Read Medumba Esaya 1 Bible Online

Esaya 1 - Medumba bible

Esaya 1

¹Njem ze ngatshob ntshob Nsi Esaya nshum Amots yen num Yuda bo Yérusalém nà. A na' mb'a num ze ngelaṅ Ozias, Yotam, Akaz bo Ezékia fenfen Yuda.

²Kamànyam ju'u, tsha' kù' ntoṅ, nummb'a b'a Tshùaben bèn nke ntshobe: Me lo kém bon, nkwiagte yube, là tu wut tshob lo nsi num àm.

³Nyàmna' ke ndèn mèn z'a ghù i là, kekwèn nke ndèn nka' tàab z'a ghù i là. Là Israél ke' lèn sàm ju, yàm nzwit mèn ke' be ju' sàm ju.

⁴Nge' tu ngô z'a be ngù nukebwô là, nge' tu nzwit mèn z'a be mfètte lem nà, nge' tu nzwit ghatshùagntù là, nge' tu bon tse bo sagte wut tshob là. Bo ghua' Tshùaben, ngwag i, yi z'a b'a Nsi Israél z'a be Mèn Nelàn nà. Bo lo' mvèn yub ntam i yi.

⁵Be bo bèn ndab zin a num ke, ndùse bin tshwèt nke nta be tu nèn mbwe à? Tu tsin fa tshwèt ngone, ntù tsin fa nke njen nge'.

⁶Neto' num tu zin nèn nkum num nku min, sàm dù' ntùn ke bwe. Ba mfaṅ, ba nesete dù' num mèn boa nkeko' mi a tshwèt ntum lem nà. Bo ke' tshwinte men nkeko' là, ke kut, ke yab mfèt bwe.

⁷Bo sate ngô zine, nton ntusô mine, ghakeban tshwèt mbagte nda' min num miag mine. Bo ke mbagte dù', nke nsate dù' à mba ba tum, ghayab nge' là.

⁸Ngô Yérusalém tù' à ndaṅndaṅ mba ntàb z'a be ntùm nà ndu', mbèn mbe mba dù' netswe bwe ntùm nà bo' là. A tswe a mba ngô ze bo ke' kabt'é là.

⁹Tshùaben tàndà ntsho na' mbe ke lem metsit tshé' benntùn mba be lo fut'a Sodom, mba be lo fut'a Gomora tse bo na' nsate yub koṅkoṅ nà.

¹⁰Fenfen ngô, bin tse bin b'a mba fenfen Sodom nà, bin ju' ntshob Tshùaben. Ngô, bin tse bin b'a mba ba Gomora là, bin kù' ntoṅ nju' ntshù' Nsi yag.

¹¹Tshùaben tshob ndù: Me nsi lo' tshule'te tsin tse yàm ghù a ke yi à? Me ywèt nkomnjù mi bin be nton me là, ywèt nzit mfô. Me ke' be ṅwate num lem mfot mfô, ke ṅwate num lem ba mbwe ke mfot mbwe lo.

¹²We z'a be mbam bin ndù bin se' mbwe àm, nyiaṅte bam ntshundà tshàm nku à?

¹³Bin tsin nelo' tshule'te tse banban nse' yi mbwe àm, tshu nelamte tse bin be nse' yi mbwe àm nà bag àm. Ba jùa ntshùa ṅwù, ba jùa Sabbat boa mbumte b'a numke? Be me ke bam mbe nukebwô tamte boa njùa.

¹⁴Ntù àm gha min njùa ntshùa ṅwù boa njoṅ min njùa fa. A ke mi mbe't'àm à banban.

¹⁵A num mbe ndùse bin shù mbu min me là, me kaṅ se àm. Bin le't'àm a yàm be ndùke lo mba me ke nsi ju'u. Lem gha' mbu ntùm mbu mine.

¹⁶Bin sôg ndàne, bin lo' tshùagntù z'a ntù bin nà ndo yi num miag màm. Bin tsin neke ngù nukebwô.

¹⁷Bin zi'te neghù numebwô, nke ndiag nu z'a tsin nà. Bin kabte mèn bo tshwèt mfétt'é là; bin ghù nu ndaṅndaṅ ménntse, nkabte mfôg mènnzwi.

¹⁸Tshùaben tshob ndù: Bin se' bag bin tsho'te l'à? A be ze nukebwô tsin sèn mba kekimbwôg là, mb'a nsi fôg mba mbem nà, a be z'a ba mba bù là, mb'a nsi fôg mba ndeb là.

¹⁹A be ze bin kô, nju' ntshu là, mba bin nsi jù tshu ntùn ts'a tum ntùm ngô là.

²⁰Là, a be ze bin gha, nke nta be tu là, mba bo nsi lo' ṅwi watte zin yi, nummbe Tshùaben bèn ntshob ndùlala.

²¹A tshùa à ndùke kà ngô z'a ke nju' ntshu ntù' kattù mènnzwi à? Nu ndaṅndaṅ lo ke mbe bwe, nunetsin nke ntswe bwe. Là ndonni ghafètte lem se ka bwe.

²²Yu silba tù' à mba nga' tùn z'a bétte num tùn bangùa jù i là. Bo lo' ntse mbwete ndu' mu yi.

²³Fenfen tsho b'a ghatatu, mbe shun ba tshô. Njoṅ yub fa num nkô ju banban, nke nkwé nda' neshu. Bo ke' be ghù nu ndaṅndaṅ ménntse, ke bam ndù bo tshob ze nu mfôg mènnzwi mbwe bo.

²⁴A ndùlala, tshù ju ze Tshùaben Nsi tàndà ntsho, ze nduku Israél tshob li: M'a' yagte mba' ghamaṅt'àm, m'a' yab nge' num ghakeban tshàm.

²⁵Me nsi bù' bu àm nsi num o, ton o mbwôg mba tùn nà kà bangùa tsho' num o fa, me bétte njoṅ i fa ma' nsi.

²⁶Me nsi ghù tsho ghatsho'te be mba tse mbwe là, ghù tsho ghafà ntag be mba tse mbwe, tà fe neto'te là. A nsi tshùa ndùlala bo tsiaṅ o ngô nunetsine, ngô z'a be nju' ntshu là.

²⁷Bo nsi lo' nu ndaṅndaṅ tshu' Sion yi, bo nsi lo' nunetsin yôg ben bo nsi kaṅ ntù yub là yi bwe.

²⁸Là, bo nsi biagte ghatatu boa ben kebwô; ben tse bo ghua' Tshùaben nà nsi kwùte fa.

²⁹Bin nsi bam me ze kedi num ntù ntshalon mi bin num njab ntù tsin bwe là. Bin nsi bèn bam me ze kedi mba num nka' tse bin be ngag ntùm bwe là.

³⁰Nummbe bin nsi b'a mba ntshalon mi mfu mi tsho'o, be mba nka' tse ntse mi ntùm bwe là.

³¹Mèn neta nsi kù boa mfa' mi ndaṅndaṅ mba ntshé' ze mbwôg vù bwe num nkù là. Sàm mèn ke nsi tum biagt'é.