Read Medumba Esaya 30 Bible Online

Esaya 30 - Medumba bible

Esaya 30

¹Nge' tu bon tatu, là, Tshùaben bèn ntshobe. Bo be njù' ba nu ke bètt'àm, nke ngwat nkàn ke be ndù me bam; bo be ntshùa ndùlala nke ntswe' nukebwô num nukebwô.

²Bo num nswe' nèn Egipto ke be ndù bo bètt'àm. Bo ke nèn lem à bam mbàb Faraon. Bo ke nèn diag à ndà lem Egipto.

³Nekabte zin ze bin tshwèt mbéb Faraon nà nsi ko zin tuswe; ndà lem bin tshwèt ndiag Egipto là nsi tab njoṅ zine.

⁴Fenfen tse tù' b'a Tsoan, ben tse bo tum yub mba ghanze là kum Hanès.

⁵Tuswe nsi ko njoṅ yub fa num ta' nzwit mèn z'a ke' ywimte yub sàm ju là, ke ywimte yub, ke netshùb bu yub lo. Là, a ke ndo' à be tuswe bo tabnjoṅ nse' yi.

⁶Ntshob Nsi num nyàm ts'a tshwèt ntshùa ntèn nà: Mum ngô ntobni bo nge', dù' ze nzwi ngwayit bo ndu i, swenyu bo mbanyu be mfe là. Bo num nket tshunkàb tshob num mvèn nkekwène, num tu' z'a mvèn ba kamél là, nèn nke mfà nzwit mèn z'a ke' ghù neywimte yub là.

⁷Nummbe ywimte Egipto b'a ka'te mba banban; a ndùlala ze me tsiaṅ yen ju là tshu'te z'a ke' ywimte là.

⁸Tshùaben tshob Esaya ndù: Ndonni, nèn mbwe bo, nkite yen nu là num tafèt, nkua' ntshob tshen tshu là bo; kite njoṅ i fa ntùm ta' bu' ṅwa'ni, ndùlala ndù tshen tshu là ghô mba num ngelaṅ z'a nsi se' là, ngô ndùlala matmat, nke mbe njoṅ ndù fa.

⁹A b'a nzwit ghatatu, bo b'a bon tse bo num ntatte là, mbe bon tse bo ke' be kô neju' ntshu Tshùaben nà.

¹⁰Bo num ntshob ghayente ndù: Kà bin neyene! Nke ntshob ba ghatshob ntshob Nsi ndù: Kà bin netshob nunenùn bag. Bin soṅ yag à tshu ts'a bwô là, bin tshob à tshu ts'a fu njem nà bag.

¹¹Bin lo manze, bin tsho' wut tsin num ntshagnze, bin yi wut tsin num miag Mèn Nelàn Israél!

¹²A ndùlala, Mèn Nelàn Israél tshob ndù: Mba bin fà wut tsin ntùm nefètte lem, ntùm ṅu'te, njé'te num bwe, ngua' men ntshob là là,

¹³a nsi be num bin num yen ngelaṅ l'a mb'a be mbe num kumba' ze tô be bwe, ndù bo kut ntshag tù a nke nkwù fôge, nummb'a bagte, njoṅ nkôg ngwù nsi be ndende là.

¹⁴A be mbe't'a mba kab tsha' be mbe'te, ndùse bo tsil i ke ghù kondèn nà. A be nkute ka ka i tù' ze nelo' mbwôg yi ke nelo' ndette ntse yi tôntse lo.

¹⁵Nummbe tshù ju ze Tshùaben Nsi, Mèn Nelàn Israél tshob li: Yôg nsi se' bin à ntùm nekaṅ ntù bo fite. Zin neta nsi b'a ntùm netswe ndù kam, bo neyab ntù bwe. Là, bin lo ke kô ndù a be ndùlala.

¹⁶Bin lo tshob mbe nga! Bag nsi lo' nyàmdiaṅ kù nde yi. A ndùlala, me soṅ zin mbe bin nsi kù ndùse bin nsi be tshwèt nde là. Bag nsi yab ghakùnde tse wut tshob fùag là njam bin. Ndùlala ben bo nsi ta' zin nà nsi ghù fùagwut.

¹⁷Ben ntsha' mbùm nsi yab njam ta' mèn; ben tàn nsi yab njam bin, bin kù, tà nkum ndùse bin nsi tù' à metshé' i, b'a mba keki z'a num ntshùa mbale, mba ta' lèn num kônga là.

