Read Medumba Nzenu 5 Bible Online

Nzenu 5 - Medumba bible

Nzenu 5

¹Kà bam ndù ntshu o ke nànte, ke bèn mbam ndù ntù o ke satte netshob nu mbwe Nsi. Lèn ndù Nsi b'a mfe kamànyam, o be yu num nsitsha'a. Ndùlala, a ke' bwô ndù o ke ntshobte yàme.

²Lèn ndù o num ntshobte yàme mb'o a' fàn ntshu o. Ntshobte ke ndù i bèn nke mfà ngùtni.

³O neka' ju Nsi, o nànte ndù a bumte. Lèn ndù sàm lagte ke nsi be ba kagni. Mba ke lo z'o ka' Nsi là, ghù ndù a bumte.

⁴Tù' nda' ka' ke fà, o faṅ nà.

⁵Kà faṅ ndù ntshu o ghù wul o fa fàn nu. Kà nebèn nèn tshob tsho ngale'te Nsi ndù: tshù a b'a fàn mbu'u. Ke bèn ngù Nsi ya ntù num nkwate mu, mbèn ndiag nebagte fa' s'o lo' mbu mu mfa' yi à?

⁶Ngelaṅ ze tshu nemagte, tshu banban yàme, ntshob bèn njàm nà, yen ngelaṅ nà, o bwôg Nsi.

⁷A be z'o yen mum ngô, bo nke ngùtni mbwoṅ, mbèn nke nyiaṅte nunetsin nku là, kà tshàm num bwe be yàme, nummbe mo' mèn ndùb num ntô mo', tsemo' ben ndùb bèn ntô yub yub.

⁸Là tsha' bèn nke njwimte njoṅ yub fa; mfen bèn mbèn nke ntô tshu tse bo num ndù' là.

⁹Ngakô nkàb ke nsi ywèt nkàb, mba ngakô tshu ngùa ke nsi se' jù bin i. Tshen nà fa b'a tshu banban.

¹⁰Tshu num njàme, ba jù bèn njàme, kà ze bin ngaghù ju yôg mb'a ke, kà ke b'a nda' nelo' miag nke njen yi à?

¹¹Ngafa' num nzi miaglo mi fite, k'a jù yàme, k'a jù metsili, nda' ndù nkwate ngankàb ke' be bam a zi mba ngelaṅ a jù njwèt là.

¹²Me yen mo' nu ke ze i tun bam kamànyam, A b'a nkàb ze ngankàb num ndé'e, ngelaṅ be ku'u a kaṅ ntù' nge' i là.

¹³Yen nkàb là ke mbi à njam tshu kebwô, mbe ndù a be ndù a bwe ta' mén mandum mb'a nsi b'a kejumbu.

¹⁴Ndaṅndaṅ mb'a na' ntum bam màab ke nzwe num i là, a' zi bèn njam a mb'a na' nse' là. A' kwù ke lo' sàm ju num fa' se ndo' nèn yi.

¹⁵Mba yen nà bèn mb'a be nu ke ze i mba be mèn fe nse' mi là; ze bin mfa' mi a fa' là b'a ke?

¹⁶Mbèn mbe a nke ntswe njoṅ lé'njù fa à ntùm njame. Nu ke ze i nke ntsho i ntshùate, a nke ngone, tu i bèn nke nja yàme.

¹⁷Tshù ju ze me yen yàm mba ze kebwô là li: A bwô ndù mèn ke njù mbèn nu, nzwi'te fu' se fa' mènntùn num mfa' tun bam kamànyam num bon lé'njù tse Nsi fà yi là, nummbe yen nà bèn mbe ze bag i.

¹⁸Mbèn mbe, ghafen b'a ben tse Nsi fà nkàb bo mba tshu yàme, mbèn mbam bo ndù bo fèt yub njoṅ i bwe ndo' njù bin fa' sub yi là. Yen nà b'a fu' ndù Nsi bèn fà bo.

¹⁹Nummbe a ke nsi kwimte ngelaṅ yôg, mba Nsi tshwèt ntomt'é ntùm bwôntù i mba ntùm tsiaṅte là.