Read Medumba Esaya 35 Bible Online

Esaya 35 - Medumba bible

Esaya 35

¹Kônkwa bo ngô ze tsha' tse ghag là nsi tsiaṅte. Dù' z'a na' mb'a fam nà nsi ṅwate, te' mba kanyam nà.

²Nsàm nenà nsi kab bwe, la' ke ntam tsiaṅte, ntùm nkwi ṅwate bo ngu'u. Ze ghamte Liban nsi bèn be yi, ze Karmél mba Saron. Bo nsi yen nkuni Tshùaben, yen nkuni Nsi yag.

³Bin so neta mum mbu mi a bot là, nso ngù' num nkekwi' mi a yub là.

⁴Bin tshob ben tse ntù yub tshwèt ntam nà ndù bo fèn ntù, ke bèn nebwôge; tshù Nsi zin ni, neyagte mba' nsi se'e, yabnge' Nsi fà tu; tu wul i nsi se' yôg zine.

⁵Yen ngelaṅ nà miag ba mfùmiag nsi gha'a, ntoṅ ba mbu'ntoṅ tsho'o;

⁶yen ngelaṅ nà ba nke'kèt nsi ywètte mba njuanyàm nà, lém ba ketshob ké'te, mbèt zwi tsiaṅte. Nummbe ntse nsi bèt num kônkwa, bon netsha' ntse tum dù' z'a be fam nà.

⁷Tsha' ts'a kù là nsi tù' diaṅnkat ntse, tsha' ts'a ghag là tù' ntôntse. Ngab ze ba mbù tshwèt ke ntswe bwe là nsi tù' nà nka'nesoṅ boa nkewakob.

⁸Bo nsi to ntshagnze bwe, to manze bwe. Bo nsi tsiaṅ manze là ze nelànte. Mèn z'a sagte là ke nsi tshùa bwe. A nsi b'a manze ben Nsi tù' bo. Mba kagni tse bo nsi zin num bwe là ke nsi fàn nze bi.

⁹Ngwayit ke num manze là. Lèn tshùagkèt nyàm ke num yen manze là. Be bo ke tèt sàm ta' i mba ntshù' num bwe. Ben bo tshu' yub là nsi bèn zin num yen manze là.

¹⁰Ben Tshùaben ts'a tshu' là nsi bèn njam. Bo nsi nèn Sion, be nèn ke yob nkwi ngu'u. Tsiaṅte ke mi, ze matmat nsi lo' tu yube. Ṅwate bo tsiaṅte nsi ghebte dù' ntshù', ya bo netsham zwe kù nène.