¹⁸Mba tà ndùlala, Tshùaben tshwèt ndiag neko ndèn mine, a nsi lo nsi ghù kondèn i num bin; nummbe Tshùaben b'a Nsi netsine. Ghafen b'a ben tse bo ke nywint'a num i là.

¹⁹Nga, o ke nsi bèn kua' me ngô Sion, bin tse bin be ntswe Yérusalém nà. A nsi ko ndèn mu ndùs'o nsi kua' yi là. A nsi bùnte wù ndùs'a yoṅ ju' nz'o là.

²⁰Tshùaben nsi fà bàn bin ntùm ntobni, fà ntse bin ntùm nge'. Ben bo tshwèt ntswit'o là ke nsi bèn leme. Là, miag mu nsi yen mèn z'a tshwèt ntswit'o là.

²¹Ntoṅ mu nsi ju' ta' nze tshob njam i ndù: Tshù manze li, zin bwe. Nummb'o nsi nène, ke bu zwim ke bu kwéb lo.

²²Bin nsi yen silba ze bo lo' njo' neto tsin yi là, yen gol tse bo ma' num bo là. O nsi sate mfé tse mba tshu ts'a sagte là tshob ndù: Bin lo nsen ni.

²³Ndùlal'a nsi naṅ mbaṅ num ju z'o nsi ywit ntùm tsha' là. Jujù z'a nsi tum ntùm tsha' là nsi lamte, kém wut mèn mebwô. Nyàm tsho nsi fèl à ntùm kin se nenà be bwe là mum sen lé'njù là.

²⁴Nyàmna' boa nkekwèn tse bo be ndù' tsha' là nsi jù jujù ntùn bo ma' ngwa bwe là, ju ze bo lo' ke'te ndùb bo ze nke' nke'te yi là.

²⁵Bon netsha' ntse boa tumnsi ntse nsi swe' num mbat z'a sage, bo kônga z'a bù'te là mum lé'njù se nezwite benntùn nsi te nsi, ntusô mi bo kut ndiaṅ mbum vùte nsi là.

²⁶Nelàn maṅwù nsi b'a mba ze lagnyam nà. Nelàn lagnyam nsi ta yoṅ sammbàa tshùate, be mba ze lé'njù sammbàa, ndùse Tshùaben nsi kut nkeko' ze nzwit mèn, yate mfaṅ tse num bo là.

²⁷Tshù, mèn z'a tshwèt nse' tà ngùanesà là lén se b'a Tshùaben. Tshùagntù i tshwèt ton dù', yantù i nke mfam dù' à nefame. Yantù tshwèt ngù nkub ntshu mi mvètte, lém se b'a mba mbwôg z'a tshwèt nkù dù' là.

²⁸Njwèt ntshu mi b'a mba koṅntse z'a tshwèt nsate dù', mba ntu' ntse mi a dun ndo' dù' tà nkum tô mèn nà. A se' num nelo' ke'te nke'te ngôngô yi, mba ndù a so tùn num ntshu ngôngô, a ghù bo fàn nze.

²⁹Mba bin nà, bin nsi yob nkwi, mb'a mi bo num njob tèttswe' lé'njù jùa là. Bin nsi ghù tsiaṅte ntù bin mba mèn ze bo tshwèt ndo' ndô netô nke ntshagt'é yi, a nke nèn num mbat Tshùaben, z'a be se gholoṅ Israél là.

³⁰Tshùaben nsi ghù bo ju' nz'é ze nekuni a nsi shùte bu i ntùm tonkèt yantù, netèt mbwôg z'a tshwèt nkù dù' là, netèt tonkèt fetmbaṅ, netèt tonkèt mbaṅ mba netèt ntu'ntu' nywinmbaṅ.

³¹Nummbe Asiria nsi ju' nze Tshùaben vètte. Tshùaben nsi lab i shua' se.

³²Mba zit ntshu shua' lo bo lab i yi, ze Tshùaben tam mvèn i là, bo nsi ju' nze ntom boa ndoṅe; Tshùaben nsi bù' bu i tù, ma' i ntsho.

³³Fe ndùke lo bo nabte tse mbwôge. Bo nabt'a num mfen. A tsho ta, mbèn nzi; ze tse mbwôg là b'a mbwôg bo ntshwèn yàme. Njwèt ntshu Tshùaben tshwèt nkù i, mba ta' koṅ zin z'a yag là.