Read Medumba Esaya 45 Bible Online

Esaya 45 - Medumba bible

Esaya 45

¹Tshù ju ze Tshùaben tshob Sirus, mèn z'a yo' i, ntshùb bu i, ndù a sate ngôngô mbwe i, ndù a keb kob tun fenfen, nga' ba nzendà yi, ndù kà sàm ta' nzendà bèn mbe nefùn mbwe i tshob ndù:

²Tu wul àm nsi zin mbwe o, ke late nze ko'ko'. Me nsi be'te nzendà tùn meba, ghù nta' ntùn vùte nsi.

³Me nsi fà tshunkàb tse bo tshoṅ nsi, boa mfu' mi a lemte là wù, ndùlala ndù o lèn ndù me b'a Tshùaben z'a tsiaṅ o lén so là, mbe Nsi Israél.

⁴Me tshùa num nkôni ze me ghù num lén ngafa' àm Yakob bo Israél ze me na' ntsho' i là kà ntsho' o yu. A ndùlala ze me na' ntsiaṅ o lén so, nso lén kam wù, mba mb'o na' mbe ke lèn àm nà.

⁵Me b'a Tshùaben, mo' nsi ke' bèn mbe. A ke nda' me mo' nsi ke bwe. Me lo taṅ kob tun o, mba mb'o na' mbe ke lèn àm nà,

⁶ndùlala ndù bo lèn ntumnyam mba mbinyam ndù sàm ju ke' ghù nebe ke fe à me. Me b'a Tshùaben, ndù mo' ke' be mba me là.

⁷Me bèn nabte nelàne, nabte njame, me num mfà fu', nke mfà nge', a me Tshùaben ke ngù njoṅ tshen tshu là fa.

⁸Kamànyam bam ndù meme' swe' mfe tù, ndot ghù ndù nunetsin lo! Tsha' gha' nte nge, ndù yôg be, ngù nunetsin bile, nke nte'e. A b'a me Tshùaben bèn nabte njoṅ i fa.

⁹Ndon tu mèn z'a be nsoṅte nu bo Mbom i là, kab netèt nkab tsha'a! Be tsha' bètte ntetsha' ndù a ghù à ke di ké? Be fa' tshob mèn z'a fa' i là ndù a ke' lèn nefa' ké?

¹⁰Ndon tu mèn z'a be mbètte tàab ndù numk'o bwe àm di là! Ke nebètte màab ndù a na' mbwe i numke di là.

¹¹Tshùaben, Mèn Nelàn Israél, Mbom i tshob ndù: Be bin bètt'àm nu num nu ndamnjù à? Be bin soṅ àm mb'a bwô me ghù num bon tshàm mba num mfa' mbu màm nà ké?

¹²A b'a me na' nabte tsha'a, mbèn mbom mènntùn njab bwe. A b'a kua' me, a kua' mbu màm na' mbèn nyitte kamànyam. Be kua' me na' mbèn ntete ntshu ntsho tshob bwe.

¹³A b'a me bèn ntènte Kirus ntùm yàm nunetsine, me nsi zwiagte manze tse; a nsi bèn kut tusô sàm, tshu' ben tshàm ndà kuan. A ke nsi jun yub a nejune, ke nefà nda' lo. Tshùaben tàndà ntsho bèn ntshob ndùlala.

¹⁴Tshùaben tshob ndù: Mi mfu' Egipto, tse bin Etiopia boa tse Sabéa, tse bo be ben nesag là, nsi tsho ntùm mbu mu, tù' tsho. Tshen ngô là nsi zin njam o, boa ntshan num bo. Bo nsi vù nsi mbwe o, le't'o tshob ndù: Nsi b'a nda' nsen ni la' o, mo' nsi ke' bèn mbe.

¹⁵Nsi ba Israél, o b'a Nsi z'o num ndem nà, mbe Nsi z'o num njôg benntùn nà.

¹⁶Ben tse bo na' mbù' tu nsi mbwe i là nsi vù ntùm tuswe, tuswe mbit ghom yube. Ben tse bo na' nke nabte ba neto là nsi lo' tuswe kà nèn yi.

¹⁷A be ze Israél tshùa ntsho là, mb'a fe à Tshùaben. Yen netshùa ntsho là b'a z'a tswe matmat là, tuswe ke nsi ko zine, tuswe ke nsi ghom zin tà nèn nkum miagte ngelaṅ.

¹⁸Tshù ju ze Tshùaben z'a nabte kamànyam, z'a be ta' Nsi tù' i, z'a nabte tsha' kà nte i tù, ke nabt'é a ndù a be banban, là, ndù benntùn ke ntswe bwe, tshob li: Me b'a Tshùaben, mbe ndù mo' ke' bèn mbe.

¹⁹Me lo ke tshob à ntùm nelemte, ntùm dù' njam num nsitsha'a; me lo ke tshob nzwit Yakob ndù: Bin diag àm à banban! Me Tshùaben ke ntshob à nenùne, me ke ntshob à nu ndaṅndaṅ.

²⁰Bin tse'te, ntamte nkù'te nse'e, me tshob à ben tse bo tum ntshu vùkob netèt ngôngô là! Ben tse bo be ntsiaṅ ta' nsi z'a ke' ku'ni neyôg yube, nke nket neto ntshwèn tshob là; ts'a ke' ghù nkwate là.

²¹Bin tshob ndùlala, ngù bo se'e. Bo ghù ntag be netèt tu wut tshob bo bo. We z'a na' mbùt tshen nu là fe neto't'à? We z'a na' njà soṅ tshen nu là tà fe mbwe à? A ke b'a Tshùaben ké? Mo' Nsi ke bwe mba me là. Me be Nsi netsin a nda' tù' me, mbèn nke mfà yôg.

²²Njoṅ zin fa bin be num ntôg njù là, bin kaṅ wut tsin nse' ntèl àm, ndùlala bin nsi yôge. Nummbe me b'a Nsi, ndù mo' ke' bèn mbe.

²³Me lo tshob nsaṅlaṅ bwe, nenùn tum ntshu àm, mbe ndù mo' ju ke nsi tsi num ntshob màm. Ntunkekwi' fa nsi te nsi mbwe àm, njoṅ ntshob fa ke nkàn mfe num lén sàm.

²⁴Bo nsi tshob me ndù nunetsin bo neta ke ntswe à nda' num Tshùaben tù' i; njoṅ benntùn fa tse bo na' nja ntù num i là nsi se' tèl i, tuswe ko yube.

²⁵A nsi tshùa njam Tshùaben njoṅ nzwit Israél fa tù' ben netsine, bo bèn ngamte yube.