Read Medumba Esaya 62 Bible Online

Esaya 62 - Medumba bible

Esaya 62

¹Me ke nsi mem ntshu àm num nkôni Sion, me ke nsi fite num nkôni Yérusalém, tà nkum ndùse yôg se tum mba mfôgnjù là, tà nkum ndùse netshu' i tum mba tswe'nka' z'a lo' mbwôg là.

²Ndùlala ngôngô nsi yen yôg so, njoṅ fenfen fa yen ghamt'o. Bo nsi tsiaṅ o mo' lén nswe, se ntshu Tshùaben nsi bèn yab là.

³O nsi b'a ndot fen neziag mum mbu Tshùaben, be nzwe kut tu mum mbu Nsi o.

⁴Bo ke nsi bèn tsiaṅ o ghua' mènnzwi, ke bèn ntsiaṅ tsha' tsho ghua' tsha'a; bo nsi tsiaṅ o ndù kô ntù àm, ntsiaṅ tsha' tsho ndù nzwi àm me num nkô là. Nummbe ntù Tshùaben yab num o, mbe ndù tsha' tsho nsi ghù ndu.

⁵Ndaṅndaṅ mba ménnshum be ntamte bo ménngon nà, be ndaṅndaṅ nshumnshum tsho nsi tamte num o. Ndaṅndaṅ mba nzwingùn be ngù ntù ndu i nke ntsiaṅte là, be ndaṅndaṅ o nsi ghù ntù Nsi o tsiaṅte.

⁶Me yab ghabéb dù' num kàbngô tsho Yérusalém, bo ke nsi memte ntshu yube, ke mbwôgtshù ke tèttswe' lo. Bin tse bin be ngù Tshùaben nke nkwimt'é là ke nsi fite.

⁷Kà bin bam a tswe fite ke be ndù a bèn mbù'te Yérusalém, num nelo' i ngù ghamte yi num nsitsha'a.

⁸Tshùaben lo' bu i ze zwim, bu i ze neta ntshob nsaṅlaṅ bwe ntshob ndù: Me ke nsi bèn fà nsa mu ghakeban bo jù, nshumnshum mfàm ke nsi bèn nu ndu' mu, mi o yen nge' bwe k'a tum nà.

⁹Là, ben tse bo kùmte nsa là nsi jù i, ke nyàmte Tshùaben. Ben tse bo kàb ntàm tù ndu' là nsi nu i ntùm bam ntshundà dù' àm ze nelàne.

¹⁰Bin dule, bin dut nzendà, bin nabte ta' manze mfà ngô. Bin to manze, bin to manze, nsô ndoṅ bwe! Bin te ta' keki tù, mum ngô!

¹¹Tshù ju ze Tshùaben tshob num njoṅ ntôg njù fa li: Bin tshob ngon Sion ndù: Tshù ngayôg i là z'a tshwèt nse' là; a ghù nkàbfa' num i, ntsho'fa' ze neyob ngu' tam mbwe i.

¹²Bo nsi tsiaṅ yub nzwit mèn z'a làn nà, ben tse Tshùaben tshu' yub là. Bo nsi tsiaṅ o ngô ze bo tshwèt ndiag i là, tuswe ze bo ke' ghua' i là.