Read Medumba Esaya 56 Bible Online

Esaya 56 - Medumba bible

Esaya 56

¹Tshùaben tshob ndù: Bin ghù nu ndaṅndaṅ, bin ghù nunetsine, nummbe yôg s'a fe me là ke' bèn mb'a ngùanesà, mbe ndù yàm nunetsin tù' ke nela'te wul i.

²Mènfen b'a mèn z'a be ngù ndùlala là. Mènfen b'a mén mèn z'a taṅ nga ntùm bwe. Yen mèn nà be nke nze Sabbat, ke lo' i mba ju banban nà, nke ntshùb wul i ndù k'a ghù nukebwô.

³Kà mfàm z'a be nso wul i num Tshùaben nà tshob ndù: Tshùaben nsi sô àm netèt ze nzwit mèn! kà njabmfenkun tshob ndù: Tshù, me b'a ta' tù njum!

⁴Nummbe Tshùaben tshob ndù: Njabmfenkun tse bo nsi ze Sabbat tshàm, tsho' neke ngù à be ju z'a bwô àm, ke kagtùn à be ntùm kàn sàm nà,

⁵me nsi fà ta' dù' bo bo lén ntùm ndà àm, bo bam ngàmndà màm. Yen dù' là bo lén nà b'a se nshumnshum boa ngonngon kô là. Me nsi fà ta' lén s'a tswe matmat là bo. Sen lén nà ke nsi bi.

⁶Mfàm tse bo nsi so wut num Tshùaben ke fa' yi, ke kô lén Tshùaben, ke be ghafa' tse là, njoṅ benntùn fa tse bo nsi ze Sabbat, ndù kà bo lo' i mba ju banban, ke kagtùn ntùm kàn sàm nà,

⁷mba me nsi lo' yub nèn yi num mbal àm ze nelàne, ghù bo tsiaṅte ntùm yàm ndà le'te; me nsi bam nyàm tse bo tone, tshule'te fa tse bo fà num tômbwôg sàm nà. Nummbe bo nsi tsiaṅ ndà àm ndà le'te Nsi mum njoṅ ngôngô fa.

⁸Tshùaben Nsi tshwèt ntshobe. A tshwèt nkùmte ba Israél tse bo kù la' là, nke ntshob ndù: Me nsi tse'te tsemo' ngôngô so num Israél, yab num ben tse m'a kùmte là.

⁹Njoṅ zin fa, bin ba nyàm tshwèt, bin se' fèle, bin njoṅ nyàm fa tse bin be ntswe fèn nà.

¹⁰Ghabéb i b'a ba mfùmiag, ndù bo ke' ghù nkwate. Bo b'a mbù tse lém sob lat là, bo ke' lèn nebàbe. Njem tshwèt ntshem yube, bo nke nô be nenô.

¹¹Njoṅ yub fa b'a tshùagkèt mbù, ndù bo ke' be ywèt. Bo b'a ghabéb mbwe tse bo ke' be ju' sàm ju là. Njoṅ yub fa ke mbwe à ko' yub manze, mba we lo nke nte'te ma' à bàm i, tà nèn nkum mba num ntshèt mèn.

¹²Bin se'e, m'a' nèn diag ndu'. Be nsi nu neta ndu'! Be nsi ghù à be ndaṅndaṅ mba ndamnjù, bèn ghù tshùate.