Read Medumba Esaya 37 Bible Online

Esaya 37 - Medumba bible

Esaya 37

¹Ndùse mfen Ezékia ju' yen nu là là, a fagte nzwe tse, ntôg nke'bàm, nko' nèn ndà Tshùaben.

²A tum Eliakim, tàndà ndà mfen, Shebna ngakite boa ywèn ghale'te, ndù bo tôg nke'mbàm, mbaṅ Esaya ngatshob ntshob Nsi nshum Amots.

³Bo nèn ntshob Esaya ndù: Tshù nu ze Ezékia tshob li: Sen lé'njù li b'a se sobni, se nenaṅ ntsha bo se tuswe; nummbe tshù bon nà ze ngelaṅ nebwe yub ku'u là, neta nebwe yi bwoṅ tse.

⁴Kà mo' ndù Tshùaben Nsi i ju' ntshob Rabshaké, ze tàfa' i mfen Asiria tum i ndù a tute Nsi z'a tswe ntùn no! Kà be mo' ndù Tshùaben Nsi o naṅ ntsha num men ntshob tute là mi a ju' lo! Ndùlala, tshag nz'o tù, nde'te Nsi num tshé' i z'a ke' ntùn nà.

⁵Ndùlala ghafa' mfen nèn mbaṅ Esaya.

⁶Esaya tshob bo ndù: Tshù ju ze bin nsi tshob tàfa' zin, mbe ntshob Tshùaben ni: Kà bwôg num ntshob mi o ju'u, mi ghafa' mfen Asiria lo' ntut'àm yi là.

⁷M'a' so tsemo' ywèt num i, lèn ts'a nsi be ju' ta' nkùn, bèn njam ntùm ze ngô là. Me nsi ma' i num ntshùag ṅwi be kua' ntùm ze ngô.

⁸Rabshaké be ju' mba mfen Asiria lo Lakis là, ntum nèn ntèl i Libna, dù' a ke nde' ntsho là.

⁹Ndùlala mfen Asiria ju' ta' tshô num Tiraka mfen Etiopia; bo tshob yi ndù: Tshù i là z'a tam nze nese' ma' o ntsho là. A yoṅ mbe ju' ntum benntùn bo nèn ntshob Ezékia ndù:

¹⁰Tshù, bin nèn ntshob Ezékia mfen Yuda ndù: Kà Nsi o z'o tshwèt njab ntù num i là mi mfù o nke ntshob wù ndù Yérusalém ke nsi vù ntùm mbu mfen Asiria.

¹¹Nummb'o ju' ju ze fenfen Asiria ghù num njoṅ ngô fa, bo mb'a sate yub là; mba wù là bo a' tshu' o tsho!

¹²Tse nsi ngô tse tà tshàm sate là lo tshu' yub ké? A na' mb'a: Gozan, Karan, Retsef, boa tse nshum Edèn tse bo be Telasar là.

¹³Fenfen Hamat, Arpad bo ze tusô Séfarvaim, Héna bo Ivra b'a yà?

¹⁴Ezékia kwé ṅwa'ni bu benntùn bo tum yub là, nsiaṅe. A ko' nèn ndà Tshùaben, nsette yen ṅwa'ni là mbwe Tshùaben,

¹⁵nde't'é ntshob ntùm le'te ndù:

¹⁶Tshùaben tàndà ntsho, Nsi Israél, wù z'o tswe num ba kérubim nà! A wù tù' wù bèn mbe Nsi njoṅ nufen fa num nsitsha'a, a b'a wù bèn nabte kamànyam bo tsha'a.

¹⁷Tshùaben, ben toṅ o nju'u! Tshùaben, gha' miag mu ndôte njene! Ju' njoṅ ntshob fa mi Senakérib tum bo se' ntute wù Nsi z'o tswe ntùn nà yi nju'u!

¹⁸Tshùaben, a b'a kua' nenùn ndù fenfen Asiria lo sate njoṅ ngô fa mba kua' tsha' tshobe,

¹⁹mba ndù bo lo ma' nsi tshob ntùm mbwôge; là tshen nà ke na' mb'a nsi, a na' mb'a mfa' mbu mènntùn, mbe ntshwèn bo loṅ; bo lo biagte yube.

²⁰Tshùaben Nsi yag, ndonni a bwô ndù o tshu' yag bu Senakérib, njoṅ nufen fa num nsitsha' lèn ndù o bèn mbe Tshùaben tù' wù.

