Read Medumba Esaya 5 Bible Online

Esaya 5 - Medumba bible

Esaya 5

¹Me nsi yob kwi mèn ze me num nkô i là, yob kwi mèn ze me num nkô i là, num nà ndu' i: Mèn ze me num nkô i là na' ghù nà ndu' num mbat ze tsha' tse bwô là.

²A tshu' dù', nsô ndoṅ bwe, njwit mo' mbwô tù ndu' bwe. A kut ta' ba' netèt bwe, mbom dù' netshàb ndu' tèt bwe. Nke nywinte ndù a nsi yàm ntàm ntùn, l'a yàm à ntàm kebwô.

³Ndonni a bwô ndù bin ba Yérusalém mba ba Yuda, bin be ghatsho'te netèl àm bag tù ndu' sàm.

⁴M'a ghù njoṅ i fa z'a lo mbwô ndù me ghù num tù ndu' sàm ndù a yàm ntàm ntùn nà. A yàm à be ntàm kebwô. Kà m'a' bèn ngù à ndùke?

⁵Ndonni m'a' soṅ zin ju ze me ghù num tù ndu' sàm nà. M'a' tsho' kàb, ba nyàm fèl i; m'a' sate nkum mba', bo nyiaṅt'é nku.

⁶M'a' ghù a tù' fam. Bo ke nsi bèn fét'é, ke bèn nso i. Kwékwénàndô boa njô nsi bit bwe. Me ke nsi bèn bam ndù ndot ma' mbaṅ num i.

⁷Tù ndu' Tshùaben tàndà ntsho b'a tunndà Israél, tù ndu' s'a num nkô là b'a ba Yuda, mbe tù s'a num nkô là. A lo ke nywinte nunetsin bo, là bo nke mfètte lem; nke nywinte nu ndaṅndaṅ bo, là bo nke nkag nge'.

⁸Nge' tu ben tse bo be nkwi'te ba' num ba', nke nkwi'te nà num nà, num nelo' ndo' dù' yi fa, nke ntswe tù' bo netèt ngô là.

⁹Tshù ju ze Tshùaben tàndà ntsho la'te me li: Bo nsi sate men mba' là kà ke tag. Men màmà mbwô mba' là ke nsi ghù mènntùn ntùm bwe.

¹⁰Mba ngwanà gham ntù ndu' bwe là, nsi fà a nda' ta' bàn ndu'; nguan ntsi ju ze bo ywit là fà ta' kesoṅe.

¹¹Nge' tu ben tse bo be ndiag ndu' mà nkebnjù, njôg nu tà nkum tèttswe', mbum tshob là.

¹²Bo be nkô loṅe, loṅ nse', lammbé, medub bo ndu' ndùse bo tshwèt njù jùa là. là, mbe se' mba fa' Tshùaben nà, bo ke lo' mba ju là, ke te lag num mfa' mbu mi.

¹³A ndùlala bo nsi ghom yàm nzwit mèn nèn yi ndà kuan. Nziku' nsi yub bwô i, nzi ntse lab ze neju'ni.

¹⁴A ndùlala ngô fe ben gha' ntshu i nte nge, ntsho' ntshu i nte nge neshu, ndùlala nkuni Sion junkàb i nke nswe' ntsho bwe bo bwoṅ benntùn tse bo tshwèt ntshu'te, nke ntsiaṅte là.

¹⁵Bo nsi lab bônke' naṅ nsi, kag tuswe tu dùbdùb, ghù miag ghaka'te tshùaṅe.

¹⁶Tshùaben tàndà ntsho nsi be mèn ndùb a num ze netsho'te ntsha. Nsi nelàn nsi be nelàn ntshùa num ze nunetsine.

¹⁷Mbwe boa njùmbwe nsi fèt tshob nenà ntùm fam mba bo b'a ntùm kin sob là.

¹⁸Nge' tu ben tse bo be ntshùa njam ngùninu mub nke nsoṅ nevù kam nso num bo là. Bo b'a mba nyàmna' z'a be nsoṅ kalig njam i là.

¹⁹Nge' tu ben bo be ntshob ndù: A bwô ndù Nsi nànte, mfa' se fa' ndende ndù bag yen nà. Bo be ntshob ndù: A bwô ndù ntàmtenu ze Mèn Nelàn Israél bumte, ndù bag lèn i.

²⁰Nge' tu ben tse bo be ntsiaṅ nukebwô ze mebwô, nke ntsiaṅ ze mebwô ze kebwô là. Bo be ndo' njam nkaṅ làn yi, ndo' làn nkaṅ njam yi. Bo be ndo' ju nezwe nkaṅ ze nedùmte yi, ndo' ju nedùmte nkaṅ ze nezwe yi.

²¹Nge' tu ben tse bo be ndo' tu wut tshob mba ghazenu, nke njen mba bo b'a ghazete là.

²²Nge' tu ben tse bo be njab yub net'a num nenu ndu' yi là; ze yub ndù' b'a nda' neke ntamte neta ndu' bam bo là.

²³Bo be nkwé nda', nkag ngafànnu, nso ntsha tu mèn netsine.

²⁴A ndùlala, nga yub nsi tù' bwe tse ndaṅndaṅ mba bèn ze mbwôg kù i, ndaṅndaṅ mba nyi'nga ze mbwôg kù i là. Nsàm mub nsi lo nsi mba mbab mi fetmbaṅ kam i là, nummbe bo lo wag kàn Tshùaben tàndà ntsho, ntam ntshob ze Mèn nelàn Israél ku.

²⁵A ndùlala ze yantù Tshùaben kam num ze nzwit mèn nà; a be nyit bu num i, ndab i, ba mbat nyi'te, fe ben be num manze mba nenà tse bo bé'te ndà là. Mba tà ndùlala, yantù i ke' yoṅ nkôge, bu i ke' à be nenyile.

²⁶Tshùaben bù' fenkaṅ tù netsiaṅ ta' ngô z'a ngùanesà là yi, a tô nta nelo' ntsiaṅ i yi a fe tà tôg njù nse'e. Tshù i l'a tshwèt mfùag wut nse'e, nke nkù nde là.

²⁷Sàm mèn ke' bot, sàm mèn ke' yub bot, sàm mèn ke tshwèt me' miaglo, ke ke nzi. Sàm mèn ke' ké' kob tun i, ke ké' nkù nketo' mi.

²⁸Nkét mi b'a mi nekùa, ngoṅkét tse be mi bo dù' là. Tun nku nyàmdiaṅ tse b'a mba nkwango' là, nku nkalig mi be mba neta fetmbaṅ nà.

²⁹A ke ntshu' a mba ngwayit là, a be ntshu' mba bon ngwayit là ngom ju, ndo' nèn yi sàm mèn ke ku' nekwé yi.

³⁰Netshu' z'a fute ze fetmbaṅ num dibantse là nsi be mbaṅ i num sen lé'njù là. Mèn nsi lôte tsha' ngô yen à njam bo nge'. Njam nsi fam nelàn mfe kamànyam.