Read Medumba Esaya 21 Bible Online

Esaya 21 - Medumba bible

Esaya 21

¹Ntshob Nsi num kônkwa dibantse. A tshwèt mfe num kônkwa nse'e, mfe à num mo' nduku bag ngô là, nke nse' à mba tonkèt fetmbaṅ z'a ke nsate dù' mà ntèn nà.

²Me lo yen mo' kuni njem: Ngafùte tshwèt ndo' fùte ngù nu yi, ngasate dù' nke nsate. Elam, ko'o, ze Media, kab mbu num i. Me nsi ghù netsham zwe fa tsine.

³A ndùlala ya keb zwe' àm, nge' tshùb àm, ngom àm à mba lèn z'a be ngom mènnzwi ndùs'a tshwèt ndùbte là.

⁴Nge' zwiaṅt'àm, bwôg tshùb àm. Tèttswe' z'a ke mfà tsiaṅte me là tù' ke nkuni àm à nekuni.

⁵Bo nabte téblé, ma' nzwe bwe, njù, nu; ngelaṅ be ku'u, ta' nze tshob ndù: tàndà ntsho, bin lo nsi, nabte tshuntsho.

⁶Tshù ju ze Tshùaben tshob me li: Nèn nte ntom, a ke nsoṅ o ju z'a nsi yen nà.

⁷A yen bwoṅ ghako' nyàm, ghako' nyàmdiaṅe, bà bàa, ghako' num kekwène, ghako' num ba kamél. A lôte mebwô, mbèn ndôte kua' mebwô neshu.

⁸Ndùlala, a kua' neta mba ngwayit là, ntshob ndù: Tshùaben, me lo ntsin dù' ze me lem nà njoṅ mbwôgtshù fa, ntsin dù' ze me be bwe nke ndôte dù' là njoṅ tèttswe' fa.

⁹Tshù bwoṅ ghako' nyàm ni bo se' là, ghako' nyàm b'a bà bàa. Ndùlal'a bùnte, ntshob ndù: Babilon vù, a vù, njoṅ neta nsi tse fa là tse bo be'te ma' nsi là.

¹⁰Yàm nzwit mèn, bo tsham ndaṅndaṅ mba bo num ntsham lag nsa dù' netsham nsa là. Ju ze me na' nju' Tshùaben tàndà ntsho, Nsi Israél là, a yi là ze me soṅ o là.

¹¹Ntshob Nsi num Duma. Bo tsin Seir nkua' ntshob me ndù: Ntom, tèttswe' yà? Ntom, tèttswe' yà?

¹²Ntom bùnte ndù: Njù là à tshwèt ndàn nà, mbe ndù mba njam tshwèt nse'e. A be ze bin kô nebètte là, bin bètte. Bin kaṅ ntù tsine, mbèn njam.

¹³Ntshob Nsi num Arabia. Bwoṅ ba Dedan, bin nsi zi ntùm nkeba' ts'a Arabia là.

¹⁴A bwô ndù ba Téma lo' ntse nse' mfà ben ntù tshob kù là. Bin nèn mfà ghakùla'.

¹⁵Nummbe bo ke nkù à ṅwi, ṅwi ze bo sô mbàn nà; bo ke nkù à ngoṅkét ze bo dù' là, nke nkù à neta ntsho.

¹⁶Nummbe Tshùaben tshob me ndù: A bèn ntù' ngu'njù ntshù', ze bo siaṅt'a num ze ngu'njù ngalo' nkàb ṅwù là, ze nufen Kedar tsin ze ndùlala là;

¹⁷tse neta ghakwé mbwe, tse bo b'a nshumnshum Kedar là nsi tù' à kua' nda' metsili là. A b'a Tshùaben, Nsi Israél bèn ntshob ndùlala.