Read Medumba Esaya 49 Bible Online

Esaya 49 - Medumba bible

Esaya 49

¹A bwô ndù ngô ts'a tètntse là ju' me! ngôngô tse bo be ngùanesà là kù' ntoṅ nju'u! Tshùaben lo tshob nu m'a fe ndùse màa be ke yoṅ mbwe àm nà. A na' ntsho' àm à fe ndùse me tum bam màa là.

²A lo ghù ntshu àm b'a mba ṅwi netshùag là. A lo lo' netshaṅ bu i nkabt'àm yi, ndo' àm ngù két se bo kùa là yi, ndem àm ntùm ze mfe' nkét.

³A lo tshob me ndù: O b'a ngafa' àm, Israél ze me nsi nyàmte wul àm num i là.

⁴Là tu wul àm lo tshob ndù: Me fa' fa' à banban. Me bagte neta àm ntùm mfùag bo banban. Là yàm nda' num mbaṅ Tshùaben, ntsho'fa' màm num mbaṅ Nsi àm.

⁵Ndonni Tshùaben tshwèt ntshobe, yi z'a na' nabt'àm fe lé'njù se bo bwe àm ndù me be ngafa' i là. Ndù me lo' Yakob mbèn yi mbaṅ i, mba Israél z'a ke' à be nesate là. Nummbe me b'a mènfen num miag Tshùaben, ndù Nsi àm bèn mbe yàm neta.

⁶A bèn ntshob me ndù: Mb'o be ngafa' àm, num nebù'te nzwit Yakob mba nelo' tshé' Israél bèn yi njam nà ke' yoṅ nku'u. Me yab o ndù o be nka' nelàn ngôngô, ndo' yôg sàm nèn yi num ntôg njù.

⁷Tshùaben, ngatshu', Mèn Nelàn Israél, tshob mèn ze bo tshwèt ngwag i, nke me't'é netèt benntùn, ndù a mb'a nkuan ben neta là ndù: Fenfen nsi yen i lo tsin tù, kamkam yen i ngwù nsi kabkab, mbe ndùlal'a num Tshùaben z'a be mèn nenùne, mbe ndùlal'a num Tshùaben z'a na' ntsho' o là.

⁸Tshùaben tshob ndù: Me nsi ju' nz'o num ngelaṅ kondèn, ywimt'o mum lé'njù yôg. Me nsi lem o, me nsi yab o ndù o wat kàn bin ngô, ndù o bù'te ngô, mba ndù o bù'te ntsi' mi a tsiag tù' i là.

⁹O nsi tshob ba kuan ndù bo tume! Tshob ben bo be ntùm njam nà ndù bo se'e! Be nsi ke fèt num manze, bo nsi tèt nenà num njoṅ nkônga fa.

¹⁰Nziku' ke nzi ntse lo ke nsi ya yube. Nziag nyam bo lagnyam ke nsi ghù bo yen nge'. Nummbe mèn z'a tshàm ndèn mub là nsi be ngatshagte yube, lo' yub nèn yi num ntôntse nefite.

¹¹Me nsi lo' njoṅ tshàm mbat fa tswe' nze yi; me nsi tote manze tshàm.

¹²Tshù bo là bo tshwèt nse' ngùanesà là. Tsemo' fe à tu, tsemo' fe mbinyam, tsemo' fe ngô Sinim.

¹³Yob kwi me kamànyam! Ṅwate ntùm ntù o me tsha'! A bwô ndù ba mbat bèt zwi ntùm tshu'te! Nummbe Tshùaben fite ntù ze nzwit mèn. A ko ndèn ben tse ntùm nge'.

¹⁴Sion lo ke ntshob ndù: Tshùaben ghua' àm. Tshùaben lag àm!

¹⁵Mènnzwi ghù nelag mén z'a nyô là ké? Mb'a ke ko ndèn mén z'a tum bam i là ké? A be mènnzwi lag mén mba nelag là, mba tu wul àm ke nsi lag o.

¹⁶Yen mbe me lo tshebt'o mum mbu màm; mu nkummba' ke mb'a be mbwe àm njoṅ ndù fa.

¹⁷Ben bo kul o là tshwèt nkù nde nse'e, tshen nà tse bo na' nsat'o, mbiagt'o là nke nkù ntume.

¹⁸Bù' miag mu ndôte mbaṅ o ndiaṅ mbum njene! Njoṅ yub fa tshwèt ntse'te, nke nse' mbaṅ o. Me Tshùaben ze me be ntùn nà tshob nsaṅlaṅ bwe ntshob ndù: O nsi ma' yub num o mba ju kwi wut là, ntaṅ yub tun o mba ménngon bo ka i be ntaṅ ju kwi wut là.

¹⁹Ntaṅla' mu mi a na' nsate, ntù' dù' banban, ngô z'a na' ntù' fam nà nsi kag num ba la' tsho, ben tse bo na' nke nsé't'o là tum nkù.

²⁰Bon ts'o na' nke nkwate mbe bo bi là nsi tshob num ntoṅ mu ndù: Dù' fét num àm, fà dù' me, me te bwe.

²¹Tu wul o nsi tshob ntù o ndù: A we bèn mbwe yub me ndù à? Nummbe me lo ke ghù mén, me na' mb'a kebwe. Me lo kù la', bo lo sô àm: We z'a kwiagte yub à? Me na' ntù' à tù' me! Tshen ben ni na' mb'a yà?

²²Tshùaben Nsi tshob ndù: Me nsi bù' bu àm mum ngôngô, me nsi te keki lo' du'te ntumntum yi. Bo nsi tshùb bu bon tsho tse bandum se' yi, ket bon tsho tse bènnzwi nkembe' bo se' yi.

²³Fenfen nsi be ghakém o, ngonngon tshob be ghakém o. Bo nsi vù nsi mbwe o kabkab, lat mbab nku mu. O nsi lèn ndù me b'a Tshùaben, mba ndù ben bo num njab ntù num àm nà ke nsi be ntùm tuswe.

²⁴Bo nsi kwé ntsha' ze neta mèn lo' là ké? Ju ze nduku ngama' ntsho ghom nà nsi tum bu i ké?

²⁵Tshùaben tshob ndù: Ṅ, bo nsi kwé ntsha' neta mèn, ju ze nduku ngama' ntsho ghom nà tum bu i. Me nsi tshètte njam o mbwe ngamaṅt'o, tshu' bon tsho be kua' yàm tu.

²⁶Me nsi ghù ghafétt'o fèt ko' mbàb wut yub, nu ko' lem tshob mba ndu' là kà bume. Njoṅ benntùn fa nsi lèn ndù me b'a Tshùaben ngayôg o, mbe ngatshu' o, mbe ze Nganeta Yakob.