Read Medumba Esaya 58 Bible Online

Esaya 58 - Medumba bible

Esaya 58

¹Kua' kà ntô mu ta'a, kà ghom wul o; fà nz'o tù mba ze neta nta là; tshob mfànnu yàm nzwit mèn yi, tshob nukebwô tunndà Yakob yi.

²Bo be ndiag àm njoṅ lé'njù fa, nke nkô nelèn tshàm manze; nke ngù à mba ngô z'a ghù nunetsine, ke ghua' tse ntshù' Nsi i là. Bo tshwèt mbètt'àm mb'a bwô neghù kà nunetsin be là, nke nkô neghebte num Nsi.

³A ywimte yag à ke netswe nziku' a be ze yen nà ke' be sàm ju num miag mu l'à A ywimte yag ke neke ma'ni wut tshag, a be z'o ke' neyen yen nà mba ju l'à? Bin yen mb'a be mbe lé'njù netswe nziku' bin nke nèn num mfa' mine, nke ngùtni ghafa' tsine.

⁴Bin num ntswe nziku' à num neghù ntanta bo nezwe zwe', num netsham nto' kua' ntùm tshùagntù. Bin ke' ke ntswe nziku' à mba sen lé'njù là num ndiag là. Be bin ke ghù ndùlala bo ju' nze zin mfe tù.

⁵A netswe nziku' z'a be ntù àm bwô num bwe, ndùse mènntùn tshwèt ma'ni wul i là ké? Nke mben tu i nsi mba nkewakob là, nke nô num nke'bàm mba bwembwôge. A kua' ze b'o tsiaṅ netswe nziku' là ké? A b'a lé'njù ntùn nà Tshùaben ké?

⁶Bin lèn netswe nziku' ze me num nkô là ké? Tshùaben Nsi bèn mbètte: A b'a ndù bin kebte njoṅ nkù tùn nukebwô fa, nké'te mfèt kele'e, nkag ben tse bo ke mfétte yub là ndù bo nène, mbèn mbe'te njoṅ nzenze nkele' fa.

⁷A b'a ndù mèn ghabte ze jujù bo mèn nziku' ya i là, njab njennge' z'a ke' ghù dù' nezi là ndà, ma' nzwe num mèn z'a be tunntôg là, ke lo' mvèn o ntam mfèl o yi.

⁸Nelàn o nsi tum mba mfôgnjù là, nkeko' mu bèn njumte kua' ndende; yu nunetsin nsi zin mbwe o, nkuni Tshùaben ke ntshag o.

⁹Yen ngelaṅ nà, o nsi tsiaṅ Tshùaben, a bùnte. O nsi kua' a tshob ndù: Tshù me li! A be z'o tshag kele' ngùanesà mbaṅ o, ke bèn nke ntshob ntshob ma'ni bo tshô tshabte là.

¹⁰A be z'o be mfà yu jujù neyôg yi mèn nziku' ya i là. A be z'o be nkém bwoṅbwoṅ nà, mba nelàn o nsi tum mum njame, yu njam tswe à mba nka' mbwôgtshù là.

¹¹Tshùaben nsi ke b'a be ngatshagt'o, a nsi kém ntù o num dù' ts'a jum nà, bèn so ngù' mum nkam wut mu. O nsi be à mba nka' ze bo num nzwi' là, mba tôntse se ntse ke' be jumte bwe là.

¹²Ben tsho nsi bèn kut dù' num njwèn fam, o nsi bèn bù'te njwèn tun ba'. Bo nsi tsiaṅ o nganabte fam, Ngatsiagte manze z'a be ngù la' bwô netswe ntùm bwe là.

¹³A be z'o ghom wul o nezinte lé'njù Sabbat, ndù k'o ghù a ju z'o kô mum lé'njù sàm se nelàne, a be z'o lo' lé'njù Sabbat mba se nelàne, nke ngamte Tshùaben bwe là, a be z'o ke nyàmt'é, ke ke mbwe à tsho manze, ke ke mfà wul o à num mu mfa' bo num ntsha banban nà,

¹⁴mb'o nsi yab yu ṅwate num Tshùaben, me Tshùaben bèn ngù o tsin num dù' ṅaṅa ntùm ngô. Me nsi ghù o jù ntsi' tàan Yakob. Nummbe me Tshùaben bèn ntshob ndùlala.