Read Medumba Esaya 53 Bible Online

Esaya 53 - Medumba bible

Esaya 53

¹We z'a bam nu ze bo na' ntshob bag à? We z'a na' ndèn bu Tshùaben bwe à?

²A lo ku' mbwe i à mba meyubte tù là, mba metob tù s'a bit num dù' tsha' njum nà. A lo ke ghù bwô, me ju neziag ke be num i z'a ghù nelo' ntù be là; ntshù mi ke ghù ju z'a b'a bwô be là.

³Benntùn lo wag, ngua' i, a be mèn ntobni, ndù nge' à lat num i. A na' mb'a mba mèn ze mèn ke' be tam lag num i là. Be lo tshèl i, ke lo' i mba sàm ju là.

⁴Mbe be ndùlala ndù a kel à tse be nge'; a b'a tse be ntobni là ts'a ket tu i là. Be lo yen i mba mèn z'a vù ntsha mbwe Nsi là, mèn ze Nsi lab i, nso tuswe tu i là.

⁵Bo na' mbe't'é à num nukebwô be, mbe't'é à num mfànnu be. Be be ghù fite ndù ze be nevù ntsha tsho à tu i. A b'a ntshu mfaṅ tse bèn ngù kà be njate.

⁶Be na' mb'a tshakendà mba njùmbwe là. Mba we lo na' nke mbwe à ze manze. Tshùaben lo ghù mfànnu njoṅ be fa tsho tu i.

⁷Bo lo ma'ni, mfétt'é, a ke gha' ntshu i, mbe ndaṅndaṅ mba mén njùmbwe ze bo nèn yi dù' ze bo wal i bwe là, mbe ndaṅndaṅ mba njùmbwe be mbe mbwe ngakebte nyiaṅ tse là. A lo ke gha' ntshu i.

⁸Bo lo biagt'é ntùm nge' bo nevù ntsha; netèt ben tse bo be num ze zwiaṅ nà, we z'a bam mbe bo sô i num nsitsha'a, netèt benntùn, ndab i nzwi num nukebwô yàm nzwit mèn à?

⁹Bo na' ngù se fi a netèt se ben kebwô, ngù fi se bo se ghankàb, mba mb'a na' mbe ke lèn nu nefètte lem, nu fùte ke to' tum ntshu i là.

¹⁰Là, a bwô Tshùaben, a lo' nge' neyen mbe' i yi. A be z'a fà yôg se, ntù' mbwe fa num nukebwô là, mb'a nsi yen ta' nzwit, lé'njù tse bèn ntènte. Fa' Tshùaben nsi zin ntùm mbu mi.

¹¹A nsi lôte ntàm mfa' mi, dun tsiaṅte. Mèn netsine, ngafa' àm, nsi ghù benntùn yàm be ben netsine, njam nelèn ze bo lèn i yi là; tu wul i nsi ket mfànnu mube.

¹²A ndùlala, me nsi fà ze dù' boa ben ndùbndùb. A nsi ghabte ntsha' boa ben neta, nummb'a lo fà wul i vùkob ze tu, bo bèn njab i netèt ben kebwô, nummb'a ket nukebwô benntùn yàme, mbèn nke mbu' mbu Nsi num tu ghavù ntsha.