Read Medumba Esaya 22 Bible Online

Esaya 22 - Medumba bible

Esaya 22

¹Ntshob Nsi num tômbo' njem. A b'a ndùke kà ben tsho nke nko' num ntumba',

²tusô tshu'te, tusô ntanta bo tusô tsiaṅt'à? Bo ke' lo' ṅwi ngwat fe ben tsho yi, bo ke' bèn nekwù à tshwèt ntsho.

³Fenfen tsho kù à ku ntshù', ke be ndù bo yoṅ ma' két; bo lo' yub ngù ghandàtsha yi. Njoṅ ba la' tsho tù' à kuan ntsho, mba mba bo tshwèt nkù nèn nesà là.

⁴A ndùlala me tshob ndù: Bin tsho' lag sin num àm. Bin faṅ àm nà, me làn wul àm. Ntùm zwe. Kà bin saṅlaṅ num netag àm, num mba tusô yàm zwit mèn tù' à fam nà.

⁵Ṅ, a lé'njù tshu'tu, lé'njù nge' bo lé'njù tuswe. Tshùaben tàndà ntsho bèn ntum sen lé'njù là tômbo' ba njem. Bo tshwèt nsate ba kàbngô, bo nke nju' nkua' nge' tà mfe num mbale.

⁶Elam ket ntsha' nkét, nkalig ntsho, ghako' nyàm nke nkù nse'e. Kir ké'te tshètntsho.

⁷Nkalig dun ntùm mbwô mbwô ntusô mu, ghako' nyàm tsinte nka num nzendà tsho.

⁸Bo tsho' miagte fet ts'a ke ntshètte Yuda là. O tshwèt ntsha' tshu ntsho ts'a be ntùm ba' fèn nà.

⁹Bin tshwèt nke ndôte mfa yàm mi bo kebte num tusô David là, nke ndette ntse mi a tum ntùm diaṅnkat ntse mi a be mà tun nà.

¹⁰Bin tshwèt nsiaṅ mba' mi a Yérusalém nà, mbe'te men mba' là nelo' ntomte kàbngô yi a ta.

¹¹Bin tshwèt nabte dù' nenaṅ ntse bwe netèt kumba' bàa, num nenaṅ ntse njwèn diaṅnkat ntse bwe. Là, bin ke tshwèt ndôte mèn z'a nabte tshen tshu là, ke lôte mèn z'a bam ndù tshen tshu là be fe ndùke lo là.

¹²Tshùaben tàndà ntsho tshwèt ntsiaṅ zin sènni; ndù bin se' ndàne, ndab ntù zine, nkom tu zin mbèn ntôg nke'bàm.

¹³Tshù ṅwate bo tsiaṅte li! Bo watte ba nyàmna', nzwite mbwe. Bo tshwèt mfèt mbàb, nke nu ndu': Bag bin jù mbèn nu, nummbe bag à bin nsi kwù ndamnjù.

¹⁴Tshùaben tàndà ntsho la'te yen nà me: Nga, bo ke nsi lagte yen nukebwô là bin, tà nkum ndùse bin nsi kwù là. Tshùaben Nsi, tàndà ntsho bèn ntshobe.

¹⁵Tshù mba Tshùaben Nsi tàndà ntsho tshob li: Nèn mbwe tshe' mfen nà, mbwe Shebna, ngalôte ntshwèt, ntshob yi ndù:

¹⁶Ke z'o ghù nsen ni, we z'o ghù nsen ni kà nke ntswe' fi nsen ni à? A tshwèt ntswe' fi se mfe num dù' mbù' mbù'ù, a tshwèt ntshu dù'ntswe ntùm gholoṅ.

¹⁷Yen mbe Tshùaben nsi ma' o mba loṅ nà kua' neta. A nsi lamt'o mba ndeb là.

¹⁸A nsi ghù o bwoṅte, mbwoṅte mba tàmtù se bo ma' là, num dù' tsha' ts'a gha'te là. O nsi kwù yen dù' là, nkalig mu mi a bwô ta là ghô bwe. Tshù, o kag tuswe num tunndà tàfa' o.

¹⁹Me nsi ta' o num ntshufa' o, Tshùaben nsi kwé yu dù' fa' mum mbu mu.

²⁰Me nsi tsiaṅ ngafa' àm Eliakim nshum Hilkija num sen lé'njù là.

²¹Me nsi lo' kum so ma' num i, lo' kob so taṅ tun i. Me nsi fà yu mba' fa mum mbu mi. A bèn be tà njoṅ ba Yérusalém fa, mba tà tunndà Yuda.

²²Me nsi so fùn tunndà David num nkembe' i. A be z'a tsho' là, mba sàm mèn ke nsi fùne, a be z'a fùn nà, mba sàm mèn ke nsi tsho'o.

²³Me nsi kwim i mba tùn nà num dù' ntùn. A nsi b'a diaṅkwa nkuni num tunndà tàab.

²⁴A nsi be ntom num njoṅ nkuni tunndà tàab, neto' num mbu ntù ntùn mba mfenyu' mbu ntù, neto' num njoṅ tshundà nke'nke' fa, ntu' mba nkab.

²⁵Bo nsi tsho' tùn se kwim num dù' ntùn nà sen lé'njù là. Tshùaben tàndà ntsho bèn ntshobe. Bo nsi be't'é a vù nsi, bo nsi sate lèt z'a ke mbe num i là, nummbe Tshùaben bèn ntshob ndùlala.