Read Medumba Esaya 66 Bible Online

Esaya 66 - Medumba bible

Esaya 66

¹Tshùaben tshob ndù: Kamànyam b'a ko'fen sàm, tsha' be kamnko' dù' ze me be nte nku màm bwe là. A kua' zit ba' ze be bin kut m'à?

²Mbu màm bèn nabte njoṅ tshen tshu là fa. Njoṅ i fa be ntùn à mba me bèn nkô là. Tshùaben bèn ntshobe. Tshù mèn ze me nsi te lag num i li: A b'a num mèn z'a tshwèt njen nge', ndù ntù i bot, a nke mvètte mbwe ntshob màm nà.

³Mèn z'a tshwèt ngwat nyàmna' là b'a mba mèn z'a wal à mènntùn nà. Mèn z'a fà ta' njùmbwe num jule'te là b'a mba mèn z'a dù' à tô ta' mbù là. Mèn z'a fà ju bwôntù là b'a mba mèn z'a sa à lem ngùnyàm nà. Mèn z'a ton tshu nelamte là b'a mba mèn z'a ghamt'â ba neto là. Njoṅ tshen ben nà fa be ntsiaṅte num tshob manze tse bo tshùb là, ntù tshob nke ṅwate num tshùaya'nu tshobe.

⁴A ndùlala, mba me yàm nsi tsiaṅte neghùtni yube, ngù nge' tsho yub kà wut yub féle. Nummbe me lo tsiaṅe, bo ke bùnte, ntshobe, bo ke ju'. Là, bo lo ghù à ju z'a ke' bwô là num miag màm, njab ntù bo neghù à ju z'a bag àm nà.

⁵Bin ju' ntshob Tshùaben, njoṅ zin fa tse bin be mbwôg ntshob mi là. Tshù ju ze fèt tsin tse bo num mbàn zine, nke ma' zin njam num lén sàm be ntshob li: A bwô ndù Tshùaben la'te nkuni mi, bag yen zin tsiaṅte. Nda' ndù tuswe nsi ko yube.

⁶Mo' tonte nze tum tusô, mo' nze tum Ndà Nsi. A b'a nze Tshùaben, z'a tshwèt mfà ntsho'fa' ghakeban tse là.

⁷A lo be ju' ya ndù a yà bwe. Nge' neyen lo be ṅwag ndù a yà bwe mén mandum.

⁸We z'a to' ju' lèn yen ju li à? We z'a to' yen lèn ju z'a fute yen ni à? Be bo bwe ta' tumla' mum ta' lé'njù ké? Be bo bwe ta' ngô num ta' yoṅ ntshù' ké? Sion lo yoṅ mbe ju' ya mbwe yoṅ i, mbwe ba la' tse.

⁹Ndù m'a' gha' bam mènnzwi ke faṅ ndù a bwe ké? Tshùaben bèn mbètte. Ndù m'a' ghù mènnzwi jùm me yôg mfùn bam se ké? Nsi o bèn mbètte.

¹⁰Njoṅ zin fa bin be nkô Yérusalém, bin à bo tsiaṅte, bin fon zin tsiaṅte bwe. Njoṅ zin fa tse bin be nsivù num i là, bin ṅwate ntùm tsiaṅte bin à bo.

¹¹A nsi tshùa ndùlala bo kém zin bin ywèle, njwèt mbùn mi a be mi fitentù là, ndùlala ndù bin fin mbùn mi ntùm tsiaṅte, nkuni mi mi a dun ntsho' ntshèt là.

¹²Nummbe tshù ju ze Tshùaben tshob li: M'a' lo' fite nse' yi num i à mba ta'ntse là, ndo' ghamte ngôngô nse' yi num i mba koṅntse z'a dun mfag là. Yen ngelaṅ nà bo nsi nyô zine, ket zin mum mbu, te zin num nku ke batte zine.

¹³Me nsi fite ntù zin ndaṅndaṅ mba mén ze màab tshwèt mfite ntù i là, bo nsi fite ntù zin mà Yérusalém.

¹⁴Bin nsi yen i ntù zin dun tsiaṅte. Mvôg min nsi bèn ghù neta mba nenà là. Tshùaben nsi la'te ngù' i num ghafa' tse. Là, a nsi ghù yantù i lèt num ghakeban tse.

¹⁵Tshù Tshùaben nà z'a tshwèt nse' ntùm mbwôg là. Nkalig mi b'a mba ta' zim nà. A kaṅ yantù i a tù' b'a mba nge'mbwôg là, ze tshùag b'a mba lambwôg là.

¹⁶Tshùaben ke ndo' à mbwôg ntsho'te yi, a ke ndo' à ṅwi nso ntsha yi tu benntùn. Ben tse Tshùaben nsi zwite là yàm neshu.

¹⁷Tshùaben tshob ndù: Njoṅ benntùn fa tse bo be nèn ntùm nke' fèn, nke ndànte wut tshobe, nke nsôg ntse bwe, ntshù' ntshù', nke mfèt mbàb ngùnyàm, nke mfèt tshu ts'a sagte, boa tshetku là, me nsi biagte yub fa.

¹⁸Me lèn mfa' mube, ndèn nkwatenu mube. Tshù ngelaṅ nekùmte njoṅ ngôngô fa li a se' là, mba njoṅ ntshob fafa. Bo nsi se'e, yen nkuni màm.

¹⁹Me nsi ghù tshu netshàm netèt bo. M'a' tum ben tshob tse bo tum ntshu vù là netèt njoṅ ngôngô fa. M'a' tum yub: Tarsis, Pul bo Lud, tse bo num ma' két là, ntum yub Tubal mba Javan, ntùm ngô ts'a tètntse là. Tshen ngô là lo ke to' ju' bo tshob lén sàm, ke to' yen nkuni màm. Bo nsi soṅ nkuni màm netèt ngôngô.

²⁰Bo nsi lo' fèt tsin fe yi ntùm ngôngô, se' fà yub Tshùaben mba ju bwôntù là. Bo nsi se' bo à num ba nyàmdiaṅe, num nkalige, num nkeba, num nkekwène, num nyàm tse bo be nket lèt là, se' yi num mbal àm ze nelàne, mà Yérusalém, Tshùaben bèn ntshobe. Bo nsi ghù à ndaṅndaṅ mba bon Israél be ndo' ju bwôntù yub nse' yi ntùm kab nelàn ntùm ndà Tshùaben nà.

²¹Tshùaben tshob ndù: Me nsi lo' ghale'te, ben Lévi mba netèt bo.

²²Tshùaben tshob ndù: Ndaṅndaṅ mba kamànyam nswe bo tsha' tse me nsi nabte nsi tswe mbwe àm nà, nzwit zin bo lén sin nsi be ndùlala mbwe àm.

²³Njoṅ benntùn fa nsi se' vù nsi mbwe àm mba num sit jùa Sabbat lo. Tshùaben bèn ntshobe.

²⁴Bo nsi be tum yen fe ben tse bo na' nta tu me là. Nummbe yub mbé' ke nsi kwù, yub mbwôg ke bèn mbi. Bo nsi kag fétwut num njoṅ benntùn fa.