Read Medumba Nkwi Nkwi 6 Bible Online

Nkwi Nkwi 6 - Medumba bible

Nkwi Nkwi 6

¹Ngonngon bètte ndù: Mènnzwi z'a bwô ntshùa tsemo' bènnzwi, nshun o nèn à kua' yà? Nshun o nèn à zit bag à? Soṅ yag bag bin a' diag i wù.

²Ménngon bùnte ndù: Nshun àm swe' nèn ntùm nka' i, A b'a nka' ba mfèt nelamte, num neke nkém ze bwoṅ nyàm ntùm ba nka', mba ndù a kàb ba kanyam.

³Nshun àm bèn ngù àm, tu wul àm bèn ngù yàm nshun àm. A be nkém ze bwoṅ nyàm netèt ba kanyam.

⁴Ménnshum bùnte ndù: Nshun àm ze mènnzwi, o bwô à mba tusô Tirtsa là, mbwô à mba tusô Yérusalém nà; là nkuni à mba bwoṅ soyé tse bo tete yub tù mba kàb njam ntshètntsho mub là.

⁵Tsho' miag mu num àm, nummb'a tshwèt ngù tu àm mva'a. Nyiaṅtu tsho b'a mba ta' bwoṅ mbwe tse bo taṅte yub mbaṅ mbat Galad là.

⁶Nsô mu fôg à mba ta' bwoṅ njùmbwe tse bo tshwèt nke nko' mfe dù' nenu ntse là. Njoṅ yub fa ghù à bonfag. Mba ze ntshù' netèt bo ke' be kebwe.

⁷Nge' mu b'a mba ta' bag tàm ju là njam nzwe z'o ma' tu o là.

⁸Ba màbwengub num nsi ṅam ntôge, ngù bènnzwi ṅam fom tse bo b'a màndà tshàm nà. Bontshab ngonngon num nsi ndù bo gha' mbu.

⁹Là, ta' i ntshù' bèn mbe yàm bwoṅsaṅe, z'a bwô nja' là. A be màab à nda' tù' i. Mènnzwi z'a bwe i là num nkô i neshu. Bontshab ngonngon num mbe yen i ntsiaṅ i ngafen. Ba màbwengub boa bènnzwi màndà num mbe yen i nyàmt'é yub tu wut.

¹⁰A we là z'a tshwèt ṅwag mba mfôgnjù à? A bwô à mba maṅwù là, ndàn à mba lagnyam nà. a kuni a mba bwoṅ soyé tse bo tete yub tù mba kàb njam ntshètntsho mub là.

¹¹Me lo swe' nèn ntùm nka' ntù sàb, num neyen nenàfi z'a kàb tômbo' là, num nelôte mbe ze ntù ndu' bit là, mbe ze ntù neyàm ntàm sàm nà.

¹²Me lo ke lèn, là yàm nekù ntù ma' àm bwe, netèt nkalig mèn ndùb z'a netèt yàm nzwit mèn nà.