Read Medumba Lévitiko 21 Bible Online

Lévitiko 21 - Medumba bible

Lévitiko 21

¹Tshùaben tshob Mosé ndù: Tshob ghale'te, tse nshum Aron, men ntag li m'a' tshob wù là: Kà sàm ngale'te sagte wul i num ta' fe mèn netèt ze nzwit mèn,

²kà ntag nda' ben tse bo b'a tse lem nà: Màab, tàab, nshum i, ngon i, mfèl i ze mandum,

³mfèl i ze mènnzwi z'a be ntswe bo yi là, a be z'a ke' à ménngon bo ke yoṅ ntabt'é, a ke yoṅ na ndà là; a ghù nesagte wul i num fe i a be z'a yà na ndà là;

⁴mb'a b'a mfen netèt ze nzwit mèn nà, a ke' bwô ndù a sagte wul i, ke lo' se fa' mba ju banban nà.

⁵Ghale'te ke nsi kom ta' dù' tèt tu bo, ke kom mbaṅ nyiaṅ ntshu tshobe, ke tshebte mfaṅ num bo.

⁶A bwô ndù bo be ben nelàn num Nsi yub, ke lo' lén Nsi yub mba ju banban nà; nummbe bo bèn nke nton tshule'te Nsi yub num mbwôge; yen nà b'a jujù Nsi yub. Bo nsi b'a ben nelàne.

⁷Bo ke nsi so kattù mènnzwi ke z'a ghù yôg kebwô lo. Bo ke nsi so mènnzwi ze ndu i ta' i là, nummbe bo b'a nelàn num Nsi yub.

⁸O nsi lo' ngale't'a mba mèn nelàn nà, nummb'a nke mfà jujù Nsi o; a nsi be mèn nelàn num o, nummbe me Tshùaben ze me num ndànte zin nà b'a nelàne.

⁹A be ze ngon ngale'te bagte wul i, nkat là, mb'a bagte tàab. Mb'a bwô ndù bo ton i mbwôge.

¹⁰Ngale'te z'a tshùa tsemo' fèt tse, yen nà ze bo na' naṅ mfèt tu i njo' i, ngom i kame, ma' nzwe fa' Tshùaben num i là, ke nsi faṅ tu i nge ke bèn mfagte nzwe tse.

¹¹A ke nsi nèn mbaṅ sàm fe mèn; a ke nsi sagte wul i, ke num fe tàab ke fe màab lo.

¹²A ke nsi tum dù'ntswe, ke lo' dù'ntswe Nsi i mba ju banban nà; nummbe mfèt mi Nsi na' njo' i yi là b'a ndot fen yi. Me b'a Tshùaben.

¹³Ngale'te nsi so à ménngon ze bo ke' yoṅ ntabt'é là.

¹⁴A ke nsi so mfôg mènnzwi, ke mènnzwi ndu i ta' i lo, ke mènnzwi z'a bagte wul i ke nekat lo là; là, a nsi so à ménngon ze bo ke' yoṅ ntabt'é, z'a tum à netèt ze nzwit mèn nà.

¹⁵A ke nsi bagte tse bon netèt ze nzwit mèn; nummbe me b'a Tshùaben, mbe ndù me bèn nke ndànt'é.

¹⁶Tshùaben tshob Mosé ndù:

¹⁷Tshob Aron ndù: Num njoṅ zwiaṅ njù fa, sàm mandum netèt nzwil o z'a ghù lo' num wul i là, ke nsi ghebte num nefà jujù Nsi i.

¹⁸A ndùlala njoṅ ben tse fa tse bo ghù lo' num bo là ke tshob ntùm nka; num fa' Tshùaben. Tshen ben nà b'a: Ba mfùmiag, nke'kèt, ben tse mo' kam wut yub tsi là, tse mo' ju kwi'te num bo là,

¹⁹ba nke'kèt num ku bo, ke num bu bo lo,

²⁰ba tu'mvèn ke ba fènnsi lo, ben tse bo ghù lo' num lag sobe: Sa, mbàne, nyulag, ke tse mba tshob tsit lo.

²¹Sàm mandum netèt nzwit Aron ngale'te ke nsi fà tshule'te tse bo ton mbwôg là Tshùaben, a be z'a ghù lo' num wul i là. Mb'a ghù lo' num wul i là, a ke' ku'ni neghebte mfà jujù Nsi i.

²²Là, a ku'ni nejù jujù Nsi i, z'a tum num tshu bwôntù ts'a làn neshu boa ts'a làn nà.

²³Là, a ke' ghù neghebte mbaṅ kam nzwe ke mbaṅ tômbwôg lo, nummb'a ghù lo' num wul i; a ke nsi lo' dù'ntswe tshàm mba ju banban nà, nummbe me b'a Tshùaben, mbe ndù me bèn nke ndànte tshen dù'ntswe là.

²⁴Tshù mba Mosé na' ntshob Aron boa tse nshum, mba njoṅ bon Israél fa là.