Read Medumba Esaya 59 Bible Online

Esaya 59 - Medumba bible

Esaya 59

¹Nga, bu Tshùaben ke' vôg neyôg zine. Ntoṅ mi ke' nente neju' nze zin.

²Là, a b'a nukebwô tsin bèn nte fagte netèt bin, netèt bin bin à Nsi zin. A b'a mfànnu min bèn ngù kà se i ntsho' num bin, ntshètt'é ndù kà ju' nze zin.

³Nummbe mbu min dun lem, ntu mbu min be ndù a fètte lem, nkub ntshu min be ntshob tatte, lém sin nke ntshob nukebwô.

⁴Sàm mèn ke tshwèt ntshob nunetsin num dù' i, sàm mèn ke tsho'te mb'a ku'ni là. Bo ke njé't'a num ntshob tatte, nke ntomt'a be tatte; bo be njùm mfùm, mbwe nefètte lem.

⁵Bo be nke' mbum nyu, nke mba' mfot tàmngengàme. Mèn z'a fèt mbum là mb'a' kwù; a be ze bo tsit ta' i là mba swenyu nsi tum bwe.

⁶Mfot mub ke' ghù nebe nzwe, bo ke ghù nelo' bu fa' sob nkabte wut yub yi. Mbu fa' mub b'a mi mfànnu, mbe ndù mbu mub dun mfa' nefètte lem.

⁷Nku mub be mfùag nsi neghù nukebwô, bo nke nànte nefètte lem mbu'u. Mub nkwate b'a mi neghù nukebwô. Nesate bo nekag fam num num manze yub.

⁸Bo ke' lèn tshob manze fite, nunetsin ke tse num tshob manze. Bo ke ntshùb yub à ntshagnze mi a ṅu'te là. Mba we lo z'a zin bwe là ke zi ndèn fite.

⁹A ndùlala ze netshu' tsin tà ngùanesà mbaṅ be, yôg ke kum num be là; be num nke mbéb nelàne, njen à njame, nke mbéb mbwôgtshù, njen à tèttswe', ze be tshwèt nzin ntùm bwe là.

¹⁰Be tshwèt momte dù' mba mfùmiag tse bo be mbaṅ ta' kumba' là, nke momte dù' mba ben tse miag ke tu bo là. Be num ngwù bag bag njagnyam mba tèttswe' là. Be ke ntswe netèt fu' se be ghù l'a mba ba mfe là.

¹¹Be num ntshu' mba mbù tshwèt là, nke ntswe mba bwoṅtambia' là. Be num mbéb netshu'u, a ke kum num be, nke mbéb yôg, a tsin tà ngùanesà mbaṅ be.

¹²Nummbe mfànnu mag yàm mbwe o, nukebwô tshag nke nso ntsha num bag. Mfànnu mag b'a num bag. Bag be ndèn njoṅ tshag nefètte lem fa.

¹³Bag lo be ghafànnu, mbe ghatatte num miag Tshùaben. Bag lo ghua' Nsi yag. Bag lo tshob nu num ma'ni bo tatu, nkwate, ntàmte ntshob tatte ntù bag.

¹⁴Netshu' sô wul i, yôg ta wul i ntsin ngùanesà; nummbe nunetsin tiag ntam nsi num nsém. Be nu ndaṅndaṅ ke bam neghebte tse.

¹⁵Nunenùn bi nsi; mèn z'a tshwèt nkù nukebwô b'a bu nge', bo lag ntsha' i fa. Tshùaben yen, njen à ntùm nenywin mba nu ndaṅndaṅ ke' bèn mbe là.

¹⁶A yen mbe sàm mènntùn ke' bèn mbe, a tshwèt ntshàm mba mènntùn ke tshwèt nzin kam nà; ndùlala bu i bèn njwimt'é, ze nunetsin bèn mbe dù' neyé'te bwe.

¹⁷A ke nket nunetsin a mba nzwe tùn nà, nte yôg tu i mba tshe' là; neyagte mba' be yi à mba nzwe z'a ke nket là. Lànghe' be yi à mba kummbaṅ s'a be nkabte wul i yi là.

¹⁸A nsi ghù mba we lo ndaṅndaṅ mba mfa' mi be yi là. A nsi so tshùagntù i num ghamaṅt'é, yab nge' num ghakeban tse, yab nge' mum ngô ts'a tètntse là.

¹⁹Bo nsi bwôg lén Tshùaben fe mbinyam, bwôg nkuni mi à fe kamànyam; nummb'a nsi se' à mba ta'ntse z'a dune, ywèt ntshu Tshùaben nke ntèn i nèn yi là.

²⁰Tshùaben tshob ndù: Ta' ngatshu' nsi se' num Sion, num njoṅ ben Yakob fa tse bo kaṅ ntù yub num nukebwô tshob là.

²¹Tshùaben tshob ndù: Tshù kàn sàm se bag à bo wat li: Ywèt tshàm tse me so num o, boa ntshob màm mi me yab ntshu o là, ke nsi lo num nkub ntshu mu, mi bon tsho, ke mi bon bon tsho lo, ndùlala num njoṅ ndù fa. Tshùaben bèn ntshobe.