Read Medumba Lévitiko 20 Bible Online

Lévitiko 20 - Medumba bible

Lévitiko 20

¹Tshùaben tshob Mosé ndù: Tshob bon Israél ndù:

²Mba zit mèn no netèt bon Israél ke zit mèn no netèt ghùn tse bo be netèt bo lo, z'a ton mo' mén i mbwôg ngamte Molok yi là, mba bo a' zwi i. Ba la' bèn ntamt'é ndoṅ.

³Mba me là, me nsi tsho' lag sàm num yen mèn nà, sô i netèt ze nzwit mèn, nummb'a sagte dù'ntswe àm, ndo' lén sàm mba ju banban nà, nton mén i ngamte Molok yi.

⁴A be ze ba la' mem miag, nkabte yen mèn nà z'a ton mo' mén i ngamte Molok yi, ke zwi i tshob là,

⁵mba me nsi tsho' lag sàm num i mba num tunndà i, sô i netèt ze nzwit mèn boa njoṅ benntùn fa tse boa bo num nkale, nke mfà wut tshob num neke ngamte Molok là.

⁶A be ze mèn bètte ben boa ywèt be ntshobte nu ke ghadiag ngàm no, boa bo tamte nkat là, mba me nsi tsho' lag sàm num yen mèn nà, sô i netèt ze nzwit mèn.

⁷Bin sôg ndàne, mbe nelàne, nummbe me Tshùaben Nsi zin b'a nelàne.

⁸Bin tshùb ntshù' màm, nke nze njoṅ i fa. Me b'a Tshùaben ze me num ngù bin làn nà.

⁹Mba zit mèn no z'a so ndon tu tàab ke màab lo là, mba bo a' zwi i. Mb'a so ndon tu tàab ke màab lo là, lem tse nèn à be kua' tu i.

¹⁰A be ze ta' mandum ghù màndà bo mènnzwi z'a na ndà là, nzwi ze mèn ndù la' là, mba bo a' zwi mandum bo mènnzwi z'a ghù màndà là.

¹¹A be ze mèn lo' nzwi tàab, njen tàab tunntôg njam nzwi i là, mba bo a' zwi yub ntu bàa fa, lem tshob nèn à be kua' tu bo.

¹²A be ze mèn lo' nzwi mén i là, mba bo a' zwi yub ntu bàa fa; bo ghù nu tuswe; lem tshob nèn à be kua' tu bo.

¹³A be ze mandum nô mandum mba bo num nô mènnzwi là, mba ntu tshob bàa fa ghù tshùaya'nu, mbwô ndù bo zwi yube; lem tshob nèn à be kua' tu bo.

¹⁴A be ze ta' mandum so mènnzwi bo ngon i là, mba yen nà b'a nezwi mèn. A bwô neton mandum mbwôge, nton mènnzwi bo ngon i mbwôg, ndù a tshùa ndùlala kà lèn yen nu là bèn mbe netèt bin.

¹⁵A be ze ta' mandum nô bo nyàm nà, mba bo a' zwi ng'é, mbèn nzwi mba nyàm.

¹⁶A be ze ta' mènnzwi lo' ta' nyàm, nkat bo yi là, mb'o a' zwi mènnzwi, mbèn nzwi mba nyàm. Bo nsi zwi yube, lem tshob nèn à be kua' tu bo.

¹⁷A be ze ta' mandum kô neso mfèl i ze mènnzwi, ngon tàab ke ngon màab lo, kà njen i tunntôg, a bèn njen i ze tunntôg là, mb'a b'a nu tuswe. A bwô ndù bo lé' yub num miag fèt tshobe. A yen mfèl i ze mènnzwi tunntôg, mbe ndù a' ket lèt nukebwô i.

¹⁸A be ze ta' mandum nèn num mènnzwi ndùs'a tshwèt njen ṅwù, njen i tunntôg, kà njen lem ts'a tshwèt ntum num i, kua' tu wut mènnzwi yen lem tse là, mba bo nsi sô yub netèt yub nzwit mèn.

¹⁹A ke' bwô ndù o yen mfèt màan ke mfèt tàan ze mènnzwi lo tunntôg, nummbe bo b'a kua' lem tsho. Bo a' ket lèt nukebwô yub.

²⁰A be ze mèn lo' nzwi mfèt màab là, mb'a tam tuswe tu mfèt màab là. Bo a' ket lèt nukebwô yub, nkwù ke ghù mén.

²¹A be ze mèn lo' nzwi mfèl i là, mb'a sagte wul i; a yen mfèl i tunntôg. Bo ke nsi ghù mén.

²²Bin nsi tshùb ntshù' màm boa njoṅ ntag màm fa; bin nsi ke ze njoṅ i fa, ndùlala ndù ngô me nsi te zin bwe là lem zine, ke ywi' zine.

²³Kà bin bwe matnu ngô tse me nsi ta' yub mbwe bin nà, nummbe bo lo ghù njoṅ tshen tshu là fa, me yen a b'a tshùaya'nu.

²⁴Me lo tshob bin ndù: Bin nsi lo' ngô yube. Me nsi fà i bin. A b'a ngô ze mbùn bo ṅwa' be nké, nke nswe' bwe là. Me b'a Tshùaben Nsi zin, ndù me lo fagte zin num ngôngô.

²⁵A bwô bin zete, ngù fagte netèt nyàm ts'a làn nà boa ts'a sagte là, nsaṅ mi a làn nà boa mi a sagte là, ndùlala ndù kà bin tshùa njam ba nyàm boa nsaṅ sagte wut tsine, ke nyàm nesoṅ bam nsi fa tse me na' nda'te fagte bin ndù bo sagte lo.

²⁶Bin nsi be ben nelàn num yàm tu, nummbe me Tshùaben b'a nelàne. Me lo fagte zin num ngôngô, ndùlala ndù bin be yàm nzwit mèn.

²⁷Mba zit mandum no ke mènnzwi lo z'a be ntshobte boa ywèle, ke neke ntshaṅ ngàm no là, bo nsi zwi yube. Bo nsi tamte yub ndoṅ, lem tshob nèn à be kua' tu bo.