Read Medumba Esaya 36 Bible Online

Esaya 36 - Medumba bible

Esaya 36

¹A lo be kum ngu'njù ntshob kuà gham mba mfen Ezékia be num fen nà, Senakérib mfen Asiria ko' nkam njoṅ ntusô Yuda fa mi bo kut ntsiag là ntsho, ndo' ntsho kà ndo' yi.

²Mfen Asiria tswe Lakis ntum Rabshaké bo mo' neta ntshu ntsho mbaṅ mfen Ezékia Yérusalém. Rabshaké kum num kuntse z'a mfe tu diaṅnkat ntse, num manze nà tsha' neṅab là, ntsine.

³Ndùlala Eliakim nshum Hilkija, tàndà ndà mfen, lo nèn mbaṅ i boa Shebna ngakite, mba Yoash nshum Asaf, ngalé' ṅwa'ni.

⁴Rabshaké tshob bo ndù: Bin tshob Ezékia mbe mfen ndùb, mfen Asiria bètt'é ndù: Kua' yen dù' z'o yab ntù bwe, nke njé'te bwe là b'a zil à?

⁵Me tshob wù ndù men ntshob là b'a mi tùtù. A bwô nelo' zete bo neta kà ma' ntsho yi. O yôg njab ntù à num we kà nto' neke nta tu m'à?

⁶Ṅ, me lèn mb'o yé't'a num Egipto, o lo' yen nka'nesoṅ nebe' là njé'te bwe, ndù a be mbe' ntsho ntùm bu mba we lo z'a yé'te num i là. Tshù mba Faraon mfen Egipto, be mbe num njoṅ benntùn fa tse bo be njab ntù num i là.

⁷Be mo' ndù o tshob me mbe: Bag yab ntù à num Tshùaben, Nsi yag. Là, a ke b'a yi ze Ezékia na' mbiagte mbwe' tse boa ntômbwôg mi, ntshob ba Yuda boa ba Yérusalém ndù: Bin nsi ke vù nsi à nda' mbwe sen tômbwôg li ké?

⁸Ndonni, nabte bin mfen Asiria tàfa' àm, tu wul àm nsi fà nyàmdiaṅ wù ntsha' bàa, a be ze b'o ghù ghako' là.

⁹A be be ndùlala mb'o ku'ni netèn mba nda' mo' fenyu' mèn netèt tàndà ntsho tàfa' àm ké? O yab ntù num Egipto à num nkalig boa ghako' nyàm.

¹⁰Mbèn mbe, me be ko' se' sate yen ngô li bag Tshùaben ke be ntshu ntshù' ké? Tshùaben lo tshob me ndù: Ko' nkam yen ngô là, nsat'é fa.

¹¹Eliakim, Shebna bo Yash tshob Rabshaké ndù: Tshob ghafa' tsho à ntùm ntshob Aram, nummbe bag num nju'u. Kà tshob bag à ntùm ntshob Yuda, num ntoṅ ngô z'a be tù kàbngô là.

¹²Rabshaké bùnte ndù: Bin kwate ndù tàfa' àm tum àm a ndù me se' ntshob men ntshob li a be nda' bin ke tàfa' zin lo ké? A ke b'a ndù me tshob tshen ben ni tse bo tswe tù kàbngô, nke njù mbèt mub mbèn nke nu netsin mube, mbèn ntshob mba bin ké?

¹³Ndùlala, Rabshaké kù'te, nkua' kua' nze neta, ntshob ntùm ntshob Yuda ndù: Bin ju' ntshob mi mfen ndùb, mfen Asiria tshob li:

¹⁴Tshù ju mfen tshob li: Kà Ezékia fù zine, nummb'a ke' ku'ni netshu' zine.

¹⁵Kà Ezékia soṅte zin bin ke njab ntù num Tshùaben, nke ntshob ndù: Tshùaben nsi tshu' yage, be sen tusô li ke vù ntùm mbu mfen Asiria.

¹⁶Kà bin ju' ju ze Ezékia tshwèt ntshob là; nummbe mfen Asiria tshob ndù: A be ze bin bèn njam ntèl àm, bag bin so mbu là, mba mba we lo netèt bin nsi nu ndu' ze nkùa, jù se tshom, nu ntse mi a fe ntùm ko' se tôntse là,

¹⁷tà nkum ndùse me se' lo' zine, nèn bin ntùm ngô z'a fute zine, ntùm ngô ze ngefet bo ndu', ngô bàn bo nkùa là.

¹⁸Kà Ezékia ke ntatte zin nke ntshob bin ndù: Tshùaben nsi tshu' be. Tse nsi ngôngô lo tshu' zit ngô mum mbu mfen Asiria à?

¹⁹Tse nsi Hamat bo Arpad yà? Tse nsi Séfarvaim yà? Bo lo tshu' Samaria mum mbu màm ké?

²⁰Netèt nsi tshen ngô là, a tsit na' ntshu' yub ngô mum mbu màm, kà Tshùaben nku'ni netshu' Yérusalém mum mbu màm à?

²¹Bo tswe ndù kam, ke bùnte sàm nu yi; nummbe mfen lo tshob mbe kà mèn tshob sàm nu yi.

²²Eliakim, nshum Hilkija, tàndà ndà mfen, Shebna ngakite bo Yoash, nshum Asaf, ngalé' ṅwa'ni bèn njam mbaṅ Ezékia, ndù bo fagte nzwe tshobe, nsoṅ i njoṅ ntshob fa mi Rabshaké tshob là.