Read Medumba Esaya 38 Bible Online

Esaya 38 - Medumba bible

Esaya 38

¹Ezékia tam ngokèt num yen ngelaṅ n'a vùvù. Ngatshob ntshob Nsi Esaya, nshum Amots, se' mbaṅ i, ntshob yi ndù: Tshù, Tshùaben tshob mb'o tag vù yu tunndà, nummb'o a' kwù. O ke nsi lo num yen ngokèt li.

²Ezékia kaṅ se i mbaṅ ndà, nde'te Tshùaben, ntshob yi ntùm bwe ndù:

³Tshùaben, a bwô o lène, nkwimte ndù me lo zin mbwe o ntùm nenùne, mba ntùm nefà wut nsi ntùm ntù, mba ndù me lo ghù numebwô num miag mu! Ezékia fètte ntsenyà yàme.

⁴Ndùlala Tshùaben tshob Esaya ndù:

⁵Nèn ntshob Ezékia ndù me Tshùaben Nsi tàab David tshob ndù me ju' le't'é mbèn njen ntsenyà mi. M'a' kwi'te ngu' ntshob tàn gham num yôg so.

⁶Me nsi yôg i bo sen tusô li mum mbu mfen Asiria. Me nsi kabte sen tusô li.

⁷Tshù keki z'a fe Tshùaben, z'o nsi tshùa njam bwe lèn mbe Tshùaben nsi zwiagte ntshob mi li:

⁸Me nsi ghù lagnyam bèn njam nguan kam mfi', num netshaṅ kam mfi' z'a swe' nkum num mi nkam mfi' Akaz là. Lagnyam bèn njam num ta' kam mfi' num nkam mfi' dù' z'a swe' nkum nà.

⁹Kwi Ezékia mfen Yuda, num ngokèl i bo num mb'a yate là.

¹⁰Me lo ke ntshob ndù: Ndùlala, a bwô me nène, ndùse lé'njù yôg sàm nsi tènte là. Bo nsi fùn àm njam nzendà ngô fe ben, num ngu'njù yôg ts'a tù' me là.

¹¹Me lo ke ntshob ndù: Me ke nsi bèn yen Tshùaben, me ke nsi bèn yen Tshùaben num tsha' benntùn, me ke nsi bèn yen nelàn netèt ba ntùm njù.

¹²Bo lo' yàm ndàlem, bo kwé i me, nkwé me mba ntàb ghabéb mbwe là; bo tshwèt mbote nkù yôg sàm, mba mba'nzwe be nké'te ndeb num tu ndeb là. O be mbe' te' àm mbwôgtshù bo tèttswe'!

¹³Me lo tshùb ntù àm tà nkum nkebnjù. A lo be'te njoṅ mvôg màm fa mba ta' ngwayit là. O be mbe' te' àm mbwôgtshù mba tèttswe'!

¹⁴Me lo ke nkua' mba nganelét z'a tshwèt mfùtte là, nke ntswe mba bwoṅtambia' là. Me lo ke mbe bù' miag màm tù a nke ndèl àm. Tshùaben, me b'a ntùm ntobni, a bwô ndù o ywimt'àm.

¹⁵Me nsi tshob à ndùke? A ju' nz'àm, a bùnte me. Me nsi zin à ntùm fite kà kum num miagte ngu'njù tshàm, mba mba me na' njen ngùtni neshu là.

¹⁶Tshùaben, a tshùa njam kondèn o kà yôg ndamte, a kondèn bèn ngù me nke nke' nzwiage. O lo bèn mbù't'àm, ngù yôg bèn nse' me.

¹⁷Mba kua' nge' tse me yen nà bèn mbèn mfà yôg me. Ntù o bwô o bam nesô zwiag sàm ntùm gheme, dù' banban. Nummb'o ma' nukebwô tshàm njam mvèn o.

¹⁸A ke b'a ngô fe ben bèn nke nyàmt'o. A ke b'a vùkob bèn ke ghamt'o. Ben tse bo swe' nèn ntùm ghem nà ke' bèn ndèn yu nenùne.

¹⁹A b'a mènntùn, yen nà z'a ke' ntùn nà bèn nke nyàmt'o, mba tu wul àm tshwèt ngù sènni là. Tà be ngù bon tse lèn yu nenùne.

²⁰Tshùaben yôg àm! Bag nsi dù' mag ndoṅe, num njoṅ lé'njù yôg sag fa ntùm ndà Tshùaben.

²¹Esaya lo tshob ndù: Bin lo' mbatsi nyu' njab num mfaṅ, Ezékia nsi yôge.

²²Ezékia lo tshob ndù: Me nsi tshùa num zit keki lèn mbe m'a' ko' nèn ndà Tshùaben à?