Read Medumba Esaya 28 Bible Online

Esaya 28 - Medumba bible

Esaya 28

¹Nge' tu ba Efraim tse bo be tusô Samaria là. Mbwô tusô sob b'a mfe num tu tômbo' se tsha' tse bwô là. Là, bo ke ngù à mba ghabum ndu' tse bo te ndot fen tu bo ndù nsàm mi tsho'te fa là.

²Tshù, ta' neta mèn, nga ngù' tshwèt ntshùa njam Tshùaben nke nse'e. A b'a mba ta' neta fetmbaṅ nywinmbaṅ be ntùm bwe là, mba tonkèt fetmbaṅ z'a tshwèt nsate dù' là, mba tonkèt fetmbaṅ z'a tshwèt ntèn ntu' ntse nse' yi là. A tshwèt ngù ndot fen yub nke ngwù num tsha' a neta neta.

³Bo nsi nyiaṅte ndot fen ghabum ndu' ba Efraim nku,

⁴mba nsàm nenà mi a tsho' num ndot yub naṅ nsi, z'a be ngù a nke nziag là; yen nà nsi b'a mfe num tu tômbo' se tsha' tse bwô là. A nsi be num i mba mbatsi z'a nànte ntswe là, bo num njoṅ mbe yen i, njoṅ nkàbe, a yoṅ mbe kum bu mèn, ng'é yoṅ njù be ndende.

⁵Tshùaben tàndà ntsho nsi b'a ndot fen neziage, be ju kwi wut ze mebwô num sen lé'njù là. A nsi be ndùlala num tshé' ze nzwit mèn.

⁶A b'a ywèt nunetsin num mèn z'a tswe num diaṅ kam nà, mbe neta ben tse bo tshwèt ntèn ghakeban nke ntshag njù là.

⁷Là, mba ba Yérusalém be yub à mba ghabum ndu', nke ngwù bag bag, neta ndu' tshwèt nshùmte miag mube, ghale'te boa ghatshob ntshob Nsi b'a ntùm neta ndu' nke ngwù bag bag, ndu' lo' yub fa. Neta ndu' ghù miag mub nke nshùmte. Bo tshwèt mbe tshob ntshob Nsi nke ngwù bag bag, mbe keb ntsha nke ntiage.

⁸Bo ywi' tshu kebwô nzenze num ntéblé, sàm dù' ntùn ke' bèn mbe.

⁹Bo tshabte Esaya ntshob ndù: A tswite zenu à we? A zi't'a we tshu ts'a bwô nezi't'à? A zi't'a bon tse bo lo netsho' yub bùn nà yi ké? bon tse bo yôg nelo num bùn nà ké?

¹⁰Nummbe ze tu b'a nefà ntshù' num ntshù', mfà ntshù' num ntshù', njab kàn num kàn, njab kàn num kàn, ndo' meju i nsen ni, ndo' meju i nsen nà.

¹¹Mb'a b'a ndùlala, Tshùaben nsi tshùa njam ben tse nkub ntshu lèle, ntshob mub ke tshùa neju'u, bo be mfàm nà kà tshob nu yen nzwit mèn ni.

¹²Nsi lo ke ntshob bo ndù: Tshù fite li, faṅ mèn z'a bot là ndù a fite; tshù dù' fite li! là, bo ke kô neju' mb'a tshob là.

¹³Mba yub tu là, ntshob Tshùaben nsi ke b'a be ntshù' num ntshù', ntshù' num ntshù', kàn num kàn, kàn num kàn, ndo' meju i nsen ni, ndo' meju i nsen nà. Ndùlala ndù bo be zin mbùn ngwù nsi njamnjam, mbe'te wut yub, mba ndù nkù tamte yub ngome.

¹⁴Ghatshabte, bin ju' ntshobe! Bin tse bin be ntswe Yérusalém nke ntô yen nzwit mèn ni là!

¹⁵Bin num ntshob ndù: Bag wat kàn bag à vùkob, bag à ngô fe ben ke'te lem; ngelaṅ ze nge' nsi ya' nka', tshùa là, a ke nsi kum num bag. Nummbe yag ndà lem b'a fùte, nummbe yag ndà lem b'a tatte.

¹⁶A ndùlala Tshùaben Nsi tshob ndù: Tshù, me yab ta' loṅ tun ba' Sion. A b'a loṅ laṅte, loṅ tôgndà, loṅ s'a ghù njoṅ i là, ndù bo te sen loṅ nà nsi kua' neta; mèn z'a lo' sen loṅ nà mba ze dù' neyé'te bwe là ke nsi nànte kù.

¹⁷Me nsi lo' nu ndaṅndaṅ ghù nka yi mba ngakut ba' là, lo' nunetsin ghù ju nefi' ntse ba' ju yi, nywinmbaṅ nsi ket ndàlem nuketsin nèn yi. ntse dun nket ntàb tatte nèn yi.

¹⁸Kàn se bin vùkob wat là nsi bagte. Neke' lem ze bin à ngô fe ben ke' là ke nsi bèn be. Nge' z'a ya' nka' là nsi be tshùa, a nyiaṅte zin nku.

¹⁹Mba zit ngelaṅ no z'a nsi tshùa là, a nsi ghom zine; nummb'a nsi tshùa njoṅ nkebnjù fa, mbwôgtshù bo tèttswe'. Nda' ntshùa mi nsi kag fétwut.

²⁰Kunndà nsi vôg mb'a be mèn nyitte wut bwe là, nzwe mfùag kag mb'a be mèn kabte là.

²¹Tshùaben nsi lo nsi ya ntù mb'a na' nja ntùm tômbo' Gabaon nà; a na' mbe ndùlala à ndù a fa' fa' se, fa' se s'a b'a se ke to' yen nà, ndù a miagte fa' se, fa' se s'a b'a se nekuni là.

²²Ndonni a ke' bwô ndù bin sô wut zin num tshabte, mbwôg ndù kà bo ko'te mvèt num bin. Nummbe ju z'a ghù netshètte ndù kà bo sate njoṅ ngô fa là ke' bèn mbe. Me ju' yen nu l'a ntshu Tshùaben Nsi tàndà ntsho.

²³Bin kù' ntoṅ nju' nz'àm. Bin tswe ndù kam, nju' ju ze me nsi tshob là.

²⁴Mèn z'a num ndù' nà ywit ju bwe là ke ndù' nà à be nedù' njoṅ ndù fa ké? Ndù a be nkeb tsha' tse, nke ntshu' i à be netshu' njoṅ ndù fa ké?

²⁵A ke' be bwôgmbwe ndate num nà, mbwe nze' bwe, kà njwit nenà ze nsàm mi num ndamte là ké? Yen ni be mbe tôg k'a njwit ngefet nka, ma' nsa num ze dù', njwit se' num ndù tse.

²⁶Nsi lo tswit'é mb'a zin yi là.

²⁷Bo ke' be lo' masin kà ntsham nze' yi, ku kalig ke' bèn mbe dut num nsàm nenà mi a num ndamte là. Là, bo ke ndo' à zwit ntsham nze' yi, ndo' a shua' ndab nsàm nenà mi a num ndamte là yi.

²⁸Bo num ntsham nsa, là ke ke ntsham i a njoṅ ndù fa. Bo num ndo' ku kalig boa nyàmdiaṅ ndut yi num bwe, là, bo ke' be ghù a kute.

²⁹Mba yen ni fe à be Tshùaben tàndà ntsho; ntag mi b'a mi nenyàmte, zenu i bèn mb'a ze ndùb.