Read Medumba Lévitiko 2 Bible Online

Lévitiko 2 - Medumba bible

Lévitiko 2

¹Ndùse mèn ke mfà ta' nda' Tshùaben mba ju bwôntù là, mb'a bwô ndù ju bwôntù i là b'a mbab bàn. A nsi naṅ mfèt num bwe, bèn ma' tshu nelamte bwe.

²A nsi lo' nèn fà ghafà tshule'te, tse nshum Aron. Ngafà tshule'te nsi ṅwat ta' bu mbab bàn num men mbab bàn nà mi bo naṅ mfèt bwe là boa njoṅ tshu nelamte fa, ton num mbwôge, num neke nkwimte yi. A b'a ju bwôntù ze njwèt mi lamte Tshùaben kua' mebwô là.

³Ju z'a nsi tù' num ju bwôntù là nsi b'a ze Aron boa tse nshum. A b'a ta' ju z'a làn neshu là netèt tshu bwôntù tse bo ton mbwôg mbwe Tshùaben nà.

⁴A be z'o nabt'a ju bwôntù ze bo tont'a lag mbwôg là, mb'a bwô ndù a b'a mbab bàn, mb'a ba makela' z'a ke' ghù ntsha' là, ze bo lo' mfèt kà ntébt'é yi là boa bontsit makela' ts'a ke' ghù ntsha', ze bo tshùmte mfèt num bwe là.

⁵A be ze yu ju bwôntù b'a makela' ze bo kat'a nekate là, mb'a bwô ndù a b'a mbab bàn mi bo lo' mfèt ntébt'é yi là, ke be ndù ntsha' num bwe.

⁶O nsi be't'é nkam nkam, naṅ mfèt num bwe. A b'a ta' ju bwôntù.

⁷A be ze yu ju bwôntù b'a makela' ze bo kat'a num kam ke'te là, mb'a bwô ndù a b'a mbab bàn mi bo lo' mfèt kà ntébt'é yi là.

⁸O nsi lo' ju bwôntù z'o lo' tshen tshu là nabte yi nefà Tshùaben nà, se' fà ngafà tshule'te, ze tu wut lo' nèn yi num tômbwôge.

⁹Ngafà tshule'te nsi lo' z'a fà num neke nkwimte yi là ton num tômbwôge. A b'a ju bwôntù ze njwèt mi lamte Tshùaben kua' mebwô là.

¹⁰Ju z'a nsi tù' num ju bwôntù là nsi b'a ze Aron boa tse nshum. A b'a ta' ju z'a làn neshu là netèt tshu bwôntù tse bo ton mbwôg mbwe Tshùaben nà.

¹¹Kà sàm ju bwôntù num tshu bwôntù tse bin nsi nèn yi mbwe Tshùaben nà ghù ntsha' ntùm bwe. Nummb'a ke' bwô ndù bin ton sàm ju z'a ghù ntsha' ke ṅwa' lo là num tshu bwôntù tse bin nsi ton mbwôg mbwe Tshùaben nà.

¹²Bin ghù nefà tshen tshu là Tshùaben mba mbwe tshu là. Là, bo ke nsi fà tshen tshu là num tômbwôg à mba ju bwôntù ze njwèt mi lamte mebwô là.

¹³O nsi ke ma' ngwa num tsho tshu bwôntù fa. O ke nsi faṅ ju bwôntù o ke ma' ngwa bwe, nummbe yen nà b'a keki kàn Nsi o; o nsi ke ma' ngwa num njoṅ tsho tshu bwôntù fa.

¹⁴A be z'o tshwèt mfà ju bwôntù mbwe tshu Tshùaben nà, mb'a nsi b'a ba ko' ngefet nswe, tse bo ton mbwôge, ngo' là. O nsi fà à yi mba tsho mbwe tshu là.

¹⁵O nsi naṅ mfèt num bwe, bèn ma' tshu nelamte bwe. A b'a ju bwôntù.

¹⁶Ngafà tshule'te nsi ton tsemo' bag ko' ngefet tse bo gho'o, ma' mfèt boa tshu nelamte bwe là num neke nkwimte yi. A b'a ju bwôntù ze bo ton mbwôg mbwe Tshùaben nà.