Read Medumba Esaya 8 Bible Online

Esaya 8 - Medumba bible

Esaya 8

¹Tshùaben tshob me ndù: Lo' ta' bag loṅ s'a zi là, nkite ju num bwe, miag mi tumte kua' mebwô, mbe ndù: Bin nànte nelo' dù'! Bin nànte nelo' ntsha'!

²Me ghù ghakwénta tse nenùn bàa, Uria ngale'te bo Sakaria nshum Bérékia.

³Me nèn ntèt nzwi àm, ngatshob ntshob Nsi, a jùm, mbwe mén mandum. Tshùaben tshob me ndù: Tswi lén se ndù: Bin nànte ndo' ntsha'.

⁴Nummbe bo nsi lo' tshunkàb Damas bo ntsha' Samaria nèn yi mbwe mfen Asiria, ke be ndù mén yoṅ ndèn netshob ndù: Tàa, ke màa lo.

⁵Tshùaben bèn ntshob nu me, ntshob ndù:

⁶Mba ngô wag ntse Siloé mi a be nswe' nda'nda', nke ṅwat'a num Retsin bo nshum Remalia là,

⁷Tshùaben nsi ghù neta ntse, ntse yàm mi à mà ta'ntse ko' nse' num bo, yen nà b'a mfen Asiria bo nkuni mi fa. A nsi tum koṅ i, sa num njoṅ nkaṅ mi fa.

⁸A nsi tsho Yuda, dun bwe, lo' njoṅ dù' fa. A nsi ko' tà kum tô mèn, sa mbu mi njoṅ bag fa. A nsi dun ntùm yu ngô fafa me Emmanuél!

⁹Ngôngô, bin bu' kem ntsho, nda' ndù bo nsi be'te zine, bin kù' ntoṅ njoṅ zin fa me ba tum tse bo ngùanesà! Bin nabte wut tsin num ntsho, nda' ndù bo nsi be'te zine;

¹⁰bin tàmte ba nu, là bo nsi biagte tshen nu là, bin sa'a, là mèn ke nsi ju' ju ze bin tshob là. Njoṅ i fa b'a nummbe Nsi b'a num yag njam.

¹¹Tshù mba Tshùaben na' ntshob me ndùse bu i tshùb àm nà. A tshob me ndù kà me zin num ze manze yen nzwit mèn nà.

¹²Kà bin tsiaṅ ndù tsham mba ke lo ze yen nzwit mèn ni ke ntsiaṅ tsham nà. Kà bin bwôg ju ze bo num mbwôg là, ke vètte.

¹³A b'a Tshùaben tàndà ntsho z'a bwô ndù bin ghamt'é là. A yi z'a bwô ndù bin bwôg i, nke ndet'é là.

¹⁴A nsi b'a dù' nelàne, loṅ fa'te, gholoṅ se mèn tiag num bwe là, num tunndà Israél tse bàa. A nsi be ywi' bo nkù bo bùn ba Yérusalém yi là.

¹⁵Ben yàm netèt bo nsi tiage, bo nsi vù nsi be'te wut yub; bo nsi tsho ntùm nkù a kut yube.

¹⁶Ma' men ntshob li mfe'; te màkwa num yen ju li ze me la'te wù là netèt tshàm ghazi'te nu.

¹⁷Me be nywinte num Tshùaben, z'a lem se i tunndà Yakob là; me yab ntù àm num i.

¹⁸Tshù, me mba bon tse Tshùaben fà me là, bag b'a lèn boa keki ntùm ngô Israél. Bag be ndùlal'a num ze tu Tshùaben tàndà ntsho z'a be ntswe num tu mbat Sion nà.

¹⁹A be ze bo tshob bin ndù: Bin bètte ba mfe nu ke ndù bin bètte ghalèn nu ndamnjù ke ghangàm no nu là, bin bùnte ntshob bo ndù: Ta' ngô ke' ke mbètt'a Nsi i nu ké? Mb'a bètte ba mfe nu mfà num benntùn ké?

²⁰Num ntshù' bo kwénta! A be ze bo ke ntshob ndùlala là, mb'a be mfôgnjù ke bèn mbe num ze tu ngô.

²¹A nsi be tshakendà ntùm ngô yube, nziku' bèn nja yube; a nsi so ndon tu ze mfen bo ze Nsi ndùse nziku' nsi ya i, ntù i ya là. A nsi bù' miag mi lôte mfe tù;

²²a nsi lôte num tsha'a. Là, nda' nge', njam boa nge' ts'a sèn njam nà nsi bèn be. Bo nsi ma' i ntùm dù' z'a tam njam nà.

²³Là, njam ndùb ke nsi tô njù matmat num nsitsha' dù' ze nge' be bwe ndonni là. A be ngelaṅ ts'a tôg na' ndo' tuswe nkabte ngô Zabulon bo ze Néftali yi là, mba ngelaṅ ts'a nsi se' là nsi lo' nkuni kabte dù' z'a ghebte dibantse, yoṅ Yordan nà bo tsha' ghakelèn Nsi yi.