Read Medumba Esaya 63 Bible Online

Esaya 63 - Medumba bible

Esaya 63

¹We z'a tshwèt mfe Edom nse'e, we z'a tshwèt mfe Bosra nse'e, ndù a ket nzwe tse meba, nzwe tse neziagte, ntsin tù ntùm ka'te, ntùm nkoṅ ze neta fa à? A b'a me na' mbèn mbù yôg, a b'a me bèn ngù mba' num netshu'u.

²Numke nzwe tsho mbe tse meba à? Numke nzwe tsho mbe mba nzwe mèn z'a be ntèbte tag bo ka l'à?

³Me na' mbe dù' tshab à nda' tù' me, sàm mèn netèt ngô lo ke be bag yi. Me lo tshùa njam yantù ntshàb yube, nyiaṅte yub ntùm tshùagntù àm. Lem tshob lo bèt naṅ num nzwe tshàm, me sagte njoṅ nzwe tshàm fa bwe.

⁴Nummbe lé'njù yagte mba' lo be ntù àm, nda' ndù ze ngu'njù netshu' ben tshàm se'e.

⁵Me lo ke ndôte, là, sàm ngaywimt'àm ke tum. Me lo tshàm neshu, sàm ngatomt'àm ke be. Ndùlala bu àm lo ywimt'àm, tshùagntù àm be yàm dù' neyé'te bwe.

⁶Me lo tshab ntumntum ntùm yantù àm, ndo' yub nkaṅ ghabum ndu' yi ntùm tshùagntù àm, nsa lem tshob num nsitsha'a.

⁷Me nsi soṅ kondèn Tshùaben, soṅ ghamte Tshùaben, soṅ à ndaṅndaṅ njoṅ mfi' mb'a ghù num be là. Me nsi tshob nu num bwôntù ndùb z'a ghù num tunndà Israél là. Nummb'a ghù yi à mfi' mba kondèn i bo fu' nkôni yi Tshùaben be yi là.

⁸A lo tshob ndù: Bo b'a yàm nzwit mèn kà ke tag, mbe bon tse bo ke nsi ta tu là! Tu wul i lo be ngayôg yube.

⁹Bo lo ke bwoṅ ywimte ntùm njoṅ nge' tshob fa, nummbe Angél z'a ke mbe mbwe i là lo yôg yube. Ze tu wut lo tshu' yub ntùm nkôni i bo kondèn i. A lo ke ntomte yube, nke nket yub ke faṅ sàm ngelaṅ, ntùm lé'njù ts'a na' ntôg là.

¹⁰Là, bo lo be ghatatu, ngù a nywin ntùm ywèt tse tse nelàne, ntù' ngakeban yub, nde' yub ntsho.

¹¹Ndùlala ze nzwit mèn kwimte mi njwèn lé'njù Mosé, nke ntshob ndù: Mèn z'a lo' yub nko' yi mà dibantse, bo ngabéb ze bwoṅ nyàm nà yà? Mèn z'a na' nke njab ywèt tse tse nelàn netèt bo là yà?

¹²A lo tshagte Mosé bu i ze zwim, bu i ze nekuni. A lo keb ntse mbwe bo, ndù a ghù lén se ghô matmat.

¹³A lo tshagte yub ntùm ntu' koṅntse, mba ta' nyàmdiaṅ nemaṅ nde yi là, num kônkwa, bo ke tam mvèt. A b'a yà ndonni à?

¹⁴Ywèt Tshùaben lo lo' yub nèn yi ntùm fite ndaṅndaṅ mba nyàm z'a swe' nke nèn tômbo' là. Tshù mb'o na' ntshagte yu nzwit mèn nà, ndùlala ndù o te lén so se nekuni.

¹⁵Tsin mfe kamànyam, mfe dù'ntswe o ze nelàne, ze nekuni njen me Nsi! Nkôni o bo ngù' o b'a yà? Nekù ntù z'o na' ngù num bag là tsin. Bag ke' bèn mbe ju' ntshùa kondèn o mbaṅ bag.

¹⁶Mba tà ndùlala, o b'a tà yag, nummbe Abraham ke' ghù nelèn yage, mbe ndù mba Israél ke' lèn yage, A b'a wù Tshùaben bèn mbe tà yag. O bèn nke ntshob mb'o b'a ngayôg yag fe ngu'ngu'.

¹⁷Tshùaben, numk'o mfaṅ bag ntsin ngùanesà num manze tsho à? Numk'o nkag sagntù ntù bag ndù kà bag nebwôg o à? Bèn nse' bag, ntshùa njam nkôni ghafa' tsho, mba njam nkôni z'o ghù num nzwit tshen nà ts'a be ntsi' mu là.

¹⁸Nzwit mèn o ze nelàn be ntùm ngô à nda' num metsit ngelaṅ; ghakeban tshag nyiaṅte dù' o ze nelàn nku.

¹⁹A tswe neshu mb'o ke tshwèt mbèn mbèn ntô yag là. Bo tshwèt mbèn ndo' a lén so ntsiaṅ yag yi. A lo mbe be ndù o fagte kamànyam, a lo mbe be ndù o swe' nse'e, mb'a be ba mbat nyi'te mbwe o.