Read Medumba Esaya 23 Bible Online

Esaya 23 - Medumba bible

Esaya 23

¹Ntshob Nsi num Tiro. A bwô ndù bin làn wut tsin me nsitima Tarsis. Nummbe bo sate Tiro. Mba' ke' bèn mbe, nze netsho yi ke' bèn mbe. Tshô fe à ngô Kittim kà ntam toṅ bo.

²A bwô ndù bwôg ghù bin tù' ketshob me ba tswe nkaṅ ntse, bin tse ghatantàn ba Sidon ke ndun netèt bin, nke nzinte num dibantse là.

³A lo ke nzin num ntse ndùbndùb, nsa Nil, tshu tse bo sô ntùm ta'ntse là nke mbe bintàn yi. Tiro na' mb'a nze ntàn ngôngô.

⁴Sidon, a bwô tuswe ko o! Nummbe dibantse, ngô bo kut num dibantse là tshob ndù: Me ke tshwèt nju' ya, me ke' ghù mén, me ke' kém nguanmèn, ke kwiagte ngonngon.

⁵Ba Egipto nsi vètte ndùse bo nsi ju' tshô là, ndùse bo nsi ju' mbe Tiro vù là.

⁶Bin tshùa Tarsis ndàn wut tsin, me ba tswe nkaṅ ntse.

⁷A bèn mb'a sin tusô tsiaṅte mbit l'à? Ze tshô b'a kua' nkum njwèn tshô. Nku mi mi a sag là lo ke ndo' i nèn yi tà tum nesà.

⁸We z'a tàmte yen lèn nu li num Tiro à? Tiro z'a b'a ndot fen n'à? Tse ghantàn b'a fenfen, tse ghatantàn na' mbèn mbe ben bo ghù ju là mum njù nsitsha'a.

⁹A Tshùaben tàndà ntsho bèn ntàmte yen nu là, num nelo' nkôg ko'tewut mba ke lo z'a tshwèt nziag là yi, num nelo' nkag nyu' yi num ben ndùbndùb mum njù nsitsha'a.

¹⁰Ngon Tarsis, zinte ntùm ngô o kua' num ze mat ménla', zinte mba ntse Nil là, nummbe lèt ke' bèn mbe.

¹¹Tshùaben nyit bu i num dibantse. A ghù nufen nzenze vètte. A tshob mbe bo sate ngô tse bo kut Kanaan num netshèt njam ngô yi là.

¹²A tshob ndù: Kà netsiaṅte me ngon Sidon, nummbe bo tam tuswe num o. Lo nsi nèn nte Kittim. Mba we o ke nsi tswe fite.

¹³Tshù Kaldéa tse bo na' mbe ke b'a' ta' ngô njene: Asiria lo fà yub nyàm tshwèt num kônkwa. Tu wut yub kut dù' netsin bwe ntsha' ngô, mbèn nsate ze ntshwèt Asiria kà ndo' i ngù à fam yi.

¹⁴Bin làn wut tsin me nsitima Tarsis, nummbe bo sate min nkaṅ ntse mi bin kut là.

¹⁵Num yen ngelaṅ nà, bo nsi lagte Tiro num ngu'njù ṅam sammbàa. A b'a njoṅ ze ta' mfen be ntswe là. Ngu'njù ṅam sammbàa nsi be tôg a be num Tiro mb'a na' mbe num kattù mènnzwi ze bo be ntshob nu num i ntùm kwi là:

¹⁶Lo' loṅ nkatte tusô, wù kattù mènnzwi ze bo lagt'o là. Bu' loṅ mebwô, mbèn njob nkwi mu, ndù benntùn bèn nkwimt'o!

¹⁷Ngu'njù ṅam sammbàa nsi be tôg Tshùaben se' ndôte Tiro. Tiro nsi bèn num nkàbfa' i ze kebwô. A nsi kat boa njoṅ nufen fa nsitsha'a, num miag njù fa.

¹⁸Là, a nsi fà ze bin bo ze nkàbfa' Tshùaben. A ke nsi tse't'a netse'te, ke bèn ndé' à nelé'é; nummbe bin i nsi fà jujù yàm boa nzwe mebwô ben tse bo num njôg mbwe Tshùaben nà.