Read Medumba Esaya 31 Bible Online

Esaya 31 - Medumba bible

Esaya 31

¹Nge' tu ben tse bo tshwèt nswe' nèn Egipto diag ywimte bwe là. Bo tshwèt njé'te num ba nyàmdiaṅe, nke njab ntù num nkalig boa neta ghako' nyàm. Là, bo ke tshwèt ndôte Mèn Nelàn Israél z'a be Tshùaben nà, ke be diag i tshobe.

²Là mba yi ze b'a nzenu, a tshwèt ngù nge' nse'e; a ke' sô ntshob mi. A lo nsi num tunndà ghatshùagntù, ndo nsi num neywimte ben tshen nà tse bo fàn nu là.

³Ze Egipto b'a mènntùn, a ke' b'a nsi; tse nyàmdiaṅ b'a mbàb, bo ke b'a ywèle. Ngelaṅ ze Tshùaben nsi nyit bu i num ngakabte k'a tiag là, mba mèn z'a kabt'é là nsi vù nsi. Ntu tshob bàa fa nsi tamte bi.

⁴Nummbe Tshùaben tshob me ndù: Ndaṅndaṅ mba ngwayit, mén ngwayit be ntàn mbaṅ nyàm z'a ghom nke ntshu'u, njoṅ ghabéb nyàm fa tamte nke nta' i, a ke bwôg nze yub, ke bwôg mba bo yàm nà, be ndaṅndaṅ Tshùaben tàndà ntsho nsi swe' se' num mbat Sion mba num kônga i ma' ntsho bwe.

⁵Ndaṅndaṅ mba nsaṅ be nyitte mbàb mub num bon tshob là, be ndaṅndaṅ Tshùaben tàndà ntsho nsi kabte Yérusalém bag bag. A nsi kabt'é, tshu' i. A nsi lem i bèn yôg i.

⁶Bon Israél, bin bèn njam ntèt mèn ze bin na' nsô wut num i koṅkoṅ nà.

⁷Mba we lo netèt bin nsi ghua' tse neto silba boa tse gol, tse bin na' ndo' mbu lem nabte yi là num sen lé'njù là.

⁸Ze Asiria vù nsi num ṅwi z'a ke' b'a ze mènntùn nà. Ṅwi z'a ke' b'a ze mènntùn nà nsi tshu't'é. A nsi tsho' kù mbwe ṅwi; bontshab soyé tse nsi tù' kuan.

⁹Bwôg nsi ghù gholoṅ se bi nsi, tse nduku kù mbwe yub lén ntsho nène. Tshùaben z'a ghù mbwôg i Sion, z'a b'a Yérusalém nà bèn ntshobe.