²¹Ndùlala Esaya nshum Amots tum bo nèn ntshob Ezékia ndù: Tshù ju ze Tshùaben Nsi Israél tshob li: Me ju' mb'o tshob me ntùm le'te, num nu Senakérib, mfen Asiria là.

²²Tshù ntshob mi Tshùaben tshob num i li: Ngon Sion ze bo ke' tabt'é, bo tshwèt ngwag o, nke ntut'o. Ngon Yérusalém tshwèt mbe njam o nke nko' ngem nkembe' mi.

²³We z'o tut'é, ntshabt'é à? O tshag nz'o tù à num we? O bù' miag mu tù num Mèn Nelàn Israél.

²⁴O tshùa njam ghafa' tsho ntute Tshùaben, ntshob ndù: Me lo' bwoṅ nkalig màm, nko' yi num ntshùa mbale, num ntôg Liban; me nsi ke' ntù sédra mi, mi a sag neshu là, ke' ntù tô mi, mi a bwô neshu là, zin tà kum num miagte tshaṅ i, num dù' z'a tam tswe' se kà nen nà.

²⁵Me lo tswe' ntôntse, nu ntse mi a tum bwe là. M'a' lo' tun nku màm nyiaṅte nta'ntse Egipto yi a jumte.

²⁶O ke' ju' ndù me na' njù' tshen tshu l'a tà mbwe, nabt'a tà ndùke lo ké? Ndonni me bam ndù tshen tshu là bumte, ndùlala ndù o kaṅ ntusô mi bo kut neshu là, a tù' fam, ntù' ta' tse nenà.

²⁷Tshob ba la' b'a ba lokun nko, tu yub tshu'u, tuswe ghom yube. Bo b'a mba nenà ts'a bén nà, mba botte nenà là. Bo b'a nenà z'a bit num ntu mba' là, mba nsa mi a jum ke be ndù tun i yoṅ mfi' kà nta là.

²⁸Là, me lèn ndùs'o be ntswe nsi là, ndèn ndùs'o be ntum nà, mbèn ndèn ndùs'o bèn njam nà, mba ndùs'o ghù tshùagntù num àm nà.

²⁹Mb'o ghù tshùagntù num àm, nka'te k'a ko' ntam toṅ àm nà, me nsi so kwa sàm ntselag o, ma' tùn sàm num nkub ntshu mu, ghù o tshùa num manze z'o na' ntshùa bwe nse' là mbèn njam.

³⁰A bwô ndù yen ni be ta' keki wù: Bo lo jù a miag tshu ts'a vù là mo' ngu'njù. Mbe mo' ngu'njù njù a ju z'a bit be ze tu là. A be mbatte ngu'njù tat, njwile, ntsho' tshu; bin nsi ywit ntù ndu', jù tàm se.

³¹Z'a nsi yôge, tù' num tunndà Yuda là nsi te'e; féb nga tse nsi, yam tàm se mfe tù.

³²Nummbe tshé' i nsi tum Yérusalém, tse bo tum ntshu vùkob là tum num mbat Sion. Yen nà b'a mba Tshùaben tàndà ntsho z'a ta là nsi ghù là.

³³A ndùlala, Tshùaben tshob num mfen Asiria ndù: A ke nsi tsho ntùm sen tusô li. A ke nsi ma' kô bwe. A ke nsi shù ntshètntsho bwe, ke bèn ntswe' nsam bwe.

³⁴A tshùa num manze z'a se' num bwe là mbèn njam. A ke nsi tsho ntùm sen tusô li Tshùaben bèn ntshob ndùlala.

³⁵Me nsi kabte sen tusô li yôg i num nu lén sàm bo se ngafa' àm David.

³⁶Angél Tshùaben tum, nzwite benntùn ntùm mbàn ba Asiria ntsha' ntshob tàn bon fom nkù (185 000). Bo be lo nsi nkebnjù ntù' tèl à fe tshobe.

³⁷Ndùlala Senakérib mfen Asiria, tsho' mbàn, mbèn njam la' i; a nèn Ninive.

³⁸Là, ndùs'a te nkekwi' mi nsi ntùm ndà Nisrok, nsi i là, Adrammélék bo Sharetser, bon tse, se' ngwal i ṅwi, nkù nèn ngô Ararat. Nshum i Esar-Haddon tô num ze dù'.