Read Medumba Nkwi Nkwi 5 Bible Online

Nkwi Nkwi 5 - Medumba bible

Nkwi Nkwi 5

¹Ménnshum bùnte ndù: Mfèl àm ze mènnzwi, nzwi àm ze me ka, me tsho ntùm nka' àm. Me kàb mire, ndo' mfèt nelamte. Me tshwèt njù sàm kub ṅwa' bo yàm ṅwa'a. Me tshwèt nu màm ndu' bo màm mbùn. Shun tshàm, bin jù, nu, mbum nkôni.

²Ménngon bùnte ndù: Me lo ke nzi, là ntù àm nke nzi tshùalo. nju' nze nshun àm, a nke nke'te nzendà, nke ntshob ndù: Mfèl àm ze mènnzwi, mbe nshun àm, ghab nzendà me là. O b'a yàm bwoṅsaṅ z'a bwô miagte là! Nummbe meme' fim tu àm fa. Nyiaṅtu tshàm tse me ba' là dun ntàm ntse mi a lo mbe njam nà.

³Là me bùnte yi ndù: Me lo nsô kum sàm, me nsi bèn ma' i num àm à ndùke? Me lo nsôg nku màm, me nsi bèn sagte yub à ndùke?

⁴Nshun àm lo tshag bu i tôndà, ndùlala ntù àm nke ntam num i.

⁵Me lo nsi num neghab nzendà nshun àm. Mire ké mum mbu màm, mire swe' num ntu mbu màm naṅ num tu fùnndà.

⁶Me lo ghab nzendà nshun àm; là njen ndù nshun àm nène, njen ndù a bi nsi. Ndùs'a ke ntshob me là, wul àm ke bèn mb'a bu àm. Me lo diag i, là ke fon i. Me lo tsiaṅ i, là a ke bùnte me.

⁷Ghabéb dù' tse bo num nzinte ntùm ngô là lo yen àm. Bo lo lab àm, nkag mfaṅ num àm. Bo bù' nzwe tu àm, me tshob à ghabéb nkum kàb.

⁸Ngonngon Yérusalém, me le'te zine, a be ze bin yen nshun àm nà, bin tshob yi ndù ntù àm a' kwù nkôni num i.

⁹Ngonngon bètte ndù: Wù mènnzwi z'o bwô ntshùa tsemo' bènnzwi là, ke ze nshun o ghù ntshùa tsemo' bandum à? A tshùa yub num zit nu k'o nke nde'te yag num i ndù à?

¹⁰Ménngon bùnte ndù: Nshun àm bwô, nzitte; bo ghù neyen i tù' i netèt ben ntsha' gham.

¹¹Tu i b'a mba gol mebwô là. Nyiaṅtu tse b'a mba tshaten nà, nsènte mba mfe manywin mbù là.

¹²Miag mi b'a mba ba bwoṅsaṅ nà num nkaṅ nta'ntse. Tshen bwoṅsaṅ nà num nke nsôg wut yub ntùm mbùn, nke mfite tshob ntùm fu'.

¹³Nge' mi b'a mba ta' nka' ze nsàm nenà be bwe là, ta' dù' ze nsàm nenà nelamte yàm bwe là. Nkub ntshu mi b'a mba nsàm nenà mi a num mfà labinda là.

¹⁴Nkwa gol dun mum mbu mi, ndù bo lo' ndoṅ tanjoṅ nabte yi. Wul i b'a mba nsô nsennyàm fôgtab ze bo lo' safir nabt'é yi là.

¹⁵Ntammbwe mi tswe à mba ba ntom ndoṅ mintsin mi bo te num tun tse ts'a b'a gol mebwô là. A bwô ntshùa ba sédra fa.

¹⁶Ntshu i dun mbétni, njoṅ wul i fa dun batte. Ngonngon Yérusalém, tshù mba nshun àm be là, tshù mba kôntù àm be là.