Read Medumba Nkwi Nkwi 4 Bible Online

Nkwi Nkwi 4 - Medumba bible

Nkwi Nkwi 4

¹Ménnshum bùnte ndù: Nshun àm ze mènnzwi, o bwô neshu! O bwô neshu! Miag mu b'a ba bwoṅsaṅ njam nzwe z'o ma' tu o là. Nyiaṅtu tsho b'a mba ta' bwoṅ mbwe là, mbwe tse bo taṅte yub mbaṅ mbat Galad là.

²Nsô mu fôg mba ta' bwoṅ njùmbwe tse bo kebte nyiaṅ tshobe, bo nke nko' mfe dù' nenu ntse là. njoṅ yub fa ghù à bonfag. Mba ze ntshù' netèt bo ke' be kebwe.

³Nkub ntshu mu b'a mba ta' bàb ju meba là. Ntshu o num mbatte mèn neshu. Nge' mu b'a mba ta' bag tàm ju là njam nzwe z'o ma' tu o là.

⁴Kekol o b'a mba tuba' David là. Bo kul i a num neke ndé' tshu ntsho bwe. Bo ghette ntshètntsho bwe ntsha' mbùm. Njoṅ i fa b'a ntshètntsho ba sa'nde'e.

⁵Mbùn mu mbàa b'a mba bontshab ngabnyàm bàa là, mba bonfag ta' njuanyàm, tse bo tshwèt mfèt netèt nsàm nenà là.

⁶Me nsi nèn num mbat ze njwèt mire tshwèt ndamte bwe là, nèn num kônga ze njwèt tshu nelamte be bwe là, ndùse mfùag mfetnjù nsi ke fette, netshaṅ mba ke lo to' nke nsag là.

⁷Nshun àm ze mènnzwi, o bwô nja'a. Sàm lo' ke tse num o.

⁸Nzwi àm ze me ka, se' be lo mfe num Liban! Swe' mfe num tu Amana, num tu Senir bo Hermon, ntùm ba ntô ngwayit boa ba nzwimàntô.

⁹Mfèl àm ze mènnzwi, nzwi àm ze me ka, o num ndo' ntù àm. O num ndôt'àm tun lag su, ndo' ntù àm. O num ndo' mo' ta' ntshèn mu ts'a tô o là ndo' ntù àm yi.

¹⁰Mfèl àm ze mènnzwi, nzwi àm ze me ka, nelo' ntù gha' mbu ntùm yu nkôni! Yu nkôni ta njoṅ ntshùa ndu'. Tsho labinda num ndamte mbwô neshu ntshùa njoṅ mfèt nelamte fa.

¹¹Nzwi àm ze me ka, nkub ntshu mu num nabte ṅwa'a. Ṅwa' bo mbùn num tun lém su. Njwèt nzwe tsho b'a mba njwèt Liban nà.

¹²Mfèl àm ze mènnzwi, nzwi àm ze me ka, o b'a mba ta' nka' ze bo fùn nà. O b'a mba ta' tôntse se bo fùn nà, mba ta' tumnsi ntse mi bo tam màkwa bwe là.

¹³Nà num mbe num nkaṅ mi, ntù mub nke ndamte neshu; tsinkém bo tshame.

¹⁴Tsham bo safran, kub ntù nelamte bo kinamo, mba njoṅ ntù fa mi a num mfà tshu nelamte là; mire bo aloès boa njoṅ mfèt nelamte mi ntùn fa.

¹⁵O b'a tumnsi ntse netèt ba nka', mbe tôntse ntse ntùn, nta'ntse Liban.

¹⁶Ménngon bùnte ndù: Lo nsi me fetmbaṅ z'a swe' tu, kù nde nse' me fetmbaṅ z'a se' mfùag ntèn, fette ntùm nka' àm, ndù njwèt labinda tshàm lam njoṅ dù' fa. A bwô ndù nshun àm tsho ntùm nka' i, njù ntàm tù nelamte mi a bwe là.