Read Medumba Nkwi Nkwi 8 Bible Online

Nkwi Nkwi 8 - Medumba bible

Nkwi Nkwi 8

¹Wé! O lo mb'a mfèl àm, mbùn màa bèn nyô o mb'a bwô àm be... Mb'a be be bumte ntshundà, me tsiag o tshàm, yen nu là ke lo' tshabte nse' yi.

²Mb'a be me netshagt'o, ndo' o nèn yi ntùm ndà màa. O nsi fà mu ntag me, tu wul àm fà ndu' nelamte wù, fà mfèt mi a tum num màm nsàb là wù.

³A bwô ndù bu nshun àm ze kwéb be njam tu àm, bu i ze zwim tat'àm.

⁴Ngonngon Yérusalém, me kàn mfe, kà bin kamte, kà bin kamte nkôni nsi, ke be ndù nkôni yoṅ ndo nsi.

⁵Ngonngon bùnte ndù: A zit mènnzwi z'a tshwèt nswe' mfe kônkwa ndù a ṅat num nshun i à? Ménnshum bùnte nshun i ze mènnzwi ndù: Me lo bam o num miaglo tun tshom. Màan na' mbwe o à bwe. A bwe là z'a bwe o là, o na' njen njù à bwe.

⁶Te àm num ntù o mba màkwa là, te àm num bu o mba màkwa là. Nummbe nkôni ta ndaṅndaṅ mba vù là; ndù be mèn ke tum bwe. Lànghe' be nkù à mba mbwôg Tshùaben nà.

⁷Ntse ndùbndùb ke' ku'ni nebiagte nkôni. Nta'ntse ke' ghù nekel i nèn yi. Mèn fà be njoṅ tshu fa ts'a ndà i là nelo' njun nkôni yi, mba ng'é soṅ à wag nso num tu wul i, bo bèn ntshabt'é.

⁸Ngonngon tshob ndù: Be ghù mo' metshab mfèt be ze mènnzwi, ndù mbùn ke' yoṅ mbèt ntù i. Be nsi ghù mfèt be ze mènnzwi à ndùke lé'njù se bo nsi diag i l'à?

⁹A be z'a b'a ta' kumba' là, mba be nsi lo' silba kut dù' yi num i. A be z'a b'a nzendà là, mba be nsi lo' ntshwèn sédra kom ghabndà i yi.

¹⁰Metshab mènnzwi là tshob ndù: Me b'a kumba', mbùn màm b'a mba ba tuba' là. Me na' mbe num miag mi à mba mènnzwi z'a fon fite là.

¹¹Salomon lo ghù ta' nà ntù ndu' Baal-Hamon. A lo fà nà ntù ndu' ghabéb dù'. Mba zit lo nke mfà ndô nkàb silba ntsha' mbùm num ju a tum ntùm nà là.

¹²Tu wul àm me bèn béb nà ntù ndu' z'a be yàm nà. Salomon tshù ndô nkàb silba ntsha' mbùm nà, ngù tse nkù bàa num ben tse bo be mbéb ntàm tù là.

¹³Ménnshum tshob ndù: Mènnzwi z'a be ntswe ntùm ba nka' là, shunshun tshwèt nkù' ntoṅ num nz'o. A bwô ndù o ghù me ju' nz'o.

¹⁴Ménngon bùnte ndù: Nshun àm, kù! Be mba njuanyàm ke mba metshab kwinyàm no là, num tu ba mbat tse mfèt nelamte be bwe là.