ke mbwôg i à nebwôge.

¹⁵Ju z'a be sènni là, lo yà be, mba ju z'a ghù be là, lo yà be; Nsi a' bèn ngù ju z'a na' ntôg là bèn nse'e.

¹⁶Me bèn njen tun bam kamànyam ndù: A num mbe dù' tsho'te ntsha, tshùagntù be bwe, mbèn mbe dù' netshob nenùne, tshùagntù be bwe.

¹⁷Me lo' ntù àm nèn tsham yi ntshob ndù: Nsi a' bèn ntsho'te ntsha mèn nenùne mba ze tshùagkèt mèn, nummbe mba zit ju lo ghù ze ngelaṅ mbèn ngù se fa'.

¹⁸Me lo' ntù àm, nèn tsham yi ntshob num nzwit mèn nyiaṅtu ndù: Nsi ke ndiag à nelaṅte yube. O lôte ntùm ntù tshobe, mb'o a' yen ndù, bo b'a ba nyàm.

¹⁹Miagte yôg mèn nyiaṅtu b'a mb'a miagte yôg nyàm nà, nummbe ju ze Nsi ka'ni mèn nyiaṅtu là, a bèn ka'ni be yi nyàm, a be ju ntshù'. Yen mèn ni num nkwù, mba yen nà bèn nkwù ze. Njoṅ yub fa ghù zwiag ntshù'. Ju ze mènntùn tshùa nyàm yi là ke bwe, nummbe njoṅ i fa b'a banban.

²⁰Njoṅ yub fa ke nèn à dù' ntshù', njoṅ yub fa na' ntum à ntùm tsha'a, njoṅ yub fa nsi ghù bèn bèn njam ntùm tsha'a.

²¹We z'a lèn mbe ywèt mènntùn num nko' nèn à mfe tù, ywèt nyàm bèn nke nswe' nèn à ntùm tsha'a?

²²Ju ze me yen yàm a bwô miagte num mènntùn nà b'a mb'a ke ntsiaṅte num mfa' mi, nummb'a b'a ze bag i là. Mbèn mbe, we z'a ku' nelo' i mbèn yi njam, a yen mba njam tù' mbe yi à?