Read Medumba Esaya 65 Bible Online

Esaya 65 - Medumba bible

Esaya 65

¹Me lo fà wul àm num ben tse bo ke tshwèt ndiag àm nà. Me lo fà ntù àm ben tse bo ke tshwèt mbètte sàm nu me là. Me lo ke ntshob nzwit mèn z'a ke tshwèt ntsiaṅ lén sàm nà ndù: Tshù me li, tshù me li.

²Me lo ke ntshag mbu màm ngô tatu njoṅ ndù fa. Là, a nke ntshùb à be manze kebwô, ndaṅndaṅ mba mi nkwatenu tshwèt ntshagt'é là.

³Me lo ke ntshag mbu màm ben tse bo ke' be tsin nekamt'àm se se, nke mfà tshule'te ntùm nka', nke nton labinda ba nsi num nke' tsha'a,

⁴nke nzi ntùm ntufi, nke nzi ntùm ngabloṅ, nke mfèt mbàb ngùnyàm, nke njù jujù z'a sagte là.

⁵Bo nke ntshob ndù: Kù'te mbaṅ bag ntsin tà nsen din! Kà kwag àm, me nsi lànt'o. Njoṅ i fa lo' nzembwôg nen mfaṅ ntselag màm yi. A b'a mbwôg z'a tshwèt nkù, mbe ndù a nsi ke kù là.

⁶Ndonni, tshù ju ze me jù' ntù àm ni: Me ke nsi ntswe ntshu mi'i, m'a' ghù bo ket nge', kua' nenùn m'a' ghù bo ket nge'.

⁷Nge' nukebwô tsin mba tse tà tsine. Tshùaben bèn ntshobe. Bo lo ton la nelamte mfe num tu ba mbale nke ntshabt'àm mfe num tu nkônga. Me nsi siaṅ nkàbfa' yub mum mfa' mub mi a yà ntôg là.

⁸Tshùaben tshob ndù: A be ze bo tèt ntse ntùm ntàm ta' tsha ntàm tù là, mba bo nsi tshob ndù: Kà bagt'é, nummb'a ghù mbotni num i. Me nsi ghù be ndùlala num nkôni ze me ghù num ghafa' tshàm nà, ndùlala ndù kà me bagte njoṅ i fa.

⁹Me nsi sô ta' nzwit num Yakob, ghù njùndà mbat tshàm tum num Yuda. Ben tshàm tse me tsho' yub là nsi bèn ghù ngô, ghafa' tshàm nsi ke ntswe ntùm bwe.

¹⁰Saron nsi be kin bon nyàm nke'nke'e, tômbo' Akor be dù' nyàm ndùbndùb nsi nôte bwe là. Yen nà nsi b'a num yàm nzwit mèn z'a b'a diag àm nà.

¹¹Là bin, tse bin ghua' Tshùaben, tse bin lag mbal àm ze nelàne, tse bin nabte ta' téblé nte Gad, nso ta' ntu' lamte ndu' nte Meni là,

¹²me ma' zin num ntshùag ṅwi. Bin nsi te nkekwi' min nsi kà bo wat zine. Nummbe me lo tsiaṅ bin ke bùnte, me lo tshobe, bin ke ju'. Là, bin lo ghù nukebwô num miag màm. Bin lo tsho' neghù à nu z'a bag àm nà.

¹³A ndùlala Tshùaben Nsi tshob ndù: Ghafa' tshàm nsi jù, bin tswe nziku'u, bo nsi nu, ntù tsin ke nkù. Ghafa' tshàm nsi tsiaṅte, tuswe ke nko zine.

¹⁴Ghafa' tshàm nsi yob nkwi ntùm tsiaṅte z'a ntù bo là, là, tu wut tsin nsi ke kua' ntùm zwe z'a ntù bin nà. Bin nsi làn wut tsine, nummbe ntù tsin nsi tum mum nge' z'a tsho zin nà.

¹⁵Lén sin nsi tswe à mba lén ndon nà netèt ben tshàm tse me tsho' là. Tshùaben Nsi nsi zwite zine, fà mo' lén ghua ghafa' tse.

¹⁶Mèn z'a nsi kô ndù mbotni be yi ntùm ngô là, mb'a bwô ndù a lon yen ju l'a num lén Nsi nenùne. Mèn z'a nsi kô nekàn mfe ntùm ngô là, mb'a bwô ndù a kàn mfe à num lén Nsi nenùne. Nummbe me nsi lagte njwèn nge' fa. Tshen njwèn nge' là nsi lem num miag màm.

¹⁷Nummbe me nsi nabte kamànyam nswe bo tsha' nswe. Bo ke nsi bèn kwimte tshu ts'a yà tôg là. Tshen tshu là ke nsi bèn se' ntùm nkwate.

¹⁸Bin tsiaṅte, mbe be ntùm ṅwate njoṅ ndù fa. A be ndùlal'a num ju ze me nsi nabte là. Nummbe m'a' nabte Yérusalém num ṅwate, ngù tsiaṅte be ben tse.

¹⁹Yérusalém nsi be yàm ṅwate, yàm nzwit mèn be tsiaṅt'àm. Bo ke nsi bèn ju' tshu'te ntsenyà ke ze nekua' lo bwe.

²⁰Bon ke ywèn benntùn no ke nsi bèn be bwe tse tshob lé'njù ke nsi tènte là. Nummbe z'a nsi kwù ndù a ghù ngu'njù nkù là nsi b'a nguanmèn. Ngandon b'a mèn z'a nsi be kwù ndù a ke' kum ngu'njù nkù là.

²¹Bo nsi kut mba' tswete ntùm bwe; bo nsi bwe nkùa, nu ndu' mi.

²²Bo ke nsi kut mba', mo' mènghua bèn ntswe bwe; bo ke nsi bwe nkùa, mo' mènghua bèn nu ndu' mi. Nummbe tse lé'njù yàm nzwit mèn nsi yàm à mba tse lé'njù ntù là. Ben tshàm tse me tsho' là nsi tsiaṅte mum mfa' mbu mube.

²³Bo ke nsi fa' à banban, ke bèn ngù bon, njen yub bo nke nkwùte. Nummbe bo nsi b'a nzwit mèn ze Tshùaben tam ntse yi là. Boa bon tshob nsi bèn be.

²⁴Me nsi bùnte bo ke be ndù bo yoṅ ntsiaṅ àm. Me nsi ju' le'te yub ke be ndù bo yoṅ ntsin ntshob nu me.

²⁵Mbù tshwèt bo njùmbwe nsi fèt ntùm kin ntshù'. Ngwayit fèt nyi'nga ndaṅndaṅ mba nyàmna' là. Jujù nyu nsi b'a mbabe. Bo ke nsi bèn ghù nukebwô ke bèn ntshùm lem nsi num yàm mbat nelàn fa. Tshùaben bèn ntshob ndùlala.