Read Medumba Nkwi Nkwi 7 Bible Online

Nkwi Nkwi 7 - Medumba bible

Nkwi Nkwi 7

¹Ngonngon tsiaṅ i ntshob ndù: Bèn nse'e, bèn nse' me ngon Sulam. Bèn nse', bèn nse' bag lôt'o. Ménnshum bètte yub ndù: Ke ze bin lôte num ngon Sulam, mb'a b'a ta' ju nenyiaṅ ze bo tshwèt mbam kwi se ndaṅ mbàa à?

²Ménnshum tshob ménngon ndù: Nku mu nebwô ntùm nketo' mu ngon mfen! Zwe' o diaṅ mbum à mba nta' ntshwèn nà, fa' mbu ntùm mbu ta' ngave.

³Tô su b'a ta' ntu' z'a diaṅ mbum nà. Ndu' nelamte ke' be tag bwe. Wul o b'a mba tse ngefet ze kanyam diaṅ i mbum nà.

⁴Mbùn mu mbàa b'a mba ngabnyàm bàa là, mba bonfag ta' njuanyàm nà.

⁵Kekol o b'a mba tuba' nsô nsennyàm nà. Miag mu b'a mba ba diaṅnkat ntse Hesbon, z'a be mbaṅ nzendà Bat-Rabbim nà. Ntselag o b'a mba tuba' Liban z'a be ndôte Damas là.

⁶Tu o sag nèn tù à mba mbat Karmél là. Nyiaṅtu tsho ts'o ba' là b'a mba nzwe meba là. Nyiaṅ ts'o ba' tu o là num ngom ta' mfen mba ngandàtsha là.

⁷Yàm nkôni, mi'i, o bwô! O bwô neshu netèt mfu' mi o be netèt bwe là!

⁸Ntse wul o b'a njoṅ tene, mbùn mu be mba tu mba là.

⁹Me tshob ndù: Me nsi ko' num tene, tshùb mbu tene. A bwô ndù mbùn mu b'a mba tsha tù ndu' là. A bwô njwèt ntshu mu be mba mi tshom nà.

¹⁰A bwô ndù ntshu o be mba ndu' nelamte là, ménngon bùnte ndù: Men ndu' là ke ntshùm mebwô à num nshun àm. Ndu' là num nswe' num nkub ntshu mi mba mfé' nsô mi.

¹¹Nshun àm bèn ngù àm. Ntù i be nkù num àm.

¹²Nshun àm, se' be tum nkatte mà fèn. Be tswe ntùm ngô.

¹³Njù a' yoṅ mbe làn be nèn ntùm nà ntù ndu'. Be a' yen mbe ze tù ndu' sàm nà, mbe ze ntàm mi to' nefi' là. A be ze ntù ntàm sàm nà. A be ndùlala mba m'a' fà nkôni àm wù bwe.

¹⁴Ba ntàm tù nkôni tshwèt nsa labinda yub, be ghù njoṅ ntàm mub mi ntùn fa nzendà be. Mi nswe boa mi njwèn, nshun àm, me na' ndé' njoṅ i fa à wù.