Read Medumba Esaya 43 Bible Online

Esaya 43 - Medumba bible

Esaya 43

¹Yakob, tshù ju ze Tshùaben z'a na' nabt'o tshob ndonni li. Israél, tshù ju ze Tshùaben z'a na' mbom o tshob ndonni li. Kà bwôg sàm ju, nummbe me tshu' o. Me tsiaṅ o lén so, o b'a yàm mèn.

²A be z'o dut ntse là, mba bag wù nsi bèn be. A be z'o dut nta'ntse là, mb'a ke nsi dut num tu o. A be z'o zin mba ntùm mbwôg là mb'a ke nsi kù o, mba lambwôg ke nsi zwe' o.

³Nummbe me b'a Tshùaben Nsi o, Mèn Nelàn Israél, ngayôg o; m'a' fà Egipto num tu o, mfà Etiopia bo Saba num yu dù'.

⁴Mb'o ta njoṅ num miag màm, me nke nyàmt'o, nkô o là, m'a' fà benntùn num yub dù', mfà ngôngô num tu o.

⁵Kà bwôg sàm ju, nummbe bag wù bèn mbe. Me nsi lo' nzwil o fe yi ntumnyam, kùmt'o mbinyam.

⁶Me nsi tshob tu ndù: Ba' yub njam, tshob ntèn ndù: Kà bèn netshùb yube. Lo' nshumnshum tshàm mfe yi ntùm ngôngô ts'a tum nà; lo' ngonngon tshàm mfe yi num tôg tsha'a.

⁷Me tshob à ben tse bo be ntsiaṅ yub lén sàm nà, ben tse me na' nabte yub num nkuni màm, mbom yube, ntsiagte yub là.

⁸A bwô bo sô nzwit mfùmiag li z'a ghù miag là, mbu'ntoṅ z'a ghù ntoṅ nà.

⁹A bwô ndù njoṅ ngôngô fa bumte, ntumntum tse'te. We z'a tum netèt bin nsoṅ tshen tshu l'à? A tsit ben tse bo ghù bag ju' mbwe tshu tse bo na' ntshob à? Bo la'te ghakwénta ndo' ntshètte yub njam yi. Bo ghù bo ju' ntshob ndù a b'a nenùne.

¹⁰Yen tshob ndù: Bin b'a tshàm ghakwénta, bin mba ngafa' àm ze me na' ntsho' i là, ndùlala ndù bin lène, mbam mbèn nju' ndù a b'a me. Mo' nsi lo ke bwôg be me, mbe ndù mo' ke nsi bèn tum njam àm.

¹¹A b'a me, a kua' me bèn mbe Tshùaben; mo' mèn mba me là ke bwe z'a ghù nefà yôg là.

¹²Me na' njù' yen nu là, me bèn mbèn nzwiagt'é; a ke' b'a mo' nsi ba tum netèt bin. Bin b'a ghakwénta ndù me Tshùaben bèn mbe Nsi.

¹³Me num bwe fe neto'te. Sàm mèn ke' ku'ni nekwé ju ze bu àm tshùb là. M'a' yab nu. We z'a nsi bù' tu i nsi num bwe à?

¹⁴Ngatshu' zine, Mèn Nelàn Israél z'a be Tshùaben nà tshob ndù: Me nsi tshùa num tu bin tum ngakeban num Babilon. M'a' ghù njoṅ ba la' tse fa kù; mba ba Kaldéa nsi nèn num nsitima mi a ke ndo' nka'te yi là.

¹⁵Me b'a Tshùaben, Mèn Nelàn zin. Me bèn nabte Israél, me b'a mfen zin.

¹⁶Tshùaben z'a na' nto nze netèt dibantse, nto ntshagnze tèt koṅntse là,

¹⁷z'a na' ntshag nkalig boa nyàmdiaṅ tshwèt ntsho, bwoṅ soyé boa tàndà ntsho, bo tsho ngwùte nsi ke bèn ndo, bo biagte yube, bo bi mba nzwe lambo, tshob ndù:

¹⁸Ndù bin ke' bèn nekwimte tshu ts'a na' ntôg mo' ngelaṅ nà ké? Bin ke' bèn nekwimte njwèn tshu ké?

¹⁹Tshù, me nsi fa' mo' fa' nswe, sen nà se bo tshwèt njà ke njen nà; bin ke' yen zin ké? M'a' to nze num kônkwa, m'a' ghù bon netsha' ntse tum kônkwa, nké nke nswe'e.

²⁰Nyàm tshwèt nsi nyàmt'àm, mbù tshwèt boa ntshum, mba me ghù ntse tum kônkwa, bon netsha' ntse swe' kônkwa num nefite ntù yàm nzwit mèn, ze me na' ntsho' i là.

²¹Nzwit ze me na' nabte là nsi soṅ nkuni màm.

²²Wù Yakob, o ke' tsiaṅ lén sàm! Wù Israél, o bot tsho num àm!

²³O ke' ton tsho bon mbwe me. O ke' lo' tsho tshule'te ngamt'àm yi. Me ke' to' zwiaṅt'o num tshu bwôntù, ke to' ghùtni o num tshu nelamte.

²⁴O ke' lo' nkàb njun la nelamte yi me, ke lo' nzit tsho nyàm tshule'te ngù yi me ywèt. O lo' nukebwô tsho nkabt'àm yi, ndo' mfànnu mu nkag nyu' yi num àm.

²⁵A b'a me, a kua' me bèn nke mbwete nukebwô tsho, num nkôni lén sàm. Me ke nsi bèn kwimte nukebwô tsho.

²⁶Kamte zenu àm bag wù tshobe. Tshob nu be kua' yu tu wut ndo' ntshètte yu njam yi.

²⁷Mbwe tàan lo ghù nukebwô, tsho ghanze lo kamte yantù àm.

²⁸Tsho ghatshagte Ndà Nsi lo bagte dù' àm ze nelàne, ngù a tù' ju banban. Ndùlala me tam mbèt mvèn Yakob, ngù Israél tù' ju netute.