Read Medumba Esaya 11 Bible Online

Esaya 11 - Medumba bible

Esaya 11

¹Tshù, mo' ta' bu tù nsi tum num Isaï, mo' tob tù bit num nga tse.

²Ywèt Tshùaben nsi tswe num i: Ywèt zenu bo nesiaṅte, ywèt ntag bo neta, ywèt nelèn bo nebwôg Tshùaben.

³Nebwôg Tshùaben nsi tshot'é; a ke nsi tsho't'a num mbaṅ wut mèn, ke keb ntsha num mb'a ju' bo tshob là

⁴là, a nsi tsho'te ben nebol à ntùm netsine, ghù nu ndaṅndaṅ bwoṅbwoṅ tse bo num nsitsha' là. A nsi lo' ntshob mi lab nsitsha' yi mba shua' là, lo' fet nkub ntshu mi zwite ghatshùagntù yi.

⁵Nunetsin b'a kob s'a nsi taṅ num mfat mi là, nunenùn be kob s'a nsi taṅ zwe' i là.

⁶Mbù tshwèt nsi tam dù'ntswe bo njùmbwe, nzwimàntô bo mén mbwe ke nô dù' ntshù'. Mén mfô, mén ngwayit boa nyàm tse bo kag yub là nsi tam dù'ntswe, metsit ménfi ke ntshagte yube.

⁷Mfô bo ṅaṅom nsi tamte fèl à dù' ntshù', bon tshob ke nzi ndà ntshù'; fèt nyi'nga.

⁸Mén z'a be num bùn nà nsi ghù sa ntshu ntô nyu, mén ze bo tsho' i bùn nà yab bu i ntùm ntô swenyu.

⁹Mo' kebwô ke bintàn no ke nsi be, num njoṅ yàm mbat ze nelàn fa. Nummbe nelèn Tshùaben nsi dun num nsitsha', ndaṅndaṅ mba ntse be ndun dibantse là.

¹⁰Bu tù Isaï nsi be num sen lé'njù l'à mba keki ze bo te ngôngô là. Ntumntum nsi kaṅ wut ke lôt'é. Nkuni nsi bèn be ze dù'ntswe.

¹¹Num yen ngelaṅ nà, Tshùaben nsi bèn nyit bu i, tshu' tshé' ben tse bo sate nèn Asiria bo Egipto, Patros bo Etiopia, Elam, Shinear, mba Hamat, mba ngô tètntse ts'a be num dibantse là.

¹²A nsi te ta' keki tù mum ngôngô, kùmte ba Israél tse bo kù la' là, tse'te ba Yuda tse bo sate là, num bag njù kuà fa.

¹³Là, ghe'te Efraim nsi bèn nsi, ghakeban Yuda bi nsi; Efraim ke nsi bèn ghù ghe'te num Yuda, Yuda be ke bèn mbe ngakeban Efraim.

¹⁴Bo nsi tsho' fe dut num nkembe' ba Filistia tse bo mbinyam nà; bo nsi lag ntsha' bon ntumnyam. Bo nsi kab mbu num Edom bo Moab. Bon Ammon nsi ju' ntshu yube.

¹⁵Tshùaben nsi lo' fet ywèt ntshu tse ts'a ta neshu là nyiaṅte ku dibantse Egipto yi; a nsi nyit bu i tshag num ta'ntse Efrat; ghabt'é a tum nku ntse sammbàa, kà benntùn ku'ni nedut bwe nku.

¹⁶Manze nsi tsho' tshé' ben tse tse bo tum Asiria là, ndaṅndaṅ mba manze na' ntsho' Israél, lé'njù s'a na' ntum Egipto là.