Read Medumba Esaya 61 Bible Online

Esaya 61 - Medumba bible

Esaya 61

¹Ywèt Tshùaben Nsi num num àm, nummbe Tshùaben lo yo' àm num nelo' nkùn mebwô nèn ntswi ghayennge'; a tum àm ndù me nèn njate ben tse ntù yub be' là, ndù me tshob ndù kuan tswe yub tu, ndù me tshob ndù bo kag ghandàtsha,

²ndù me tshob ngu'njù mbotni Tshùaben, ndù me tshob lé'njù yagte mba' Nsi be, ndù me fite ntù ghayennge',

³ndù me fà kétmbùm ghayennge' Sion ke b'a bwembwôge, ndù me fà mfèt tsiaṅte bo ke b'a mi nsivù, ndù me fà nzwe nyàmte bo ke b'a ywèt nenywine. A nsi tshùa ndùlala bo tsiaṅ yub térébintô nunetsine, ntù mi Tshùaben bwe num ghamt'é là.

⁴Bo nsi bèn kut dù' num njwèn fam. Bo nsi bù'te nke' mba' mi a kôg naṅ nsi là. Bo nsi bèn nabte ntusô mi bo na' nsate, mbagte fe tà ndùke lo là.

⁵Ba mfàm nsi be nsi, ke béb nyàm tsine. tse nshum mfàm nsi be ghadù' nà tsine, be ghadiaṅ nkùa tsine.

⁶Mba bin nà, bo nsi tsiaṅ zin ghale'te Tshùaben. Bo nsi tswi lén sin ndù ghafa' Nsi zin. Bin nsi jù tshunkàb ngôngô, ke nyàmte wut tsin ntùm ghamte yub.

⁷Bo nsi fà nku'ni bin yoṅ bàa, ke b'a tuswe. Bin nsi tsiaṅte num zin bag i ze ntùn, ke b'a mbe tuswe a' ko zine. A ndùlala, bin nsi ghù ntsi' nze bàa ntùm yub ngô. Zin tse i ze bo nsi fà bin nà b'a tsiaṅte z'a tswe matmat là.

⁸Nummbe me Tshùaben num nkô nunetsine, nke mban tshô bo nukebwô. Me nsi be nenùne, fà yub nda' bo. Me nsi wat kàn s'a tswe matmat là bag à bo.

⁹Me nsi lèn nzwit yub netèt ngôngô, lèn nzwit yub netèt ntumntum. Njoṅ benntùn fa tse bo nsi yen yub là, nsi lèn ndù bo b'a nzwit yen nà ze Tshùaben tam ntse yi là.

¹⁰Me nsi tsiaṅte num Tshùaben. Ntù àm nsi dun ṅwate num Nsi àm, nummb'a ma' nzwe yôg num àm, ndaṅndaṅ mba tshe' ndu ngon be nkwi wul i, ndaṅndaṅ mba nkwa mi ménngon be nkwi wul i yi kà ntsin mbwe ndu i là.

¹¹Nummbe ndaṅndaṅ mba tsha' be ngù ju bèt, ndaṅndaṅ mba tshu neywit be mbit nka' là, Tshùaben Nsi nsi ghù yôg bo nunetsin bèt num miag njoṅ ngôngô fa be ndaṅndaṅ.