Read Medumba Lévitiko 17 Bible Online

Lévitiko 17 - Medumba bible

Lévitiko 17

¹Tshùaben tshob Mosé ndù:

²Tshob Aron boa tse nshum mba njoṅ bon Israél fa ndù tshù ju ze me Tshùaben bètte ndù bo ghù li:

³Mba zit mén Israél lo z'a wat ta' nyàmna', mén mbwe ke ta' mbwe lo ntùm mbàn ke njam mbàn no,

⁴ke be ndù a lo' nèn yi mbwe ndà mbumte, kà mfà Tshùaben ntùm dù'ntswe i là, mba lem tshen nyàm ni ts'a fètte là nsi nèn tu i. Mba yen mèn ni fètte lem ndùlala, bo nsi sô i netèt ze nzwit mèn.

⁵Ndùlala, a bwô ndù bon Israél ke ndo' tshob tshule'te nse' yi mfà ngale'te mbwe Tshùaben mbwe ndà mbumte, ntshùa neke mfà tshen nyàm nà Tshùaben mà tshwèt. Bo nsi ke fà tshen tshule'te li Tshùaben mba jule'te ze nefà mebam nà.

⁶Ngale'te nsi fètte lem tshob num tômbwôg Tshùaben mbwe ndà mbumte, ton nzit njwèt mi lamte Tshùaben kua' mebwô.

⁷A ke' bwô bo bèn nke mfà tshule'te bebun tse boa bo ke nkat là. A bwô ndù yen ntshù' li ghô bo matmat num njoṅ zwiaṅ njù fa.

⁸Ndùlala, a bwô o tshob bo ndù: Mba zit mén Israél lo ke ngùn no z'a netèt bo lo z'a nsi fà nyàm neton ke mo' jule'te lo,

⁹ke be ndù a lo' nyàm nse' yi mbwe nzendà ndà mbumte kà mfà Tshùaben nà, mba bo a' sô yen mèn nà netèt ze nzwit mèn.

¹⁰Mba zit ze Israél lo ke ngùn no netèt bin z'a fèt lem nà, k'a b'a be we lo, mba m'a' kaṅ mvèn àm ntam i yi; nsô i netèt ze nzwit mèn.

¹¹Nummbe yôg mèn ke mb'a ntùm lem; me lo fà tshen lem nà bin a num tômbwôge, ndùlala ndù bin ke ntamte fa yi num tu ben tsine, nummb'a b'a lem bèn nke ntamte fa num tu mènntùn.

¹²Ndùlala bèn ngù me ntshob bon Israél ndù kà sàm mèn netèt bin zi mfèt lem, tà nkum mba kua' ngùn z'a be netèt bin nà.

¹³A be ze mén Israél ke ta' ngùn no z'a be netèt bin ghom ta' nyàm ke ta' saṅ no z'a be bo fèt là tshwèt yoṅ nà, mb'a bwô ndù a naṅ lem tse nsi, ndo' tsha' mbomte yi.

¹⁴Nummbe zwiag mba zit mèn no b'a ntùm lem tse ts'a be num i là. A ndùlala ze me na' ntshob bon Israél ndù kà bo fèt lem sàm mèn nà. Nummbe zwiag mba zit mèn no b'a ntùm lem tse ts'a be num i là. Mba we lo z'a fèt lem nà bo nsi nsô i netèt ze nzwit mèn.

¹⁵Mba zit mèn no z'a fèt nyàm z'a kwù ke ze ju fagt'é lo là, mb'a nsi sôg nzwe tse, sôg wul i ntùm ntse, be nesagte kum mfetnjù, ke ng'é b'a mén la' ke ngùn no. Yen nà nsi be tôg a be nelàne.

¹⁶A be z'a ke' sôg nzwe tse, ke sôg wul i là, mb'a nsi ket lèt ko' ze kebwô.