Read Medumba Esaya 24 Bible Online

Esaya 24 - Medumba bible

Esaya 24

¹Tshù Tshùaben nà z'a tshwèt nsate tsha'a, nke ndo' i nkàn kônkwa yi là. A kaṅ njam tsha'a, nkam ben tse bo be bwe là bo sate.

²Ngale'te bo ménla' b'a ju ntshù', tàfa' bo ngafa' b'a ju ntshù', màfa' bo ngafa' ze mènnzwi b'a ju ntshù', ngaswèn bo ngajun b'a ju ntshù', mèn z'a tshwèt nsô bàm i mfo mèn nà bo mèn z'a tshwèt nkwé là b'a ju ntshù', ngakùa bo mèn bo tshwèt nkùa yi là b'a ju ntshù'.

³Ngô sate fa, bo tshwèt ndag ntsha' ntùm ngô. A b'a nummbe Tshùaben bam yen nu là.

⁴Tsha' tshwèt nywine mbe ndù a yub. njù b'a ntùm ntobni, nke nsobni. Kamkam ngô b'a ndù mbu mub tshùaṅ.

⁵Ben tse bo be ntswe num tsha' là bagt'é, nummbe bo fàn ntshù', mbagte kàn, bo keb nkù s'a tswe matmat là.

⁶A ndùlala ze ndon se ka num nsitsha', ben tse bo be ntswe num tsha' nke nket nge' nukebwô tshob là. A ndùlala bèn ngù kà nge' nkù ben tse bo be ntswe num tsha' là. Nda' metsit bwoṅ benntùn bèn njôg netèt bo tà nke' tù ntùn.

⁷Ndu' nswe tshwèt ṅà, ntù ndu' yub tshwèt fa. Njoṅ benntùn fa tse ntù tshob ke ntsiaṅte là tshwèt ntsham zwe.

⁸Nze ndam tsiaṅte ts'a ke ntshob là tsin. Ṅwate ze benntùn ke ntshu'te ntùm bwe là ke' bèn mbe, nze loṅ tsiaṅte se bo ke mbu' là ke' bèn mbe.

⁹Bo ke tshwèt mbe nu ndu' mbèn nke njob kwi, nummbe neta ndu' ke nzwe ntshu ghanu à nezwe.

¹⁰Bo sate tusô s'a b'a kônkwa ndonni là. Bo fùn mba' fa, ndù kà mèn bèn nku'ni netsho bwe.

¹¹Bo tshwèt nke nkua' num ba manze, nummbe ndu' ke' bèn mbe. Njoṅ tsiaṅte fa mi. Neṅwate mi ze num nsitsha' ndùlala.

¹²Nesate dù' se ka ntùm tusô, nzendà tse bo be'te là vùte nsi, dù' tù' à fam.

¹³Nummb'a nsi be netèt benntùn num nsitsha' à mb'a be mbe ndùse bo nyi'te tù mbatsi là, mba ndùse bo be ndénte ntsha' tshom ndùse bo yà kab tshom nà.

¹⁴Bo tshag nze yub tù, nke njob kwi tsiaṅte; bo tsin num nkaṅ dibantse ngamte nkuni Tshùaben.

¹⁵Bin ghamte Tshùaben ntùm dù' tse nka' tshwèt nké' bwe là, bin ghamte lén Tshùaben, Nsi Israél ntùm ngô ts'a be dibantse là!

¹⁶Bag tshwèt ntswe num tôg tsha' nke nju' bo nke njob ntshob ndù: Ghamte be mèn netsine. Là, tu wul àm me tshob ndù: Me kwù là, me kwù là, njennge' mba me là! Ghalag ntsha' tshwèt ndag ntsha'. Ghalag ntsha' tsho' ngwù num ntsha'.

¹⁷Bwôg, ghem bo nkù num num ménla'!

¹⁸Mèn z'a kù mbwe nkua' bwôg là vù ntùm gheme, mèn z'a tshwèt nko' ntùm ghem nà vù ntùm nkù; nummbe ntôndà mi à mfe kamànyam nà tsho' nte nge, tun tsha' kam nke nyi'te.

¹⁹Tsha' kebte, tsha' be'te, tsha' tshwèt mvètte.

²⁰Tsha' tshwèt mvètte mba ta' mbum ndu' là, nke ntshùm mba ta' ntàb là, nukebwô tshwèt ndèt num i, a nsi vù nsi, be ke bèn nelo.

²¹Tshùaben nsi naṅ ntsha tu ntshu ntsho mfe kamànyam, naṅ ntsha tu fenfen nsitsha' num yen ngelaṅ nà.

²²Bo nsi tse'te yub kuan ntsho là so ntùm ta' ndàtsha. Bo nsi so yub ntùm ndà njame, a be tôg mo' mbe' yàm lé'njù bo se' naṅ ntsha tu bo.

²³Tuswe nsi kabte maṅwù, tuswe ko lagnyam; nummbe Tshùaben tàndà ntsho nsi tô num mbat Sion mba Yérusalém, ke kuni ntùm ghamte mbwe tse ghakwé mbwe.