Read Medumba Nkwi Nkwi 1 Bible Online

Nkwi Nkwi 1 - Medumba bible

Nkwi Nkwi 1

¹Kwi s'a tshùa memo' nkwi là, se Salomon.

²Ménngon tshob ndù: A bwô ndù o tsiag àm, nyô ntshu àm, nummbe yu nkôni ta njoṅ me ntshùa ndu',

³tsho labinda num ndamte mbwô neshu. Lén su b'a labinda z'a be nsa njwèt mi là. A ndùlala ze bontshab ngonngon num nkô o là.

⁴Soṅt'àm njab njam o! Be so nde ku ntshù'! Mfen ghù me se' ntùm nto'ndà mi. Bag tshwèt nke ntam tsiaṅte, nke ṅwate num o. Mb'o be nke mfute yag mbu là bwô yag ntshùa ndu'! Mèn kô o mb'a ke fàn à manze.

⁵Ngonngon Yérusalém, me b'a mèn nesèn mba tà ndùlala me bwô. Me sèn à mba nzwe ba ntàb Kédar là, mba mba' Salomon nà.

⁶Kà bin lôt'a mba me sèn nà: A b'a nyam bèn mbàb àm ndùlala. Nshumnshum màa lo ya ntù num àm, kà ndo' àm ngù ngabéb nà ntù ndu' yi; là, me ke' béb kua' ko' yàm nà ntù ndu'.

⁷Ndùlala, wù ze ntù àm be nkô o là, soṅ àm dù' z'o be nkém tsho mbwe bwe là, dù' z'o be ngù bo fite bwe nkanyam nà. Nummb'a ke' bwô ndù me be mba mèn z'a bi là mbaṅ bwoṅ nyàm shun tsho.

⁸Ménnshum bùnte ndù: Mènnzwi z'a bwô ntshùa tsemo'o, a be z'o ke' lèn nà, o tum ntsin num tuba' ba mbwe, nkém bon mbwe tsho, mbaṅ tse dù'ntswe ghabéb mbwe.

⁹Nshun àm ze mènnzwi, tu wul o bwô num miag màm à mba nyàmdiaṅ àm ze bo taṅ num nkalig Faraon nà.

¹⁰Nge' mu bwô netèt ntshèn, kekol o bwô netèt ntôgtse mi a be tô o nkanka là.

¹¹Bag nsi nabte ntshèn gol wù, ma'te ndô silba bwe.

¹²Ménngon bùnte ndù: Ndùse mfen yé'te nke mfite num me kunndà se là, labinda ze me ghù là nke nsô njwèt mi.

¹³Nshun àm be m'a mba ta' bu' nelamte ze me tshùb num ndàntù àm nà.

¹⁴Nshun àm be m'a mba tsha tsinkém nà, mba ba nà ntù ndu' ts'a En-Guédi là.

¹⁵Ménnshum bùnte ndù: Nshun àm ze mènnzwi, o bwô, o bwô neshu. Miag mu b'a ba bwoṅsaṅe.

¹⁶Ménngon bùnte ndù: nkôni àm, o bwô, o bwô neshu. Kunndà be b'a nenàfi.

¹⁷Ménnshum bùnte ndù: Ba ntom mba' be b'a sédra, mbwoṅ tse be neta tù ntùn.