Read Medumba Nzenu 9 Bible Online

Nzenu 9 - Medumba bible

Nzenu 9

¹Ṅ, me yab njoṅ tshen tshu là fa ntùm ntù àm, ma' mfi' njoṅ i fa njen ndù: Ben nenùne, ghazenu boa mfa' mub fa tamte mb'a mum mbu Nsi. Ke nkôni lo, ke mba' lo, mènntùn ke' ku'ni netshob mb'a lèn yube. Njoṅ yub fa tshùate mi nkwate.

²Njoṅ i fa b'a banban mbwe njoṅ benntùn fa. Tshùagkèt mèn bo mèn nenùn nsi zin kum à la' ntshù', ke mèn mebwô, ke mèn nelàne, ke sagte mèn no, k'a b'a nu'bo' num tu lo, k'a ke nu'bo' num tu lo, mb'a nsi b'a ndaṅndaṅ num mèn nenùne bo ngaghù nukebwô, mbe ndaṅndaṅ num mèn z'a kàn mfe mba mèn z'a ke' kàn mfe là.

³A b'a ta' kebwô num njoṅ tshu fa ts'a ke ntshùa tun bam kamànyam nà, nummbe ta' ju ntshù' tshwèt mbéb njoṅ benntùn fa, ben kebwô mba ben mebwô be ndaṅndaṅ. Mbèn mbe, ntù bon Adam dun nkwate mfùm, tsiaṅte be ntù bo mum lé'njù yôg sube, ngelaṅ be ku'u bo tôg nèn ngô ba fe ben.

⁴Nummbe a b'a we tag bwe à? Ta' ju ntshù' num bwe num ben bo tshwèt njôg là: A b'a ndù mbù z'a ke' ntùn nà, fà bin yàme ntshùa nyàm kema' z'a yà kwù là.

⁵Nummbe ben bo tswe ntùn ndonni là, lèn ndù bo a' ghù nkwù, là, mba fe ben nà, yub nu mi, mub mfa' ke' bèn mbe, bo ke bèn nekwate yube.

⁶Yub nkôni, yub mba'a mba yub ghe'te yà mi. Bo ke nsi bèn ghù yub bag i num tshu ts'a num ntôg tun bam kamànyam nà.

⁷Nène, njù bàn o ntùm tsiaṅte mbèn ndo' ntù mebwô nu ndu' mu yi, nummbe Nsi yà bam mfa' mu.

⁸Ke ma' be nzwe fôgtab njoṅ ngelaṅ fa, mbèn nke mbé'te tu o mfèt njoṅ ndù fa.

⁹A bwô neke njôg bin mènnzwi z'o num nkô i là num bon ntswe'njù yôg banban ze Nsi fà wù num nsitsha' là, nummbe a b'a yu bag i là num yôg bo nge' z'o num bwe ntùm njù li là.

¹⁰Mba kelo z'o yen ndù a bwô neghù, o ku'ni neghù là, o ghù nummbe dù' z'o tshwèt nèn nà, sàm fa', sàm njo, sàm nkwate ke sàm zenu lo ke nsi be bwe.

¹¹Mo' ju ze me bèn njen num nsitsha' là b'a mbe nde nekù ke' b'a nda' mi ba ghù ngù', ntsho ke bèn mb'a ju ghaghù neta, bàn ke bèn mb'a ju ghaghù nkwate, fu' ke bèn mb'a ze ghazenu, ywimte ke b'a nda' ze ju ba zemetén nummbe nge' mba kebwô num ntsho njoṅ yub fa.

¹²Mbèn mbe, mènntùn ke' lèn ze ngelaṅ ndaṅndaṅ mba ngontse tse bo num mfàn nze ntsho ntùm nkù yoṅ nge' là, mba mba ba nsaṅ tse bo ghom yub ntùm ywi' là. A bèn mb'a ndaṅndaṅ mba nge' num ndo' nu ke ze i ntsho yi num bon Adam nà.

¹³A tshùa njam nkwate me bèn ndo' miag màm njen mo' mà nu ndùb yi tun bam kamànyam.

¹⁴Mo' metsit tusô na' be bwe, ndù a ke' ghù benntùn yàme, mo' mfen ndùb nke maṅt'é, lo' o, a tshùa ndùlala, a dù' njwi' yi a vù bwe.

¹⁵Mo' mèn nke'kèt nzenu na' be ntùm tusô là, ndo' zenu i njôg dù' là yi. Nda' ndù, sàm mèn ke' to' nkwimte lén yen nke'kèt là.

¹⁶Ndùlala, tu wul àm me tshob ndù: Zenu bwô ntshùa ngù', nda' ndù bo wag zenu nke'kèt, ke ju' ntshob mi.

¹⁷Bo ke nju' ntshob ghazenu à ntùm fite, ntshùa neta ntshob mi ta' mfen ku' nelo' ntshagte ba kagni yi là.

¹⁸Zenu bwô neshu ntshùa tshu ntsho, là, ta' mèn kebwô ntshù' ku'ni nebagte tshu ntùn yàme.