Read Medumba Esaya 64 Bible Online

Esaya 64 - Medumba bible

Esaya 64

¹Ndaṅndaṅ mba mbwôg be nkù ntshwèn njum, ndaṅndaṅ mba lambwôg be ngù ntse nke ndo ywèt là! O lo ngù neghù ghamaṅt'o lèn ndù o num bwe, ngôngô vètte mbwe o,

²ndùse bo yen o nke ngù tshu netshàm tse bo na' mbe ke to' ju', tse bo na' mbe ke to' ju' bo tshob là. A lo mbe be ndù o swe' nse' mb'a be ba mbat nyi'te mbwe o!

³Ntoṅ sàm mèn ke' to' ju', lag sàm mèn ke to' yen mo' nsi yôg ben tse bo be njab ntù num i là, mba tu wul o là.

⁴O be nse' mbwe ben tse bo num ngù nunetsin nà, ben tse bo num nzin num manze tsho, nke nkwimt'o là. Là, o na' nja ntù à nummbe bag lo ghù nukebwô. Bag a' yen nge' num bwe neshu, tà nkum ndùse tu wul o nsi yôg yag là.

⁵Njoṅ yag fa tù' b'a mba ben nesagte là. Yag nunetsin b'a mba nzwe z'a sagte là; njoṅ yag fa lab mba mfu ntù là, nukebwô tshag nke nket yag mba fetmbaṅ nà nke nèn yi.

⁶Sàm mèn ke bwe num netsiaṅ lén so, neghom wul i, nso wul i num o, nummb'o lem yag se o, mfaṅ bag nke ntù' bwe à be njam nukebwô tshage.

⁷Tshùaben, mba tà ndùlala o b'a tà yag; bag b'a tsha' ts'o bèn mbe ngate là. A b'a mbu mu bèn mbomte yage.

⁸Tshùaben, kà ya ntù bag ntshùate, kà ke nkwimte nukebwô. Yen mbe bag be njoṅ yag fa mb'a yu nzwit mèn:

⁹Yôg njen mba ntusô mag mi nelàn fa tù' kônkwa. Sion tù' à kua' kônkwa, Yérusalém tù' à fam.

¹⁰Ndà Nsi yag ze nelàne, ze nekuni, dù' ze tà tshag ke ngamt'o bwe ntùm nkwi là, mbwôg se ka bwe. Njoṅ tshu tanjoṅ fa tse bag na' ngù bwe là, bo bagte fa.

¹¹Tshùaben b'o tswe ntshu mi' mbwe njoṅ tshen tshu li fa ts'a tôg là ké? B'o bam ndù bo kôg yage, nzwi yag tà nkum ndùlala ké?