Read Medumba Esaya 46 Bible Online

Esaya 46 - Medumba bible

Esaya 46

¹Bel bo Nébo tse nsi ba Babilon tiage, ngwù nsi; bo yab neto tshob num ba nyàm, num nyàm tse bo num nket lèt là. Bo yab yub num tshen nyàm nà tse bo à bot là, bo nke ndèt yube.

²Bo kôge, ngwù nsi yoṅ ntshù' fa. Bo ke' ku'ni neyôg ben tse bo ke nket yub là. Mba bo là tse bo tshwèt nèn ndà kuan nà.

³A bwô ndù tunndà Yakob ju' àm, tshé' tunndà Israél tse bo ke' ntùn nà lèn ndù me lo ket zin fe lé'njù se bo bwe zin nà, ndù me lo tomte zin fa tà bam mà zin.

⁴Me nsi ghù à be ndùlala mba ndùse bin nsi ywèn nà. M'a' ke ntomte zin mba ndùse bin ywèn tà mfôg là. M'a ghù ndùlala, mbe ndù me nsi nèn yi à be mbwe. Me nsi ket zine, yôg zine.

⁵A kua' we ze be bin lo' mfi't'àm yi k'a be mba yàm nguan n'à? Be bin ghù me fut'a we kà bag yi tum ndaṅndaṅ à?

⁶Tshù benntùn nà bo tshwèt nsô gol bàm bo, nke mfi' silba num kilô là; bo be ndo' ta' ngana ntùne, ndù a se' nabte ta' nsi bo, ze bo nsi vù mbwe i, ghamt'é là;

⁷bo num nkel i nkembe' bo, nèn nte i num ze dù', a tswe bwe ke kumte wul i bwe. Bo num nkua' ntsiaṅ i, a ke bùnte; a ke' be yôg mèn mum nge'.

⁸Ben kebwô, bin kwimte yen nu là, nkwate tu zin bwe, ndo' wut tsin nèn tsham yi.

⁹Bin kwimte tshu ts'a tôg mbwembwe là; nummbe me b'a Nsi, ndù mo' ke' bèn mbe. Me b'a Nsi, ndù mfuni màm ke bwe.

¹⁰Me num ntshob ju z'a nsi se' là fe neto'te; ntshob mb'a nsi bumte là k'a njôg mbumte. Me tshob ndù ntàmtenu màm nsi bumte, me zwiagte njoṅ yàm nekô fa.

¹¹Me bèn nke ntsiaṅ saṅ se me ghom nà ntumnyam, ntsiaṅ mèn z'a zwiagte ntàmtenu màm nà ngô ngùanesà. M'a tshobe, mbe ndù m'a' zwiagte. M'a' tàmte ndùlala, mbe ndù a nsi bumte.

¹²Ghakeban nu ndaṅndaṅ, benntùn tse ntù tshob sag là, bin ju'u.

¹³Me ghù yôg se me na' mbù là ghebte, a ke' bèn mb'a ngùanesà. Netshu' zin ze me na' mbùt nu tse là ke bèn ngubte. Me nsi ghù Sion yob ngu'u, nkuni màm be Israél.